SOMO LA 17
Yesu Ana Sifa Gani?
Tunapojifunza kuhusu mambo ambayo Yesu alisema na kufanya alipokuwa duniani, tunajifunza sifa ambazo zinatusaidia kumkaribia yeye na Yehova Baba yake. Baadhi ya sifa hizo zenye kuvutia ni zipi? Na tunawezaje kumwiga Yesu katika maisha yetu?
1. Yesu anafanana na Baba yake kwa njia gani?
Yesu akiwa mbinguni amemtazama Baba yake mwenye upendo na kujifunza kutoka kwake kwa mabilioni ya miaka. Na hivyo anafikiri, anahisi, na kutenda kama Baba yake. (Soma Yohana 5:19.) Yesu anaonyesha sifa za Baba yake kikamili hivi kwamba alisema: “Yeyote ambaye ameniona mimi amemwona Baba pia.” (Yohana 14:9) Unapojifunza kuhusu sifa za Yesu, utamjua Yehova vizuri zaidi. Kwa mfano, huruma ya Yesu kuelekea watu inaonyesha kwamba Yehova anakujali.
2. Yesu ameonyeshaje kwamba anampenda Yehova?
Yesu alisema: “Ili ulimwengu ujue kwamba ninampenda Baba, ninafanya kama vile Baba alivyoniamuru.” (Yohana 14:31) Alipokuwa duniani, Yesu alionyesha kwamba anampenda sana Baba yake kwa kumtii hata ilipokuwa vigumu kufanya hivyo. Pia, Yesu alipenda kuzungumza kumhusu Baba yake na kuwasaidia wengine wawe na urafiki wa karibu na Yehova.—Yohana 14:23.
3. Yesu ameonyeshaje kwamba anawapenda watu?
Biblia inasema kwamba Yesu ‘anawapenda sana wanadamu.’ (Methali 8:31) Alionyesha kwamba anawapenda watu kwa kuwatia moyo na kuwasaidia bila ubinafsi. Alifanya miujiza iliyoonyesha kwamba ana nguvu na pia anawahurumia watu. (Marko 1:40-42) Aliwatendea watu kwa fadhili bila ubaguzi. Maneno yake yaliwafariji na kuwapatia tumaini watu wote wenye moyo mnyoofu waliomsikiliza. Yesu alikuwa tayari kuteseka na kufa kwa sababu aliwapenda wanadamu wote. Lakini anawapenda hasa wale wanaofuata mafundisho yake.—Soma Yohana 15:13, 14.
CHIMBA ZAIDI
Jifunze kuhusu sifa za Yesu. Na uchunguze jinsi unavyoweza kuiga upendo na ukarimu wake.
4. Yesu anampenda Baba yake
Yesu alituwekea mfano wa jinsi ya kuonyesha kwamba tunampenda Mungu. Soma Luka 6:12 na Yohana 15:10; 17:26. Baada ya kusoma kila andiko, zungumzieni swali hili:
-
Tunawezaje kumwiga Yesu na kuonyesha kwamba tunampenda Yehova?
Yesu alimpenda Baba yake wa mbinguni na alizungumza naye mara nyingi kupitia sala
5. Yesu anawajali watu wenye uhitaji
Yesu alitanguliza mahitaji ya watu wengine. Hata alipokuwa amechoka alitumia wakati na nguvu zake kuwasaidia watu. Soma Marko 6:30-44, kisha mzungumzie maswali haya:
-
Katika simulizi hili, Yesu alionyeshaje kwamba anawajali wengine?—Ona mstari wa 31, 34, 41, na 42.
-
Ni nini kilichomchochea Yesu awasaidie watu?—Ona mstari wa 34.
-
Kwa kuwa Yesu alionyesha sifa za Yehova, hilo linakufundisha nini kumhusu Yehova?
-
Unaweza kumwiga Yesu kwa njia gani ili uonyeshe kwamba unawajali wengine?
6. Yesu ni mkarimu
Yesu alikuwa mkarimu ingawa hakuwa na vitu vingi vya kimwili, na alitutia moyo tuwe wakarimu. Soma Matendo 20:35, kisha mzungumzie swali hili:
-
Kulingana na maneno hayo ya Yesu, tunawezaje kuwa na furaha?
Onyesha VIDEO, kisha mzungumzie swali linalofuata.
-
Tunaweza kutoa katika njia zipi, hata ikiwa hatuna vitu vingi vya kimwili?
Je, wajua?
Biblia inatufundisha tusali kwa Yehova kupitia jina la Yesu. (Soma Yohana 16:23, 24.) Tunaposali kwa njia hiyo, tunaonyesha kwamba tunatambua jambo ambalo Yesu amefanya ili kutusaidia tuwe rafiki za Yehova.
WATU FULANI HUSEMA: “Mungu hajali tunapoteseka.”
-
Kwa kuwa Yesu alionyesha sifa za Baba yake, matendo yake yanathibitishaje kwamba Yehova anatujali?
MUHTASARI
Yesu anampenda Yehova, na pia anawapenda watu. Kwa kuwa Yesu anaonyesha sifa za Baba yake, unapozidi kumjua Yesu ndivyo utakavyozidi kumjua Yehova.
Ungejibuje?
-
Kama Yesu, tunawezaje kuonyesha kwamba tunampenda Yehova?
-
Kama Yesu, tunawezaje kuonyesha kwamba tunawapenda watu?
-
Ni sifa gani ya Yesu inayokuvutia zaidi?
CHUNGUZA ZAIDI
Chunguza baadhi ya sifa za Yesu ambazo tunaweza kuiga.
“Mwige Yesu kwa Kusitawisha Sifa Zifuatazo . . .” (Yesu—Njia, Kweli, na Uzima, ukurasa wa 317)
Jifunze kwa nini unapaswa kusali kupitia jina la Yesu.
“Kwa Nini Tusali Katika Jina la Yesu?” (Mnara wa Mlinzi, Februari 1, 2008)
Je, Biblia ina habari zozote kuhusu sura ya Yesu?
“Yesu Alikuwa na Sura ya Aina Gani?” (Makala iliyo kwenye mtandao)
Tunajifunza nini kutokana na jinsi Yesu alivyowatendea wanawake?
“Heshima na Staha Chini ya Utunzaji wa Mungu” (Mnara wa Mlinzi, Septemba 1, 2012)
Huenda Ukapenda Pia
MASWALI YANAYOULIZWA MARA NYINGI
Mtaala wa Kujifunza Biblia Unaotolewa na Mashahidi wa Yehova Ni Nini?
Unaweza kutumia tafsiri yoyote ya Biblia unaposhiriki programu ya mazungumzo inayotolewa na Mashahidi wa Yehova. Jihisi huru kualika familia yako yote na marafiki wowote unaochagua.
