WEKELO 17
Woho akɔna w’onto wele Yeso?
Etena kekaso akambo wakate ndo wakasale Yeso lam’akinde lanɛ la nkɛtɛ, sho mbisholaka waonga watosukanya la nde ndo la Jehowa, She. Naa waonga amɔtshi l’atei wa waonga w’amɛna asɔ? Ndo ngande wakokaso mbokoya Yeso lo lɔsɛnɔ laso?
1. Lo toho takɔna tele Yeso oko She?
L’olongo, Yeso akendaka woho wakasalaka She ka ngandji akambo ndo nde akeke akambo oma le nde l’edja ka miliyara y’ɛnɔnyi. Etombelo wele la dui sɔ ele, nde kanyiyaka, ndjaokaka ndo salaka akambo paka oko She. (Adia Joani 5:19.) Lo mɛtɛ, Yeso kɛnɛmɔlaka lonto la She lo yoho ya kokele. Diakɔ diakandate ate: “Onto tshɛ lambɔmɛna ambɛna ndo Papa.” (Joani 14:9) Naka wɛ mbeka akambo wendana la lonto laki Yeso, kete wɛ ayeya Jehowa dimɛna. Ɛnyɛlɔ, kɛtshi kakokaka Yeso anto mɛnyaka woho wayaoka Jehowa lo dikambo diayɛ.
2. Ngande wakɛnya Yeso dia nde mbokaka Jehowa ngandji?
Yeso akate ate: “Dia andja mbeya ɔnɛ dimi nangaka Papa, oko wakambidjangɛ Papa dia nsala mbasalami.” (Joani 14:31) Lam’akinde lanɛ la nkɛtɛ, Yeso akɛnya ngandji k’efula kakandokaka She lo mbookitanyiya kaanga l’etena kaki wolo nsala dikambo sɔ. Yeso akalangaka nto mbutɛ anto akambo wendana la She ndo nkimanyiya anto akina dia vɔ monga la diɔtɔnganelo dia dimɛna la She.—Joani 14:23.
3. Ngande wakɛnya Yeso dia nde mbokaka anto ngandji?
Bible mbutaka dia Yeso “akangɛnangɛnaka ana w’anto lo yoho ya laande.” (Tokedi 8:31, nɔtɛ ka l’ɛse ka dikatshi) Nde akɛnya ngandji kɛsɔ lo nkeketsha ndo lo nkimanyiya anto. Ahindo wakandasale wakɛnyaka aha tsho wolo ande, koko ndo kɛtshi kande. (Makɔ 1:40-42) Nde akasalɛka anto akambo la ngandji ndo aha la shɔnɔdi. Ɛtɛkɛta ande wakakeketshaka ndo wakashaka akanga w’etema ɛlɔlɔ tshɛ wakohokamɛka elongamelo. Yeso aketawɔ nsowa ndo mvɔ l’ɔtɛ wa ngandji kakandokaka anto tshɛ. Koko nde akalangaka lo yoho ya laande wanɛ wakayelaka wetshelo ande.—Adia Joani 15:13, 14.
NYOMOTSHIMOLA
Eka akambo akina efula wendana la lonto laki Yeso. Ndo enda woho wakokayɛ nkɛnɛmɔla ngandji ndo mɛnya lokaho layɛ oko wakandasale.
4. Yeso nangaka She
Ɛnyɛlɔ ka Yeso tetshaka woho wakokaso nkɛnɛmɔla ngandji kokaso Nzambi. Adia Luka 6:12 ndo Joani 15:10; 17:26. L’ɔkɔngɔ wa mbadia divɛsa tshɛ, nyɔkɛtshanya dimbola nɛ:
-
Lo mbokoya Yeso, ngande wakokaso mɛnya dia sho nangaka Jehowa?
Yeso akalangaka She lele l’olongo ndo akasawolaka la nde mbala efula lo dɔmbɛlɔ
5. Yeso ndjakiyanyaka dikambo di’anto wele lo dihombo
Yeso aketshaka ehomba w’anto akina la ntondo ka wande. Kaanga lam’akinde ambɔlɛmba, nde akakambe la wenya ndo la wolo ande dia nkimanyiya anto. Nyadia Makɔ 6:30-44, ndo oma laasɔ, nyɔkɛtshanya ambola anɛ:
-
L’ɔkɔndɔ ɔnɛ, naa toho tɔmɔtshi takɛnya Yeso dia nde akayakiyanyaka dikambo di’anto akina?—Enda divɛsa 31, 34, 41, ndo 42.
-
Kakɔna kakatshutshuya Yeso dia nkimanyiya anto?—Enda divɛsa 34.
-
Lam’ele Yeso ekɔ lo nkɛnɛmɔla lonto la She, kakɔna kaketsha akambo asɔ tshɛ lo dikambo dia Jehowa?
-
Naa toho tɔmɔtshi takokaso mbokoya Yeso lo woho wakandayakiyanyaka dikambo di’anto akina?
6. Yeso ekɔ la lokaho
Yeso aki la lokaho kaanga mbakinde komonga la diangɔ efula dia l’emunyi, ndo nde akatokeketsha dia monga la lokaho. Nyadia Etsha 20:35, ndo oma laasɔ, nyɔkɛtshanya dimbola nɛ:
-
Lo ndjela Yeso, ngande wakokaso monga l’ɔngɛnɔngɛnɔ?
Nyende VIDƐO, ndo oma laasɔ, nyɔkɛtshanya dimbola diayela nɛ:
-
Naa toho tɔmɔtshi takokaso mɛnya lokaho laso, oyadi sho bu la diangɔ efula dia l’emunyi?
Onde wɛ akeyaka?
Bible tetshaka dia nɔmbaka Jehowa lo lokombo la Yeso. (Adia Joani 16:23, 24.) Etena kalɔmbaso lo yoho shɔ, sho mɛnyaka dia tekɔ la lowando lo kɛnɛ kakasale Yeso dia tokimanyiya dia sho nkoma angɛnyi wa Jehowa.
ANTO AMƆTSHI MBUTAKA ƆNƐ: “Nzambi hayakiyanya dikambo di’asui aso.”
-
Lam’ele Yeso kɛnɛmɔlaka lonto la She, ngande wɛnya etsha ande dia Jehowa ndjakiyanyaka dikambo diaso?
LO TSHENA PE
Yeso nangaka Jehowa ndo nangaka anto. Lam’ele Yeso ekɔ oko She, laasɔ lo yɛdikɔ yayoyotalekaka mbeya Yeso, mbayoyotalekaka mbeya Jehowa.
Ovuswelo
-
L’ɛnyɛlɔ ka Yeso, ngande wakokaso mɛnya dia sho nangaka Jehowa?
-
L’ɛnyɛlɔ ka Yeso, ngande wakokaso mɛnya dia sho nangaka anto?
-
Naa dionga dialekayɛ ngɛnangɛna le Yeso?
SALA EYANGELO
Tende waonga amɔtshi waki Yeso wakokaso mbokoya.
“Dia mbokoya Yeso . . .” (Yeso ekɔ mboka, mɛtɛ ndo lɔsɛnɔ, lɛkɛ 317)
Tende lande na kele ekɔ ohomba nɔmba lo lokombo la Yeso.
“Lande na nɔmba lo lokombo la Yeso?” (Tshoto y’Etangelo, Ngɔndɔ ka nɛi 1, 2008)
Onde Bible mbutaka dikambo dimɔtshi lo kɛnɛ kendana la ɛnamelo ka Yeso?
Kakɔna kakokaso mbeka oma lo yoho yakasalɛka Yeso wamato akambo?
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
