OCIPAMA 17
Yesu wa Tuwa Ndati?
Poku lilongisa ovina Yesu a popia levi a linga eci a kala palo posi, tu limbuka ovituwa viaye. Kuenje eci ci pamisa ukamba wetu laye kuenda la Isiaye Yehova. Vipi vimue pokati kovituwa viaco? Tu setukula ndati Yesu komuenyo wetu?
1. Lonjila yipi Yesu a sokisiwa la Isiaye?
Kilu, Yesu wa kala kumue la Isiaye ukuacisola Yehova vokuenda kuanyamo alua kuenda wa lilongisa ovina vialua laye. Eli olio esunga lieci Yesu a kuetele ovisimĩlo loku linga ovina ndeci Yehova. (Tanga Yoano 5:19.) Omo okuti, Yesu o setukula ciwa ovituwa via Isiaye, wa popia hati: “Wosi o ndi mola, o molavo Isia.” (Yoano 14:9) Osimbu ove wamamako oku lilongisa catiamẽla kovituwa via Yesu, o kũlĩhavo ovina vikuavo viatiamẽla ku Yehova. Ndeci, poku mola ndomo Yesu a kapeleko omanu, o limbuka ndomo Yehova a ku kapakovo.
2. Yesu wa lekisa ndati okuti o sole Yehova?
Yesu wa popia hati: “Oco oluali lu kũlĩhe okuti ame ndi sole Isia, ndi linga ovina Isia a ndi tuma oku linga.” (Yoano 14:31) Yesu eci a kala palo posi, wa lekisa okuti wa solele calua Isiaye poku pokola kovina viosi ndaño muẽle vepuluvi lina ka ca lelukile oku ci linga. Handi vali, Yesu wa solelevo oku vangula catiamẽla ku Isiaye kuenda oku kuatisa omanu oku linga akamba va Isiaye.—Yoano 14:23.
3. Yesu wa lekisa ndati okuti o sole omanu?
Embimbiliya li popia okuti Yesu wa “sanjukilile calua omãla vomanu.” (Olosapo 8:31) Eye wa lekisa ocisola caye poku pamisa loku kuatisa omanu. Ovikomo eye a linga ka via lekisile lika okuti eye o kuete unene, pole, via lekisavo okuti, wa kuatele ohenda. (Marko 1:40-42) Eye wa tata ciwa omanu okuti ka lekisile ocame. Olondaka viaye via lembeleka loku eca elavoko komanu vosi vakuacili vo yevelela. Yesu wa lekisa onjongole yoku tala ohali kuenda oku fa omo liocisola a kuatela omanu. Pole, eye o sole calua vana va pokola alongiso aye.—Tanga Yoano 15:13, 14.
LILONGISA ONDONGOSI
Lilongisa eci catiamẽla kovituwa via Yesu. Limbukavo ndomo o lekisa ocisola loku kala ukuakueca ndeci eye.
4. Yesu o sole Isiaye
Ongangu ya Yesu yi tu longisa ndomo tu lekisa okuti, tu sole Suku. Tanga Luka 6:12 kuenda Yoano 15:10; 17:26. Noke yoku tanga ocisonehua locisonehua, konomuisa epulilo li kuãimo:
-
Tu setukula ndati Yesu loku lekisa okuti tu sole Yehova?
Yesu wa solele Isiaye kuenda wa enda oku vangula laye vohutililo
5. Yesu wa kapako omanu va sukila ekuatiso
Yesu wa kapako omanu va sukila ekuatiso okuti, eye muẽle ci sule. Eye wa enda oku talavaya lotembo yaye kuenda ongusu yaye oco a kuatise omanu ndaño muẽle vepuluvi lina eye a kavele. Tanga Marko 6:30-44, noke konomuisa apulilo a kuãimo:
-
Yesu wa lekisa ndati okuti wa kapeleko omanu?—Tala ovinimbu 31, 34, 41, kuenda 42.
-
Nye ca vetiya Yesu oku kuatisa omanu?—Tala ocinimbu 34.
-
Omo okuti Yesu o setukula ciwa ovituwa via Yehova, eci ci tu longisa nye catiamẽla ku Yehova?
-
Volonjila vipi tu pondola oku setukula ndomo Yesu a tata omanu?
6. Yesu ukuakueca
Ndaño okuti Yesu ka kuatele ovina vialua, ovina a kuatele, wa enda oku tepelako vakuavo. Eci oco a tu vetiya oku lingavo. Tanga Ovilinga 20:35, noke konomuisa epulilo li kuãimo:
-
Ndomo olondaka via Yesu via lekisa, nye ci tu sanjuisa?
Tala OVIDEO, noke konomuisa epulilo li kuãimo.
-
Ndaño okuti ka tu kuete ovina vialua, tu pondola oku kuata ndati ocituwa coku eca?
Wa ci kũlĩha?
Embimbiliya li tu longisa oku likutilila ku Yehova vonduko ya Yesu. (Tanga Yoano 16:23, 24.) Poku ci linga, tu lekisa okuti tua kapako eci Yesu a tu lingila oco tu kale akamba va Yehova.
OMANU VAMUE VA POPIA VATI: “Suku ka kapeleko ohali yetu.”
-
Omo okuti Yesu o setukula ciwa ovituwa via Yehova, ovilinga viaye vi situlula ndati okuti Yehova wa tu kapako?
NYE WA LILONGISA?
Yesu o sole Yehova kuenda omanu. Omo okuti Yesu o sokisiwa la Isiaye, nda ove amamako oku kũlĩha Yesu, o kũlĩhavo Yehova.
Oku Pitulula
-
Tu lekisa ndati ocisola ku Yehova ndeci Yesu a linga?
-
Tu lekisa ndati ocisola komanu ndeci Yesu a linga?
-
Ovituwa vipi via Yesu o sole vali?
OCO O KŨLĨHE OVINA VIKUAVO
Kũlĩhĩsa vimue pokati kovituwa via Yesu tu pondola oku setukula.
“Oco o Setukule Yesu Kala . . .” (Yesu—Onjila, Ocili Haeye, Omuenyo, kemẽla 317)
Lilongisa esunga lieci tu sukilila oku likutilila vonduko ya Yesu.
“Momo Lie tu Likutililila Vonduko ya Yesu?” (Utala Wondavululi 1 wa Kupupu 2008)
Nye Embimbiliya li popia catiamẽla ketimba lia Yesu?
“Yesu wa Kala Ndati Konepa Yetimba?” (Ocipama ci sangiwa lika vo Internet)
Nye tu lilongisa konjila ndomo Yesu a tata akãi?
“Esumbilo Kuenda Oku Kapiwako Poku Teyuiwa la Suku” (Utala Wondavululi 1 Wenyenye Linene 2012)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
