KAPITE 17
Te Agaaga ʼo Sesu Mo ʼOna Kalitate
Neʼe fai e Sesu ni palalau mo ni gaue ʼi tana ʼi te kele. Pea ka tou lau te ʼu faʼahi ʼaia, ʼe tou iloʼi ai ʼona kalitate pea mo fia fakaovi ai kia ia pea mo tana Tamai ko Sehova. Kotea ʼona kalitate ʼaia? Pea ʼe feafeaʼi hau faʼifaʼitakiʼi ia Sesu?
1. He koʼe ʼe ui neʼe ina faʼifaʼitakiʼi lelei tana Tamai?
ʼI tana nofo ʼi selo, neʼe ina sioʼi te ʼu gaue neʼe fai e tana Tamai lolotoga ni lauʼi taʼu ʼe miliale. Pea neʼe lahi te ʼu faʼahi neʼe ina ako mai ai. Koia neʼe toe fai feia pe ia Sesu, neʼe hage ʼana manatu mo te ʼu meʼa ʼae neʼe ina logoʼi ko tana tamai. (Lau ia Soane 5:19.) Neʼe faʼifaʼitakiʼi lelei e Sesu te agaaga ʼo tana Tamai, koia ʼae neʼe ina ui fenei: “Ko ʼae kua sio kia te au, kua toe sio ia ki te Tamai.” (Soane 14:9) Koia, ka lahi te ʼu faʼahi ʼe ke ako ʼo ʼuhiga mo te agaaga ʼo Sesu, pea ʼe ke iloʼi lelei age anai ia Sehova. Ohage la, neʼe mamahi ia Sesu moka mamahi te hahaʼi. Koia kapau la ʼe lotomahino ia Sesu, ʼe feafeaʼi age la ia ki te meʼa ʼae ʼe logoʼi e Sehova ʼo ʼuhiga mo koe?
2. Neʼe ina fakaha feafeaʼi tona ʼofa kia Sehova?
Neʼe ui fenei e Sesu: “Ke iloʼi e te malamanei ʼe au ʼofa ʼi te Tamai, ʼe au fai pe ia te meʼa ʼae neʼe fakatotonu mai e te Tamai ke au fai.” (Soane 14:31) ʼI te nofo ʼa Sesu ʼi te kele, neʼe ina fakaha tona ʼofa mamahi ʼi tana Tamai ʼaki tana fakalogo kia te ia maʼia moka faigataʼa. Neʼe toe palalau ki te hahaʼi ʼo ʼuhiga mo tana Tamai pea mo tokoni kia natou ke natou kaumeʼa mo Ia.—Soane 14:23.
3. Neʼe ina fakaha feafeaʼi tona ʼofa ki te hahaʼi?
ʼE ui ʼi te Tohi-Tapu ko Sesu “neʼe makehe tona ʼofa ki te ʼu foha ʼo te tagata.” (Taʼaga Lea 8:31) Neʼe ina fakaha tona ʼofa ʼaki tana fakalotomalohiʼi mo tokoni ki te hahaʼi. Neʼe ha ʼi te ʼu milakulo ʼae neʼe ina fai tona malohi kae tafito tana lotomahino ki te mamahi ʼa ʼihi. (Maleko 1:40-42) Neʼe agalelei pea neʼe mole fakapalatahi. Neʼe ina fakalotofimalieʼi te hahaʼi ʼae neʼe fakalogo age pea mo foaki kia natou he ʼamanaki. Neʼe tali e Sesu ke mamahi mo mate ʼuhi ko tona ʼofa ki te tagata. Kae neʼe ʼofa mamahi ia natou ʼae neʼe fakalogo ki ʼana akonaki.—Lau ia Soane 15:13, 14.
TA FAKALOLOTO
Ta vakaʼi te ʼu kalitate ʼo Sesu pea ʼe feafeaʼi hata faʼifaʼitakiʼi tona ʼofa mo tana lotofoaki.
4. Tona ʼofa ki tana Tamai
Neʼe tuku mai e Sesu he faʼifaʼitaki lelei ʼo ʼuhiga mo tatatou faʼahiga fakaha ʼo totatou ʼofa ki te ʼAtua. Lau ia Luka 6:12 mo Soane 15:10; 17:26. ʼI te ʼosi lau ʼo te ʼu vaega takitahi, fai te fehuʼi ʼaeni:
-
ʼE ke fakaha feafeaʼi ʼe ke ʼofa ia Sehova?
5. Tona ʼofa ki te hahaʼi
Neʼe mole manatu pe ia Sesu kia ia totonu. Kae neʼe ina fakamuʼamuʼa tuʼumaʼu pe te ʼu meʼa ʼe aoga ki ʼihi. Logo la neʼe gaʼegaʼe, kae neʼe ina foaki tona temi mo tona malohi moʼo tokoni ki te hahaʼi. Lau ia Maleko 6:30-44, pea fai te ʼu fehuʼi ʼaeni:
-
Neʼe fakaha feafeaʼi e Sesu tana tokaga ki ʼihi?—Vakaʼi te ʼu vaega 31, mo 34, mo 41 pea mo 42.
-
Kotea ʼae neʼe ina uga Sesu ke tokoni ki te hahaʼi?—Vakaʼi te vaega 34.
-
Kapau neʼe faʼifaʼitakiʼi e Sesu tana Tamai, kotea ʼe feala ke ke ako ʼo ʼuhiga mo Sehova?
-
ʼE feafeaʼi hau faʼifaʼitakiʼi te faʼahiga tokaga ʼa Sesu ki te hahaʼi?
6. Tana lotofoaki
Neʼe mole koloaʼia ia Sesu kae neʼe lotofoaki. Pea ʼe ina ui mai ke tou toe lotofoaki. Lau ia Gaue 20:35, pea fai te fehuʼi ʼaeni:
-
Ohage ko tona ui e Sesu, ʼe kita fiafia moka kita fai tea?
Vakaʼi te ʼATA VITEO, pea fai te fehuʼi ʼae ʼe hoa mai.
-
Logo la ʼe mole kita koloaʼia, kae ʼe feafeaʼi hakita lotofoaki?
Kua ke iloʼi koa?
ʼE ui ʼi te Tohi-Tapu ke tou faikole kia Sehova ʼi te huafa ʼo Sesu. (Lau ia Soane 16:23, 24.) Ka tou fai feia, pea ʼe tou fakamoʼoni ai ʼe feala ke tou kaumeʼa mo Sehova ʼaki ia Sesu.
ʼE UI E ʼIHI: “ʼE mole tokaga mai te ʼAtua ia kia tatou.”
-
Kapau neʼe faʼifaʼitakiʼi e Sesu tana Tamai, ʼe ha feafeaʼi ʼi tona agaaga pea mo ʼana gaue ʼe tokaga Sehova kia tatou?
MANATU TAFITO
ʼE ʼofa Sesu ia Sehova ʼo feia mo te tagata. Neʼe faʼifaʼitakiʼi lelei e Sesu tana Tamai. Koia ka ke iloʼi lelei ia Sesu pea ʼe ke toe iloʼi lelei age anai ia Sehova.
Fehuʼi Fakamanatu
-
ʼE ke fakaha feafeaʼi ʼe ke ʼofa ia Sehova ohage ko Sesu?
-
ʼE ke fakaha feafeaʼi ʼe ke ʼofa ʼi te hahaʼi ohage ko Sesu?
-
Kotea te kalitate tafito ʼo Sesu ʼe ke leleiʼia?
TE TAHI ʼU MANATU
He ʼu kalitate ʼo Sesu ʼe feala ke tou faʼifaʼitakiʼi.
“Faʼifaʼitakiʼi Ia Sesu . . .” (Ko Sesu Te Ala, Mo Te Moʼoni Pea Mo Te Maʼuli, pasina 317)
Vakaʼi pe koʼe ʼe maʼuhiga ke tou faikole ʼi te huafa ʼo Sesu.
“Pourquoi prier au nom de Jésus ?” (Ko Te Tule Leʼo (Fakafalani) ʼaho 1 ʼo Fepualio 2008)
Kotea ʼae ʼe ui ʼi te Tohi-Tapu ʼo ʼuhiga mo te agaaga ʼo Sesu?
Kotea ʼe tou ako mai te aga ʼa Sesu ki te hahaʼi fafine?