ZƐŊ-LƐƐI 17

Zisɛ Ŋɔtua-pere Lɛlɛɛ-ŋai Taŋa Ɓa Le?

ŊƆPÊLE KƐ

Kwa mɛni maa-kɔri e pilaŋ mɛnii Zisɛ e gɛi ma da mɛnii e moi gɛɛ nɔii mai, kwa tua-pere lɛlɛɛ-ŋa kaa nyii a gɛ ku lɛɣɛ a nyaa da Naŋ Ziova. Dua-pere lɛlɛɛ-ŋai ŋi taŋa ɓa le? Nyaŋ kwa pɔri Zisɛ pɔɔkɔɔni leŋ kukɛ-ɣeniɛi su?

1. Pere sii kɛɛ leŋ ɓe Zisɛ kaa la yɛɛ Naŋ?

Zisɛ kɛɛ ɣala-taai, e mɛni tamaa maa-kɔri ŋɔwɛli-kɛ-maa Naŋ yeei a koraŋ biliyɔŋ tamaa. Mɛni ma, ŋɔkili-ŋa-siai da dua-pere kaa nɔ yɛɛ Ziova. (Zɔŋ 5:19 lono.) Tɔ̃ya ma, Zisɛ e Naŋ ŋɔtua-pere lɛlɛɛ-ŋai pɔɔ-kɔɔŋ a nɛlɛɛ, nyii gɛ e mo nyɛɛi: ‘Nuui aa ŋgaai, aa Naŋ-nuui kaa.’ (Zɔŋ 14:9) Ya mɛni maa-kɔri e pilaŋ Zisɛ ŋɔtua-pere lɛlɛɛ-ŋai dia, ya pai Ziova kɔlɔni a nɛlɛɛ. Gɔɔŋ-maa ɓa, berei Zisɛ e kɛ a gbaaŋɔɔ la nua mɛni mai, a berei lɛi Ziova kpaaŋɔɔi la imɛni ma.

2. Zisɛ aa nɛ leŋ a gɛɛ Ziova wɛli kaa ma?

Zisɛ e mo nyɛɛi: “Ŋa gɛ yɛɛ berei Naŋ-nuui a nɛ la mai, a gɛɛ nɔii e gɔlɔŋ ŋa Naŋ-nuui wɛli ni.” (Zɔŋ 14:31) Zisɛ kɛɛ nɔii mai, e wɛli-kɛ-maa su kpanaŋɔɔ lɛ Naŋ mɛni ma. E nyiŋi kɛ a berei e ŋoo mɛni la a tãi kelee a nɛɛ maŋ gɛi e kɛ a gbanaŋɔɔ. E kɛ ŋɔnɔ a Zisɛ nĩa-mɛni a gɛɛ e lono nua pɔ e pilaŋ Naŋ ma, e kpɔŋ maa tɛɛ dipɔ di laoi-laa kɛ a Nyaa.—Zɔŋ 14:23.

3. Zisɛ aa nɛ leŋ a gɛɛ e nuu-kpune wɛlini?

Ŋala-kɔlɔi e mo a gɛɛ Zisɛ e kɛ “a nuu-kpune wɛliɛ a ŋanaa.” (Tare-woo-ŋa 8:31, NWT) E ŋwɛli-kɛ-maai ŋi lɛ a berei e nua fɔrɔ la, e kpɔŋ maa tɛɛ dipɔ a nii kelee. Ŋɛi-kɛ-maa-ŋai e gɛi fe nɛ ti nɔ a gɛɛ wala-walalaa kaa nyeei, kɛlɛ e ŋɔnɔ ŋɔŋɛi-maloŋ-kaai lɛ. (Maki 1:40-42) Zisɛ e tua a nua a nɛlɛɛ, nyaŋ va kaa su-ɣɛɛ kɛ. Diai kelee da kaa diwoli tɔɔ mai, a kaa di ŋaa-nɛnɛ gɛ kili-kɛ-zu tɛɛ dipɔ nono-woo su. Zisɛ e faa ma a gɛɛ e mɔ̃lɛ, e saa kpɛni fei nuu-kpune kelee wɛli kaa ma. Kɛlɛ e diai titi siai a ŋɔsɛŋ-lɛɛi, wɛlini.—Zɔŋ 15:13, 14 lono.

MƐNI TAMAA MAA-KƆRI

Mɛni tamaa maa-kɔri e pilaŋ Zisɛ ŋɔtua-pere lɛlɛɛ-ŋai dia da berei ya pɔri wɛli-kɛ-maa lɛi la, ikɛ a yee laa ɓo-nuu yɛɛ nyaa.

4. Zisɛ Naŋ wɛli kaa ma

Zisɛ ŋɔmɛni-kɔɔŋ-maai e berei lɛ kwa pɔri kuwɛli-kɛ-maai lɛi la Ɣala mɛni mai. Luu 6:12 da Zɔŋ 15:10; 17:26 lono. Ka kpɛɛ Ŋala-kɔlɔ kpua-ŋai lonoi tɛitɛi, ka lono e pilaŋ mare-kɛɛ ŋi ma:

Kwa pɔri nɛi leŋ a gɛɛ Ziova wɛli kaa kua yɛɛ Zisɛ?

Zisɛ e ŋɔɣala-taa Naŋ wɛlini, nyaŋ a kaa vɛli a tãi kelee

5. Zisɛ kpaaŋɔɔi diai ŋwɛlii a kpɔŋ maai mɛni ma

Zisɛ e nua maa mɛni pu fulɔi ŋɔkɛ-ɣeniɛi su. Tãi kpiŋ vii e kɛ a gbɛɛ lai, a kaa tãi siɣe a gɛɛ e kpɔŋ maa tɛɛ nua pɔ. Maki 6:30-44 lono, gɛ ni ka lono e pilaŋ mare-kɛɛ-ŋai ŋi dia:

Ŋala-kɔlɔ kpua-ŋai ŋi su, Zisɛ e nɛ leŋ a gɛɛ e kɛ a gbaaŋɔɔ nua mɛni ma?—Ŋoo-kpua-kpua 31, 34, 41, da 42 kaa.
Le ɓe Zisɛ lii kula a gɛɛ e kpɔŋ maa tɛɛ nua pɔ?—Ŋoo-kpua 34 kaa.
Ee Zisɛ e Ziova ŋɔtua-pere lɛlɛɛ-ŋai lɛ a nɛlɛɛi, le ɓe nyiŋi a nɛ ya e pilaŋ Ziova ma?
Berei kwa pɔri Zisɛ ŋɔŋɛi-maloŋ-kaai pɔɔ-kɔɔni lai taŋa ɓa le?

6. Zisɛ yee laa ɓoɔɔi

Zisɛ e kɛ a nyee laa ɓoɔɔ berei maŋ sãa tamaa fe kɛ ni la nyeei, nyaŋ a ku fɔrɔi a gɛɛ kua maŋ kukɛ a kuyee laa ɓoɔɔ. Dikɛ-mɛni-ŋai 20:35 lono, gɛ ni ka lono e pilaŋ mare-kɛɛ ŋi ma:

Yɛɛ berei Zisɛ e mo lai, kwa pɔri lii-nɛ̃ɛ sɔlɔ ɓoi leŋ?

VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: “Luwa Tamaa Kaa Ɓɛlɛ-see Kɛɛ Su”—Gbua Loŋ (4:00)

Pere sii kɛɛ leŋ ɓe kwa pɔri ɓɛlɛ-see kɛi lai a kɛ kpiŋ sãa tamaa fe kuyeei?

I mɛnii kɔlɔŋ?

Ŋala-kɔlɔi e nɛ a gɛɛ maa nɛ̃ɛi ku Ziova fɛli Zisɛ laai su. (Zɔŋ 16:23, 24 lono.) Kwa Ɣala fɛli a bere sii ti, kwa nɛ a gɛɛ kuyee seeɛi mɛnii mu Zisɛ e gɛ a gɛɛ e kpɔŋ kua kukɛ a Ziova naoi.

NUA TAŊA DA MO DIYƐƐI: “Ɣala fe kpaaŋ ni kumɛni ma.”