NÍ KASEMI 18
Blɔ Nɔ Nɛ O Maa Gu Kɛ Le Anɔkuale Kristofohi
Nimli ayɔ akpehi abɔ deɔ ke Kristofohi ji mɛ. Se mɛ tsuo a hemi kɛ yemi kɛ a jemi bami ngɛ ekpaekpa. Enɛ ɔ he ɔ, mɛni blɔ nɔ wa maa gu kɛ le anɔkuale Kristofohi?
1. Mɛnɔmɛ ji anɔkuale Kristofohi?
Anɔkuale Kristofohi ji nihi nɛ a nyɛɛɔ Yesu Kristo se, aloo a kaseɔ Yesu Kristo. (Kane Ní Tsumi 11:26.) Mɛni a peeɔ kɛ tsɔɔ kaa a ngɛ Yesu kasee? Yesu de ke: “Ke nyɛ hi si ngɛ ye munyu ɔ nya a, lɛɛ ye kaseli nitsɛnitsɛmɛ ji nyɛ.” (Yohane 8:31) Enɛ ɔ tsɔɔ kaa, e sa nɛ anɔkuale Kristofohi nɛ a bu Yesu tsɔɔmi ɔmɛ tue. Níhi nɛ Yesu tsɔɔ ɔ tsuo je Baiblo ɔ mi, jã nɔuu nɛ e sa nɛ anɔkuale Kristofohi nɛ a pee.—Kane Luka 24:27.
2. Bɔ nɛ anɔkuale Kristofohi jeɔ suɔmi kpo ha
Yesu de e kaseli ɔmɛ ke: “Nyɛɛ suɔ nyɛ sibi kaa bɔ nɛ i suɔ nyɛ ɔ.” (Yohane 15:12) Mɛni Yesu pee kɛ tsɔɔ kaa e suɔ e kaseli ɔmɛ? E ná be kɛ ha mɛ, e wo mɛ he wami, nɛ jehanɛ ɔ se hu ɔ, e ye bua mɛ. E ngɔ e wami po kɛ sã afɔle kɛ ha mɛ. (1 Yohane 3:16) Anɔkuale Kristofohi ngɔɔ a munyu tutui, kɛ a ní peepee kɛ tsɔɔ kaa a suɔ a sibi, kaa bɔ nɛ Yesu pee ɔ.
3. Mɛni ní tsumi nɛ anɔkuale Kristofohi tsuɔ wawɛɛ?
Yesu ngɔ ní tsumi kɛ wo e kaseli ɔmɛ a de. “E tsɔ mɛ kaa a ya fiɛɛ Mawu Matsɛ Yemi ɔ” he sane kpakpa a. (Luka 9:2) Kristofohi nɛ a hi si ngɛ Yesu be ɔ mi ɔ fiɛɛ we ngɛ a jami he ɔmɛ pɛ kɛkɛ, mohu ɔ, a fiɛɛ ngɛ magbɛhi a nɔ kɛ nihi a wehi a mi. (Kane Ní Tsumi 5:42; 17:17.) Mwɔnɛ ɔ hu ɔ, anɔkuale Kristofohi fiɛɛɔ Baiblo ɔ mi anɔkuale ɔ kɛ haa nihi ngɛ he fɛɛ he. Akɛnɛ a ngɛ suɔmi kɛ ha ni kpahi he je ɔ, a kɛ bua jɔmi ngɔɔ a be kɛ a he wami kɛ fiɛɛɔ sɛ gbi nɛ ngɛ Baiblo ɔ mi nɛ haa nɛ nɔ náa hɛ kɛ nɔ fɔmi kɛ bua womi ɔ.—Maako 12:31.
MOO KASE BABAUU
Moo kase nɔ́ he je nɛ anɔkuale Kristofohi ngɛ slɔɔto ngɛ nihi nɛ a kɛ Yesu tsɔɔmi ɔmɛ tsu we ní, nɛ́ a nyɛɛ we e nɔ hyɛmi ní ɔmɛ a se ɔ a he.
4. A hlaa anɔkualehi nɛ ngɛ Baiblo ɔ mi ɔ
Kristofohi nɛ a hi si ngɛ Yesu be ɔ mi ɔ naa Mawu Munyu ɔ kaa e he jua wa
Pi nihi tsuo nɛ a tsɛɛ a he ke Kristofohi ɔ nɛ a bua jɔ Baiblo ɔ mi anɔkuale ɔmɛ a he. Mo je VIDEO ɔ, nɛ nyɛ susu sane bimi nɛ ɔ he.
-
Mɛni nɛ jami komɛ nɛ a tsɛɛ a he ke Kristofohi ɔ pee kɛ tsi nihi blɔ konɛ a ko kase níhi nɛ Yesu tsɔɔ ɔmɛ ɔ?
Yesu tsɔɔ nihi anɔkualehi nɛ ngɛ Mawu Munyu ɔ mi ɔ. Nyɛɛ kane Yohane 18:37 ɔ, nɛ nyɛ susu sane bimi nɛ ɔ he:
-
Kaa bɔ nɛ Yesu tsɔɔ ɔ, mɛni blɔ nɔ wa maa gu kɛ le Kristofohi nɛ a ngɛ “anɔkuale ɔ blɔ fa mi ɔ”?
5. A fiɛɛɔ anɔkualehi nɛ ngɛ Baiblo ɔ mi ɔ
Kristofohi nɛ a hi si ngɛ Yesu be ɔ mi ɔ fiɛɛɔ kɛ haa ni kpahi
Loko Yesu maa ho hiɔwe ya a, e ngɔ ní tsumi kɛ wo e se nyɛɛli ɔmɛ a dɛ, nɛ a ngɛ ní tsumi nɛ ɔ tsue kɛ ba si mwɔnɛ ɔ. Nyɛɛ kane Mateo 28:19, 20 kɛ Ní Tsumi 1:8 ɔ, nɛ nyɛ susu sane bimi nɛ ɔ he:
-
Jije a ma tsu fiɛɛmi ní tsumi ɔ kɛ ya su?
6. A hiɔ si ngɛ níhi nɛ a fiɛɛɔ ɔ nya
Mɛni lɛ ha nɛ nyumu ko nɛ a tsɛɛ lɛ ke Tom ná nɔ mi mami kaa e na anɔkuale Kristofohi ɔ? Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
Ngɛ video ɔ mi ɔ, mɛni he je nɛ Tom kɔni mi jɔ̃ ngɛ jami he ɔ?
-
Mɛni lɛ ha nɛ e ná nɔ mi mami kaa e na anɔkuale ɔ?
Wa ní peepee deɔ babauu ngɛ wa he pe wa munyu tutui. Nyɛɛ kane Mateo 7:21 ɔ, nɛ nyɛ susu sane bimi nɛ ɔ he:
-
Kaa bɔ nɛ Yesu tsɔɔ ɔ, mɛni he je nɛ e biɔ níhi fuu pe demi nɛ wa ma de kɛkɛ ke wa ngɛ e se nyɛɛe ɔ?
7. A suɔ a sibi
Kristofohi nɛ a hi si ngɛ Yesu be ɔ mi ɔ jeɔ suɔmi kpo kɛ tsɔɔ a sibi
Anɛ anɔkuale Kristofohi ngɔɔ a wami kɛ woɔ oslaa mi ngɛ a nyɛmimɛ Kristofohi a he niinɛ lo? Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
Ngɛ video ɔ mi ɔ, mɛni lɛ ha nɛ Lloyd ngɔ e wami kɛ wo oslaa mi kɛ ha Nyɛminyumu Johansson ɔ?
-
Ke o hyɛ ɔ, anɛ nɔ́ nɛ e pee ɔ maa nɔ mi kaa e ji anɔkuale Kristofo no lo?
Nyɛɛ kane Yohane 13:34, 35 ɔ, nɛ nyɛ susu sane bimihi nɛ nyɛɛ se nɛ ɔmɛ a he:
-
Kɛ Yesu se nyɛɛli nɛ a ji anɔkuale Kristofohi ɔ kɛ nihi nɛ a je ma kpahi a nɔ ɔ maa hi si ha kɛɛ?
-
Ke ta ba a, kɛ a maa pee a ní ha kɛɛ?
NI KOMƐ DEƆ KE: “Mawu kplɛɛ jamihi tsuo a nɔ.”
-
Mɛni ngmami o kɛ ma tsu ní kɛ tsɔɔ blɔ nɔ nɛ wa maa gu kɛ le anɔkuale Kristofohi?
NYA MWƆMI
Nihi nɛ a nyɛɛɔ Yesu se ɔ kɛ níhi nɛ Baiblo ɔ de ɔ tsuɔ ní, a jeɔ suɔmi nitsɛnitsɛ kpo, nɛ a fiɛɛɔ Baiblo ɔ mi anɔkuale ɔ.
Mi Nylɔmi
-
Mɛni nɔ nɛ anɔkuale Kristofohi ngɔɔ a hemi kɛ yemi kɛ daa?
-
Mɛni su nɛ a kɛ leɔ anɔkuale Kristofohi?
-
Mɛni ní tsumi nɛ anɔkuale Kristofohi tsuɔ?
NÍ KPAHI NƐ MAA YE BUA MO
Moo kase jami ko nɛ e mi bimɛ bɔɔ mɔde kaa a maa nyɛɛ Yesu Kristo nɔ hyɛmi ní ɔmɛ a se, nɛ́ a bɔɔ mɔde hu kaa a kɛ e tsɔɔmi ɔmɛ ma tsu ní ɔ a he ní fuu.
Moo hyɛ nɔ́ nɛ ye bua Roma sista ko nɛ e ba ná “mumi mi weku nitsɛnitsɛ ɔ.”
“A Je Ngmami ɔ Mi Kɛ Ha Ye Sane Bimi Ɔmɛ Tsuo A Heto!” (Hwɔɔmi Mɔ ɔ mi munyu)
Moo kase bɔ nɛ anɔkuale Kristofohi jeɔ suɔmi kpo kɛ tsɔɔ a nyɛmimɛ Kristofohi nɛ́ a hia yemi kɛ buami ɔ ha.
Moo kase níhi nɛ Kristofohi nɛ a hi si blema a pee, kɛ níhi nɛ anɔkuale Kristofohi nɛ a ngɛ mwɔnɛ ɔ ngɛ pee nɛ tsɔɔ kaa a ji Yesu se nyɛɛli nitsɛnitsɛ ɔ he ní.
“Mɛni Níhi Nɛ A Kɛ Leɔ Anɔkuale Kristofohi?” (Hwɔɔmi Mɔ, March 1, 2012)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
