PONJI MIR 18
Kite ma wacopo ng’iyo ko Jukristu mandha
Dhanu ma dupa dit gilwong’iri nia gitie Jukristu. Ento yiyoyic, ponji man timo migi ulund urombo ngo i kindgi. Dong’ wacopo ng’iyo Jukristu mandha nenedi?
1. Jukristu mandha tie jukani?
Jukristu mandha tie ju ma gibelubo Yesu. (Som Tic mi Jukwenda 11:26.) Ang’o ma romo nyutho kamaleng’ nia gitie julub pare mandha? Yesu uwacu kumae: “Tek wubedo i lembe para, nwang’u wutie julubna andha.” (Yohana 8:31) Eno nyutho nia Jukristu mandha gicikiri niworo kunoke nilubo ponji pa Yesu cuu mandha. Yesu ubed uketho ponji pare zoo ujengere iwi Lembagora. Kumeno bende, Jukristu mandha gicikiri niketho yiyoyic ku ponji migi ceke ujengere iwi Biblia.—Som Luka 24:27.
2. Jukristu mandha ginyutho mer
Yesu uyero ni julub pare kumae: “Wumeruru i kindwu tap calu ma an de amaruwu.” (Yohana 15:12) Yesu unyutho nenedi nia emaru julub pare? Ebed ebedo kugi, etielo cwinygi, man ekonyogi. Emiyo kadok kwo pare ngi pigi. (1 Yohana 3:16) Calu mer ma Yesu unyutho, mer mi Jukristu mandha bende utie ngo kende kende mer ma wi lak kadi ma ku dhok. Ento ginyutho ku wec man timo migi nia gimariri andhandha i kindgi.
3. Jukristu mandha gitimo tic ma kani?
Tic utie ma Yesu umiyo ni julub pare. “Eorogi gicidh girwey pi Ker pa Mungu.” (Luka 9:2) Jukristu mi rundi ma kwong’a gibed giponjo dhanu, ungo kende kende kaka ma gicokiri i iye pi niworo Mungu, ento bende kaka ma dhanu bepong’ i iye man i pacu mi dhanu. (Som Tic mi Jukwenda 5:42; 17:17.) Tin bende, Jukristu mandha girweyo lemandha mi Biblia kaka moko ci ma dhanu ubenwang’iri i iye. Gimaru dhanu wagi lee mandha, uketho gitiyo ku saa man kero migi ku mutoro pi ninyutho igi lemkwenda mi Biblia ma miyo genogen man ma juko cwinyjo.—Marko 12:31.
MED NYANG’ PERI
Wakenen kawoni kite m’iromo ng’iyo ko Jukristu mandha kud i kind ju m’ubelubo ngo ponji man lapor pa Yesu.
4. Giyenyo lemandha i Biblia
Jukristu mi rundi ma kwong’a gibed giyaru i Lembe pa Mungu
Dhanu moko giloko nia gitie Jukristu, ento gilund giyenyo ngo lemandha i Biblia man gitiyo de ngo kude. Nen VIDEO, man i ng’eye wuwec iwi penji m’ulubo e:
-
Kanisa moko ma giloko nia gitie Jukristu gicero dhanu nenedi ku ng’eyo lembe ma Yesu uponjo?
Yesu uponjo lemandha m’uai i Lembe pa Mungu. Som Yohana 18:37, man i ng’eye wuwec iwi penji m’ulubo e:
-
Nimakere ku lembe ma Yesu uyero, wacopo ng’iyo nenedi Jukristu ma gitie “i thenge mi lemandha”?
5. Girweyo lemandha m’uai i Biblia
Jukristu mi rundi ma kwong’a gibed girweyo lembanyong’a ni dhanu mange
I wang’ dok i polo, Yesu umiyo ni julubne tic moko m’ubemedere asu nitundo tin eni de. Som Matayo 28:19, 20 man Tic mi Jukwenda 1:8, man i ng’eye wuwec iwi penji m’ulubo e:
-
Yesu uyero nia jubirweyo nitundo awene man nitundo kani?
6. Gitimo calku lembe ma gibeponjo
Ang’o m’uketho cwiny jalwo moko ma nyinge Tom ubino tek nia edaru nwang’u dini mandha? Nen VIDEO, man i ng’eye wuwec iwi penji m’ulubo e:
-
I video maeni, lembang’o m’uketho Tom ukeuweko lemb dini?
-
Ang’o m’udwoko cwinye tek nia edaru nwang’u lemandha?
Lembayera cogone mbe; kwayu timo de ubed unuti. Som Matayo 7:21, man i ng’eye wuwec iwi penji m’ulubo e:
-
I kind lembe ma wabeyero ku ma wabetimo, ma kani ma foyo i Yesu nisagu?
7. Gimariri i kindgi
Jukristu mi rundi ma kwong’a gibed ginyutho mer i kindgi
Nyo Jukristu mandha gidaru ketho kwo migi i ariti pi juwagi de? Pi ninyang’, nen VIDEO, man i ng’eye wuwec iwi penji m’ulubo e:
-
I video maeni, ang’o m’ucwalu umego Lloyd niketho kwo pare i ariti pi nibodho umego Johansson?
-
Nyo eno tie ngo timo mi Jukristu mandha? Kekor.
Som Yohana 13:34, 35, man i ng’eye wuwec iwi penji m’ulubo e:
-
Nimakere ku verse maeni, julub mandha pa Yesu kunoke Jukristu mandha, gicikiri ninyutho ang’o ni dhanu mi rangi kunoke mi ng’om mange?
-
Giromo timo kumeno nenedi i saa mi lwinyi?
DHANU MOKO BEYERO KUMAE: “Dini ceke m’uyiyo Yesu man m’ubelwong’o nyinge ci tie dini mandha.”
-
Icopo tiyo ku verse ma kani pi ninyutho ni ng’atu m’ubeyero kumeno nia lembe moko nuti m’ubekwayere i bang’ Jukristu mandha?
I ADUNDO
Jukristu mandha gilubo lembe ma Biblia ubeponjo, ginyutho mer mandha i kindgi, man girweyo lemandha mi Biblia.
Penji mi poyowic
-
Ponji man yiyoyic mi Jukristu mandha ucikere nijengere iwi ang’o?
-
Jung’iyo Jukristu mandha nwang’u gibenyutho ang’o?
-
Jukristu mandha gitimo tic ma kani?
TIM SAYUSAC
Kepim ninyang’ lee iwi dini m’ubetimo kero nilubo lapor man ponji pa Yesu kubang’e kubang’e.
Nen gin m’ucwalu mama moko mi katholiki niyenyo “wedi mandha mi tipo.”
Nen kite ma Jukristu mandha ginyutho ko mer ni Jukristu wagi ma peko ma rek uwok i wigi.
Wakonyo umego mwa saa ma peko ma rek uwok i wigi—Thenge (3:57)
Nen ayi ma Jukristu mandha mi rundi ma tin gibelubo ko lapor mi Jukristu mi rundi ma kwong’a pilembe gibetimo tap lembe ma Yesu uyero nia jubing’iyo ko julub pare.
“Juromo ng’iyo Jukristu mandha nenedi?” (Otkur ma Wiw, nindo 1, dwi mir 3, 2012)
