SAKA 18 FEDENGAN
Sasamaan Mihapinang to Soˈlinay a Krisciyang?
Itini tonini a hekal ˈalomanˈalomanay a tamdaw misao Krisciyangay. Kawra o pasoˈlinan nangra a kimad cowa ka hecahecad, o palinian no waywayan nangra cowa ka hecad. Soˈlinay cangra mikotod ci Yisan han? Sasamaan kita ngaˈ mahapinang ko soˈlinay a Krisciyang hani?
1. O Krisciyang hananay o masamaanay hani?
O Krisciyang hananay i, o mikotoday ci Yis Kristoan a tamdaw, o nisawawaan ningra. (ˈOsien ko Dmak 11:26.) Sasamaan ko tamdaw misawacay to nisawawaan ni Yis ko niyah hani? Sanay ci Yis: ‘Ano mararid kamo midoedo to sowal ako midemak i, o soˈlinayto a nisawawaan ako.’ (Yohani 8:31) O tatodong no sowal ni Yis i, o soˈlinay a Krisciyang o mamidofdof to sapasifanaˈ ningra. Misalalangiay ci Yis to Fangcalay Cudad pasifanaˈ to tamdaw, malecaday, o pihakelongan no Krisciyang mamisalalangian to Fangcalay Cudad.—ˈOsien ko Luka 24:27.
2. O soˈlinay a Krisciyang sasamaan paihkal to olah?
Palimoˈotan ni Yis ko nisawawaan: ‘Masasiolah kamo, samatiyaen o nika olah ako i tamowanan’ sanay. (Yohani 15:12) Samaanay ci Yis paihkal to olah i nisawawaan hani? Marariday cingra kalacafay cangranan, pakalalok cangranan, padama cangranan, hanaca pakayni cangranan kinafalah to ˈorip no niyah. (1 Yohani 3:16) Malecaday, o soˈlinay a Krisciyang cowa ka tano sowal aca eca ka pidemak, tatano waywayan paihkal to nika masasiolaolah nangra.
3. O soˈlinay a Krisciyang mamisamacay to maanan a tayal?
Patorodan ni Yis ko nisawawaan to cecay a tayal, ‘ocoren ningra cangra papitenak to Hongti Kitakit no Kawas.’ (Luka 9:2) Salakatay a Krisciyang cowa ka itini aca i pidokoan to Kawas a kitiraan mitosil, tayraayho i kaˈalomanan ato pakalomalomaˈan a mitosil. (ˈOsien ko Dmak 5:42; 17:17.) Anini, o soˈlinay Krisciyang mihaenay ko demak, icowa ko tamdaw tayraay cangra mitosil to kimad no Fangcalay Cudad. Maolahay cangra to tamdaw, mansa makahi pasadak to toki ato ˈicel paladaˈ to lihaf no Fangcalay Cudad, pafeli i tamdaw to sahinom ato hatokel.—Marko 12:31.
CALEPEN MIKADKAD
Dotoc mamananam iso: O maanan ko kasasiroma no soˈlinay a Krisciyang atoya cowa pitoor to taˈarawan ni Yis, ato cowa pitengil to sapasifanaˈ ningra a tamdaw?
4. Mikilimay a mikadkad cangra to soˈlinay kimad no Fangcalay Cudad
Isalakatay a Krisciyang misalimlaay to Fangcalay Cudad o sowal no Kawas
O misao Krisciyangay a tamdaw cowa ka sahto sa o misaaretengay to kimad no Fangcalay Cudad. Nengnengen ko IKA, ikor lengoen ko ilaenoay a salicay:
-
O romaroma Kristokiyo a kalodoyongan samaanay miliyas to sapasifanaˈ ni Yis?
Pasifanaˈay ci Yis to soˈlinay kimad no Fangcalay Cudad i tamdaw. ˈOsien ko Yohani 18:37, ikor lengoen ko ilaenoay a salicay:
-
Mikitini i sowal ni Yis, ‘o micadaay to soˈlinay kimad’ a Krisciyang mamisamaan ko pidemak nangra?
5. Mitenakay cangra to soˈlinay kimad no Fangcalay Cudad
Isalakatay a Krisciyang mitosilay to tamdaw
ˈAyaw no tatayra ci Yis i kakarayan pafelian ko nisawawaan to cecay a ˈinorong. Aniniay a Krisciyang padadotocay milahci tonini a ˈinorong. ˈOsien ko Matay 28:19, 20 ato Dmak 1:8, ikor lengoen ko ilaenoay a salicay:
-
Mitosilay a tayal papadadotoc tahacowa a tatokian? Hahakowa ko nika kakahad?
6. Misakadademakan nangra ko soˈlinay kimad no Fangcalay Cudad
O cecay ci Tomas hananay a faˈinayan, samaanay misapinang to mahelaayto no niyah ko soˈlinay a Kristokiyo? Nengnengen ko IKA, ikor lengoen ko ilaenoay a salicay:
-
Itini i ika, o maanan a demak no pihakelongan ko patoleday ci Tomasan?
-
Hano masapinang ningra to mahelaayto no niyah ko soˈlinay kimad?
Marariday ko tamdaw pasowal, aka o sowal aca o noka pidemak ko ngaˈay sanay. ˈOsien ko Matay 7:21, ikor lengoen ko ilaenoay a salicay:
-
O roma tamdaw i ngoyosay aca ko pihakelongan, o roma tamdaw tano waywayan paihkal to pihakelongan no niyah. O harateng iso masamaanay a pidemak ko mihaydaan ni Yis?
7. Masasiolaolahay cangra
Isalakatay a Krisciyang masasiolaolah cangra
O Krisciyang soˈlinay caay pisikol to katalawan no ˈorip a midipot to romaroma a Krisciyang han? Nengnengen ko IKA, ikor lengoen ko ilaenoay a salicay:
-
Itini i ika, hano makahi ci Laway Lihewayte misiˈayaw to katalawan no ˈorip midipot to salikaka ci Yohansengan?
-
Mikitini tora demak ningra, mahapinangay iso o soˈlinay a Krisciyang cingra han?
ˈOsien ko Yohani 13:34, 35, ikor lengoen ko ilaenoay a salicay:
-
O soˈlinay a Krisciyang samaanay micada to romaroma kitakit ato finacadan a tamdaw?
-
Itini kalaloodan i, wa misamaan cangra midofdof to sowal ni Yis a midemak?
ANO IRA KO SOMOWALAY: “O Krisciyang ko niyah sanay ko roma tamdaw, kawra o waywayan nangra ikakaay ko nika tatiih to cowa ka pihakelong a tamdaw. O pinengneng ako to pihakelongan nangra awaay ko kangaˈayan.”
-
Sapadamaaw tora tamdaw mihapinang to soˈlinay a Krisciyang, o manan a sinael ko sakadademaken iso?
KALIMLAAN
O soˈlinay Krisciyang mamidoedo to sapasifanaˈ no Fangcalay Cudad i kaˈorip, paihkal to cowa pisateked a olah, patenak to soˈlinay kimad no Fangcalay Cudad i tamdaw.
Lomalen
-
O pihakelongan no soˈlinay a Krisciyang misalalangiay to maanan?
-
O soˈlinay a Krisciyang iraay ko masamaanay a capeling?
-
O soˈlinay a Krisciyang misamacayay to maanan a tayal?
MALALITINGAY A LALAKAW
Tayni mafanaˈ to cecay kasacefang, o taˈarawan nangra ci Yis, misaˈicelay midoedo to sapakafanaˈ ningra i kaˈorip.
Nengnengen ko cecay na mala siwniay a tamdaw samaanay mahela ningra ko soˈlinay midoko to Kawas a kasacefang.
“Mafanaˈay Cangra Tano Fangcalay Cudad Pacaˈof to Polong a Salicay Ako” (Mikecolay, 2014/4/1)
Nengnengen o soˈlinay a Krisciyang samaanay pasayra i tahapadesay a salikaka paihkal to olah.
Mikitini i sowal ni Yis, o soˈlinay mikotod cingranan a tamdaw iraay ko maanan a tahapinangan? Nengnengen ko isalakatay Krisciyang ato aniniay soˈlinay a Krisciyang samaanay matatodong tonini a tahapinangan.
“Soˈlinay Krisciyang Iraay ko Maanan a Tahapinangan?” (Mikecolay, 2012/3/1)
