Snonggaku ḇebor sya sap si ḇe snonggaku Kristen. Fama, roi sikyar na naḇesisye, oroḇaido moḇ sikenem raya namnis kam ḇa. Inja moḇsa na kofawi pyum manseiso snonggaku Kristen ḇekaku ya rai?

1. Snonggaku Kristen kyur ḇe mansei?

Snonggaku Kristen siso manfamyan, ḇaido ḇeso kaku Yesus Kristus i sya. (Kowasya Farfyar 11:26.) Moḇsa snonggaku ḇeradine sya sfasnai sima Yesus manfamyan ḇyesirya? Yesus ikofen radine, ”Rofyor mkokin nako wos ayena, rarirya mkoḇe manfamyan kaku ḇe aya.” (Yohanes 8:31) Inja, snonggaku Kristen ḇekaku sima sisouser Yesus farkarkor ḇyena. Farkarkor Yesus byukifarkor snonggaku sya neknam ro Refo ya, inja ḇeso kaku Yesus i sya roi sikyar na neknam ro Refo ya kako.​—Kowasya Lukas 24:27.

2. Moḇsa snonggaku Kristen ḇekaku sya sfasnai saswar ya rai?

Yesus iwan manfamyan ḇyesi bo doḇe, ”Mkoswar yae mko, raris moḇ yaswar mko raya.” (Yohanes 15:12) Rosai Yesus ifrur kwar fa byukifasnai ima iswar kaku manfamyan ḇyesi? Byuk swaf fa kyainus si, syambraḇser si, ma ifnoḇek si. Ḇepyum syadi wer iso byuk kenem ḇyedi fa imarwarek si. (1 Yohanes 3:16) Raris Yesus i, snonggaku Kristen ḇekaku sya sima sawos saswar ya ro swadon monda ḇa, mboi sfasnai saswar sena ro rosai sifrur na.

3. Fararur rosaiso Yesus iwan faro ḇeso kaku i sya fa sifrur na?

Yesus byuk fararur ḇe manfamyan ḇyesi. Refo ya doḇe, ’Iwan si fa sbaryas Karajan Allah.’ (Lukas 9:2) Snonggaku Kristen ḇero abad randak siwara, sbaryas ro moḇ seari ro na, ro moḇ kawasa sibor sisya ro ya, ma ro rum ḇe rum. (Kowasya Farfyar 5:42; 17:17.) Ro baboine kako, snonggaku Kristen ḇekaku sya sakbaryas kakaku ro Wos Refo ya faro snonggaku ḇero moḇ sairirya kam. Sima siswar snonggaku ḇesesya, naiso eḇewari simarisen sbuk swaf ma samarawraw sena fa sra sbaryas angginem ro Refo faro si. Sifawi angginem ro Refo nane nbuk sneprei ma saneraro faro snonggaku ḇese.​—Markus 12:31.

 SWEWAR KAKU WER

4. Sisewar fa sifawi kakaku ro Wos Refo ya

5. Sbaryas kakaku ro Wos Refo ya

 6. Sifrur kaku raris rosai sikofen na

Rosai ḇefrur fa snon oso ḇenir ḇe Tom, ikyar kaku isrow snonggaku Kristen ḇekaku sya kwar? Komam VIDIO, raimnai kawos fakfuken na.

• Ro vidio insanja, rosai ḇefrur fa Naek Tom ikyar faro agama na wer ḇa?

• Rosai ḇefnai fa ikyar kaku isrow snonggaku ḇeso kaku Yesus i kwar?

Roi kofrur na napyum syadi ro rosai kawos ro swadon monda. Kowasya Matius 7:21, raimnai kawos fakfuken ine:

• Yesus myam roi ḇefandun syadi iso, kawos ro swadon monda bo koḇe kokyar ke, kofasnai na ro rosai kofrur na?

7. Sima siswar snonggaku ḇese

• Rosai Yesus manfamyan ḇyesi (snonggaku Kristen ḇekaku sya) sifrur yoḇ snonggaku ḇeraker keret ḇaido er ḇese?

• Moḇsa siso anun nane ro fafisu mamun ya isya?

 FARKARKOR ḆYENA

Snonggaku Kristen ḇekaku sima sisouser rosai Refo ikofen na, sfaḇri manggunsi ḇa mboi siswaryae si, ma sbaryas kakaku ḇero Wos Refo faro snonggaku ḇese.

Waswarepen Kaḇer

• Snonggaku Kristen ḇekaku sima roi sikyar na neknam ro?

• Rari ḇepyum risai snonggaku Kristen ḇekaku sya sfasnai na?

• Fararur rosaiso snonggaku Kristen ḇekaku sya sifrur na?