CƐ̃́Ɛ́-ÐƐ̀ 18
Kà Nyɔ Ké Jàà Kɛ́ɖɛ́ì Ðeín-Sí-Nyɔ̀ Ɓè Dyí Dyuòɛ̀ Nyuɛ
Nyɔ ɓáún-ɓáún ɖá wa mɔ̀ Kɛ́ɖɛ́ì ɖeín-sí-nyɔ̀ ɓè. Kɛɛ, wa séín se ɖɛ dyúáɖòɔ̀ jàà po, ké wa se fɔ̀nɔ̀-hwòɖò dyúáɖòɔ̀ kíɖíí sí. Nìí, à ɓɛ́ìn jàà Kɛ́ɖɛ́ì ɖeín-sí-nyɔ̀ ɓè dyí dyuòɛ̀ɛ̀?
1. Nyɛ́ mɔ̀ Kɛ́ɖɛ́ì ɖeín-sí-nyɔ̀ kɛ́?
Kɛ́ɖɛ́ì ɖeín-sí-nyɔ̀ ɓè mɔ̀ nyɔ ɓè ɓɛ́ wa nà Jízɛ̀ Kɛ́ɖɛ́ì ɖeín mɔɔ wa sí ɔ kíɖííɛ. (Zà Àpɔ́sò 11:26 wuɖuún.) Xwɛ̀ wa nyuɛ tɛ̀mɛ̀ìn kà wa mɔ̀ Jízɛ̀ɛ̀ ɖeín-nà-nyɔ̀ ɓèɛ́? Jízɛ̀ cɛ̃ɛ ma, ké ɔ ɖá: “Ɓè dyi ní wuɖu ɓèɔ̀ nyuín, nìí, ɓè mɔ̀ ní ɖeín-nà-nyɔ̀ ɓè jɛ́ɛ́.” (Jɔ̃́ɔ́ 8:31) Ɔ xwíníín mɔ̀, jàà Kɛ́ɖɛ́ì ɖeín-sí-nyɔ̀ ɓè ɓéɖé ɓɛ́ wa ké Jízɛ̀ɛ̀ tɛ̀mɛ̀ìn-ɖɛ̀ ɓèɔ̀ kíɖíí sí. Kà Jízɛ̀ɛ̀ tɛ̀mɛ̀ìn-ɖɛ̀ ɓèɔ̀ ɓá ma Baɓoɔ dyíɛɛ, kàà jàà Kɛ́ɖɛ́ì ɖeín-sí-nyɔ̀ ɓèɛ̀ jàà-po-ɖɛ̀ ɓè ɓá Baɓoɔ dyí.—Zà Ðúù 24:27 wuɖuún.
2. Xwɛ̀ jàà Kɛ́ɖɛ́ì ɖeín-sí-nyɔ̀ ɓè nyu ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn nyɛ́?
Jízɛ̀ cɛ̃ɛ ma ɔ ɖeín-sí-nyɔ̀ ɓèɔ̀ gbo, ké ɔ ɖá: “Ɓè mɛ ɖɛɓɛìn ɖɛ̀ɓɛ̀ìn mú kà ḿ ɖɛ̀ɓɛ̀à ɓè múɛ.” (Jɔ̃́ɔ́ 15:12) Xwɛ̀ Jízɛ̀ nyuɛ ma tɛ̀mɛ̀ìn kà ɔ ɖɛ̀ɓɛ̀ ma ɔ ɖeín-nà-nyɔ̀ ɓèɔ̀ múɛ́? Ɔ kè wa kè hwèɖè ma da, ké ɔ po ma wa kpéí, ké ɔ kpá ma wa gbo. Ɔ tò ma ɔ fɛ̀ɛ̀ɔ̀ ɓó wa bìì ɖekè. (1 Jɔ̃́ɔ́ 3:16) Kà dyúáɖòɔ̀ kàà, jàà Kɛ́ɖɛ́ì ɖeín-sí-nyɔ̀ ɓè ní cɛ̃ ɖɛ̀ɓɛ̀ìn-ɖɛ̀ɓɛ̀ìn jè wĩín dyi pu. Wa tɛ̀mɛ̀ìn kà wa ɖɛɓɛìn ɖɛ̀ɓɛ̀ìn múɛ dyììn ɖé waà wĩín-wùɖù kè waà nyuu-ɖɛ̀ ɓè mú.
3. Ðɛ́ mɔ̀ kũ̀à ɓɛ́ jàà Kɛ́ɖɛ́ì ɖeín-sí-nyɔ̀ ɓè vòìn múɛ́?
Jízɛ̀ nyí ma ɔ ɖeín-nà-nyɔ̀ ɓèɔ̀ kũ̀à. “Ɔ ɖoɓo ma wa, ɓɛ́ wa ké ma Geɖepɔɔ kã́á-ɓòɖòɔ̀ jè zio po.” (Ðúù 9:2) Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ se ma Geɖepɔɔ-wùɖùɔ̀ wáɖá ɖé waà ɓiè-naín ɓèɔ̀ ɖòùn pu, kɛɛ wa wáɖáa ma ɖé dà tɔ̀ɔ̀ ɓè kè ɖé nyɔ ɓè ɓíɖí-taún. (Zà Àpɔ́sò 5:42; 17:17 wuɖuún.) Kà dyúáɖòɔ̀ kàà, jàà Kɛ́ɖɛ́ì ɖeín-sí-nyɔ̀ ɓè nì zɛ̃̀ɛ̀ kɛɛ cɛ̃ Baɓoɔ jàà-wùɖù ɓè ɖé dà séín wa ɓɛ́ìn nyɔ ɓè dyéɛ kɛ. Wa ɖɛ̀ɓɛ̀ wa mùè ɓè mú. Ɔ jèɛɛ, wa nyùìn wa ti kè gana kũ̀à mú, ɓɛ́ wa ké bɔ̃̀ sɔ̀ìn ɖé Baɓoɔ mú ɓá hwòɖò-kɔ̃-dè-ɖɛ̀ kè hwòɖò-dyi-dè-ɖɛ̀ jè dyíɛɛ dyi ɓèìn.—Máà 12:31.
ÐE ÐƐ MÚIN CÁ
Cɛ̃́ kà jàà Kɛ́ɖɛ́ì ɖeín-sí-nyɔ̀ ɓè nyu kòɛ̀ ɓó nyɔ ɓè seà Jízɛ̀ɛ̀ tɛ̀mɛ̀ìn-ɖɛ̀ ɓèɔ̀ kè ɔ nyuu-ɖɛ̀ ɓèɔ̀ kíɖíí síɛ gboɛɛ jè.
4. Wa mɔ́ Baɓoɔ jàà-wùɖù ɓè dyi
Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ dyé ma Geɖepɔɔ Wuɖuɔ̀ kpéín
Nyɔ ɓè ɓɛ́ wa ɖá wa mɔ̀à Kɛ́ɖɛ́ì ɖeín-sí-nyɔ̀ ɓèɛɛ ɖíɛ́ ɓè poɛ̀n hwìɖìi kà ɔ se ɖɛ kpa ɓɛ́ nyɔ ké Baɓoɔ jàà-wùɖù ɓè múin wɔ̃́ mɔɔ nyɔ ké wa kíɖíí síɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ koà ɓó dyíɛɛ dɔ́ɔ́ kɔ̃in dèìn.
-
Ðɛ́ cɔ́cì ɖíɛ́ ɓè ɓɛ́ wa ɖáìn wa mìɔùn Kɛ́ɖɛ́ì ɖeín-sí-nyɔ̀ ɓèɛɛ ɖà nyu ɓɛ́ nyɔ ɓè ké se Jízɛ̀ɛ̀ tɛ̀mɛ̀ìn-ɖɛ̀ ɓèɔ̀ cɛ̃́ kɛ́?
Jízɛ̀ tɛ̀mɛ̀ìn ma jàà sɔ̀ìn ɖé Geɖepɔɔ wuɖuɔ̀ múɛ. Zà Jɔ̃́ɔ́ 18:37 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Kà Jízɛ̀ nyuà cɛ̃ɛ kɛɛ, xwɛ̀ à ɓɛ́ìn Kɛ́ɖɛ́ì ɖeín-sí-nyɔ̀ ɓè ɓɛ́ wa “mɔ̀ jàà-nyɔ̀ kɛɛ” dyí dyuòɛ̀ kɛ́?
5. Wa cɛ̃ Baɓoɔ jàà-wùɖù ɓè
Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ wáɖá ma Geɖepɔɔ Wuɖuɔ̀ nyɔ tɔ̀ɔ̀ ɓè gbo
Hwɛ̀ ɓɛ́ Jízɛ̀ ké ma dyɔún muɛɛ, ɔ nyí ma ɔ ɖeín-sí-nyɔ̀ ɓèɔ̀ kũ̀à ɖò ɓɛ́ ɔ nì dyúa muɛń ke zɛ̃̀ɛ̀ kɛ. Zà Máfíò 28:19, 20 kè Àpɔ́sò 1:8 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Dɛ̀ wuɖu-wáɖá-kũ̀àɔ̀ mu nyiniìn nyɛ́, ké ɔ jĩ̀ xwɛ̀ wa mu nyuùn wɛ̃́?
6. Wa nyu ɖɛ wa cɛ̃ɛ
Ðɛ́ nyu ké gàa ɖò kɔ̃̀ nyɛ́nɛ́ mɔ̀ Tɔ̃ɔ kɛɛ poɛ ma jàà kà ɓɛ́ ɔ ɖà ma jàà ɓiè-ɓiè dyéɛ́? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè koà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ nyu ké Tɔ̃ɔ sa ma kà ɓiè-kpòò jè dyíɛ́?
-
Ðɛ́ nyu ké ɔ poɛ ma jàà kà ɓɛ́ ɔ ɖà ma jààɔ̀ dyé kɛ́?
Ðɛ ɖòɛ̀ nyu-nyu kpa ɖɛ ké ɔ ziɛ cɛ̃-cɛ̃ dyí. Zà Máfíò 7:21 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðɛ́ kpa ɖɛ mìɔ ɖé Jízɛ̀ gboɛ́—ɔ mɔ̀ ɖɛ à ɖá à po jàà kɛɛ̀ mɔɔ ɔ mɔ̀ ɖɛ à tɛ̀mɛ̀ìn ɖé à nyuu-ɖɛ̀ ɓè múɛɛ̀?
7. Wa ɖɛɓɛìn ɖɛ̀ɓɛ̀ìn mú
Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ ɖɛɓɛìn ɖɛ̀ɓɛ̀ìn ma mú
Kɛ́ɖɛ́ì ɖeín-sí-nyɔ̀ ɓè ɖà nàdì dyí dyé ɓó wa mùè Kɛ́ɖɛ́ì ɖeín-sí-nyɔ̀ ɓè jè cáà? Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ koà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ nyu ké Ðɔwɛ́ táìn ma kà mɛ́ɛ ɓó Ðíí-gàà Jòhã́sĩ̀ìn jè kɛ́?
-
Nì hwòɖò ɖá ɖɛ ɔ nyu ma kà kɛɛ hwɔìn ma Kɛ́ɖɛ́ì ɖeín-sí-nyɔ̀ɛ̀ nyuu-ɖɛ̀ɛ̀?
Zà Jɔ̃́ɔ́ 13:34, 35 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Xwɛ̀ Jízɛ̀ɛ̀ ɖeín-nà-nyɔ̀ (mɔ̀à jàà Kɛ́ɖɛ́ì ɖeín-sí-nyɔ̀ ɓèɛɛ) mu nyɔ-dù mɔɔ ɓóɖó-dù kà kò ɖòɛ̀ nyɔ ɓè kpɔ̃ɔ nyuùn wɛ̃́?
-
Xwɛ̀ wa muɛ náa nyuùn ɓó to-vɔ̃-tììn nyɛ́?
NYƆ ÐÍƐ́ ƁÈ ÐÁ: “Kɛ́ɖɛ́ì ɖeín-sí-nyɔ̀ ɓè ɖà hwòɖò-kɔ̃in-nyìnììn-ɖɛ̀ ɓè nyu —nìí, xwɛ̀ wa ɓɛ́ìn jàà ɓiè-ɓiè ɓéɖéɛ kɛ́?”
-
Baɓo vɔ̀sìɔ̀ nyɛ́ m̀ ɓɛ́ìn jè cɛ̃ɛ, ɓɛ́ ɔ tɛ̀mɛ̀ìn kà nyɔ ɓɛ́ìn jàà Kɛ́ɖɛ́ì ɖeín-sí-nyɔ̀ ɓè dyí dyuòɛ̀ kɛ́?
SṸÌN-XWÍNÍÍN
Jàà Kɛ́ɖɛ́ì ɖeín-sí-nyɔ̀ ɓè sí Baɓoɔ tɛ̀mɛ̀ìn-ɖɛ̀ ɓè kíɖíí, ké wa tɛ̀mɛ̀ìn jàà ɖɛ̀ɓɛ̀ìn-ɖɛ̀ɓɛ̀ìn, ké wa cɛ̃ Baɓoɔ jàà-wùɖù ɓè.
Ðɛ-kɔ̃in-kpa-kpa
-
Jàà Kɛ́ɖɛ́ì ɖeín-sí-nyɔ̀ ɓèɛ̀ jàà-po-ɖɛ̀ ɓè ɓá ɖɛ́ dyíɛ́?
-
Ðɛ́ mɔ̀ kpeɖe ɓɛ́ ɔ dè jàà Kɛ́ɖɛ́ì ɖeín-sí-nyɔ̀ mɛ kɛ́?
-
Ðɛ́ mɔ̀ kũ̀à ɓɛ́ jàà Kɛ́ɖɛ́ì ɖeín-sí-nyɔ̀ ɓè nyu kɛ́?
CƐ̃́ ÐƐ PÀÐÀ
Cɛ̃́ nyɔ ɓè ɓɛ́ wa vɔ̃ ɓɛ́ wa ké Jízɛ̀ɛ̀ kpeɖe ɓè kè ɔ tɛ̀mɛ̀ìn-ɖɛ̀ ɓè kíɖíí síɛɛ jè.
Dyé ɖɛ nyu ké Kíáɖè-màà ɖò dyé ma “xwéɖé-dù ɖò mɔ̀ jàà Kɛ́ɖɛ́ì ɖeín-sí-nyɔ̀ ɓèɛ” da kɛ.
Dyé kà jàà Kɛ́ɖɛ́ì ɖeín-sí-nyɔ̀ ɓè nyu waà mùè jàà-po-nyɔ̀ ɓè ɓɛ́ wa mɔ́ gbo-kpá-kpá kɛɛ ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛ.
À Ðíí Ɓèɔ̀ Gbo-Kpá-Kpá Ɔ jù Ké Gà-Ðɛ̀ Ðò Dyi Kpáín—Wáká-Ðò (3:57)
Cɛ̃́ kà ɖɛ Jízɛ̀ ɖá ɔ mu ma ɔ ɖeín-sí-nyɔ̀ ɓèɔ̀ dyí-dyuòìn-bɛ̃̀ jùùn wɛ̃ɛ nyu Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ kè jàà Kɛ́ɖɛ́ì ɖeín-sí-nyɔ̀ ɓè nì kàùn wɛ̃ɛ mɛ dèɛ̀ kɛ.
