ARUFUDAHANI 18
Ida luba wasubudiruni kátaña lan kristiánugu inarünibaña?
Lau sun ariñaga hamá saragu míñunu gürigia kristiánugu lan hagía, ámuñegueinarügüti hafiñen ani mafalarun hamuti ligiaméme lúrudu lidan habagari. Ligíati, ida luba wasubudiruni kátaña lan kristiánugu inarünibaña?
1. Ka mini lubéi kristiánu lan inarüniti aban gürigia?
Lani Kristu disipulugu kristiánugu (aliiha huméi Adügaü 11:26). Ida liña harufuduni kristiánugu lani lan Hesusu disipulugu hagía? Ariñagati Hesusu: “Anhaün agunfulira lau nererun, hiábinba lun nani humá disipulugu le tímatimaati” (Huan 8:31). Mini lan le mosu lan gaganbadi hamá kristiánugu inarünitiña lun le larufudahabei. Súnwandan meha larufudahani Hesusu le tariñagubei Bíbülia, ligiaméme giñe hadügübei lani disipulugu (aliiha huméi Lúkasi 24:27).
2. Ida liña harufudun kristiánugu inarünitiña ínsiñeni?
Ariñagati Hesusu houn lani disipulugu: “Anihán nugumadinbei: Lun hínsiñegua humá hungua kei hínsiñe nun” (Huan 15:12). Ida liña larufuduni Hesusu hínsiñe hamá lani disipulugu lun? Sügüti meha dan hama, ruti dǘgüdaguaü houn ani íderagua lumutiña. Ru lumuti giñe libagari hawagu (1 Huan 3:16). Mama ayanuharügütiña kristiánugu inarünitiña luagu ínsiñeni, arufuda hamuti giñe hámagua dandu lau le hariñagubei kei lau le hadügübei.
3. Ka wadagimanu gebetitimabei houn kristiánugu inarünitiña?
Óunaha lumutiña Hesusu lani disipulugu “apurichihei uganu luáguti larúeihan Bungiu” (Lúkasi 9:2). Mámarügüñein meha tidan haligilisin huríu hapurichiha furumiñetiña kristiánugu, ñǘdüntiña meha giñe apurichiha houn gürigia hábiñe luma lidan burí fulasu le ñein habéi saragu gürigia (aliiha huméi Adügaü 5:42; 17:17). Uguñe weyu, apurichiha hamuti giñe kristiánugu inarünitiña inarüni le tarufudahabei Bíbülia lidan burí fulasu le ñein lubéi hadarira gürigia. Kei hínsiñe habéi gürigia háledigu houn, lau sun hagundan hayusurei hadaani luma here lun hapurichihani uganu gíchigaditi gurasu luma emenigini le tídanbei Bíbülia (Márükosu 12:31).
SIGÍ HUMÁ AFURENDEIRA
Ariha waméi ida liña lan mítaran hamá kristiánugu inarünitiña kei gürigia ha máyeihanbalin Hesusu, mafalarun haméi le larufudahabei.
4. Áluaha hamuti inarüni le tídanbei Bíbülia
Gebegiti meha inarüni le tídanbei Lererun Bungiu houn furumiñetiña kristiánugu
Añahein gürigia ariñagatiña kristiánugu lan hagía ani mebereseguntiña lau inarüni le tídanbei Bíbülia, mawinwandun haméi. Ariha huméi BIDÉU, ábameti hayanuhan luagu álügüdahani le:
-
Anuhein meha ligilisi to ídanboun hariñaga gürigia hawougua kristiánugu hamá ani álugatiña hadügün lun masubudirun hamani amu gürigia le larufudahabei Hesusu. Ida liña hadügüni?
Arufudaha lumuti meha Hesusu inarüni le tídanbei Lererun Bungiu. Aliiha huméi Huan 18:37, ábameti hayanuhan luagu álügüdahani le:
-
Según le lariñagubei Hesusu, ida luba hasubudirúniwa kristiánugu “ha gaganbadibaña lun inarüni”?
5. Apurichiha hamuti inarüni le tídanbei Bíbülia
Apurichihatiña meha furumiñetiña kristiánugu houn amu
Lubaragiñe lidin Hesusu sielun, ruti aban dasi houn lani disipulugu ani añahagua adügei uguñe weyu. Aliiha huméi Matéu 28:19, 20 luma Adügaü 1:8, ábameti hayanuhan luagu álügüdahani le:
-
Halíaba san lébeda hapurichihan kristiánugu?
6. Winwan hamuti le hapurichihabei
Ka meha uagu chouru lubalin aban wügüri gíriti Tom darí laaña lan kristiánugu inarünitiña? Ariha huméi BIDÉU, ábameti hayanuhan luagu álügüdahani burí le:
-
Según le warihibei lidan bidéu, ka meha uagu mabusenrunhali lubéi Tom ni kata tuma relihión?
-
Ka uagu chouru lubalin darí laali lan inarüni?
Gürigia le ariñagubei lani lan Hesusu disipulu ligía, mosu larufuduni lau le ladügübei. Aliiha huméi Matéu 7:21, ábameti hayanuhan luagu álügüdahani le:
-
Kátima labusenrubei Hesusu: wariñaguni afiñe wamá luagu o warufuduni lau le wadügübei?
7. Hínsiñeguatiña hámagua
Arufudatiña meha furumiñetiña kristiánugu ínsiñeni hámagua
Arufudaaña san kristiánugu aranseñu haña lan lun híchuguni habagari hawagu hábirigu? Ariha huméi BIDÉU, ábameti hayanuhan luagu álügüdahani burí le:
-
Ka ínchahabalin íbiri Lloyd lun láhureruni libagari luagu íbiri Johansson?
-
Afiñetün san óusera lan kei aban kristiánu inarüniti?
Aliiha huméi Huan 13:34, 35, ábameti hayanuhan luagu álügüdahani burí le:
-
Ida liña lunti lan hóuseruniña lani Hesusu disipulugu—ha kristiánugu inarünitiña—gürigia ha lílana amu rasa o néchani?
-
Ida luba hadügüni katei le lidan lidaani wuribu?
LE HARIÑAGUBEI FIU GÜRIGIA: “Lun ábanmeme Bungiu háhuduragua sun kristiánugu meberesenga ka lan haligilisinboun”.
-
Kaba hamuga bérusu tídangiñeti Bíbülia haliiha houn lun harufuduni houn ka lan kristiánugu inarünibaña?
LE HAFURENDEIRUBEI
Falá hamuti kristiánugu inarünitiña le tariñagubei Bíbülia, aranseñu haña lun hadügün sákürifisiu hawagu amu ladüga hínsiñe hamá houn ani apurichiha hamuti inarüni le tídanbei Bíbülia.
Águyuguagüdüni
-
Ka lébunabei hafiñen kristiánugu inarünitiña?
-
Ka igaburi harufudubei kristiánugu inarünitiña?
-
Ka wadagimanu hadügübei kristiánugu inarünitiña?
FURENDEI HUMÁ LANWOUN
Furendei humá hawagu aban sétanu gürigia ha áfaagubaña lun háyeihani Hesukrístu luma lun hafalaruni larufudahan.
Aliiha huméi ida liña lan tadarirun aban würi to meha mounha íbirigu inarünitiña.
Ariha huméi ida liña lan harufudun kristiánugu inarünitiña ínsiñeni lau híderaguniña hábirigu dan le megei hamá híderawagun.
Íderagua wamutiña wábirigu dan le hasufurirun damichi (murusun lídangiñe) (3:57)
Ariha huméi ida liña lan harufuduni dandu furumiñetiña kristiánugu kei kristiánugu inarünitiña ha uguñebaña weyu igaburi le.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
