Yonlel lac piʼʌlob miʼ yʌlob chaʼan xñoptʼañob, pero mach junlajalic chuqui miʼ ñopob yicʼot bajcheʼ yilalob i melbal (chaʼlibal). Cheʼ jiñi, ¿bajcheʼ miʼ mejlel lac ñaʼtan majquiyob jiñi i sujm bʌ xñoptʼañob?

1. ¿Majquiyob jiñi i sujm bʌ xñoptʼañob?

Jiñi xñoptʼañob jiñobʌch muʼ bʌ i tsajcañob Jesucristo (pejcan Hechos 11:​26). ¿Bajcheʼ miʼ pʌsob chaʼan tiʼ sujm miʼ tsajcañob? Jesús tsiʼ yʌlʌ: «Mi mucʼʌch laʼ chʌn ajñel tij cʌntesa tac, xcʌntʼañetla c chaʼan tiʼ sujm» (Juan 8:​31). Ili yom i yʌl chaʼan jiñi i sujm bʌ xñoptʼañob yom miʼ jacʼbeñob i ticʼojel tac Jesús. Jesús tiʼ pejtelel ora tsiʼ cʼʌñʌ jiñi Tsʼijbujel tac tiʼ cʌntesa, jin chaʼan jiñi i sujm bʌ xñoptʼañob cheʼʌch miʼ melob jaʼel (pejcan Lucas 24:​27).

2. ¿Bajcheʼ miʼ pʌsob cʼuxbiya jiñi i sujm bʌ xñoptʼañob?

Jesús tiʼ sube jiñi xcʌntʼañob i chaʼan: «Cʼuxbin laʼ bʌ cheʼ bajcheʼ tsaʼ j cʼuxbiyetla» (Juan 15:​12). ¿Bajcheʼ tsiʼ pʌsʌ Jesús chaʼan miʼ cʼuxbin jiñi xcʌntʼañob i chaʼan? Tsiʼ yʌqʼue i yorajlel chaʼan miʼ yajñel yicʼotob, tsiʼ ñuqʼuesʌbeyob i pusicʼal yicʼot tsiʼ coltayob. I tsaʼto i yʌcʼʌ i bʌ ti chʌmel (sajtel) tiʼ cajob (1 Juan 3:​16). Jiñi i sujm bʌ xñoptʼañob mach mucʼ jach i yʌlob chaʼan añobʌch i cʼuxbiya, mucʼʌch i pʌsob jaʼel tiʼ tʼan yicʼot tiʼ melbalob cheʼ bajcheʼ tsiʼ mele Jesús.

3. ¿Baqui bʌ jiñi ñuc bʌ eʼtel miʼ melob jiñi i sujm bʌ xñoptʼañob?

Jesús tsiʼ yʌqʼue jumpʼejl eʼtel (troñel) jiñi xcʌntʼañob i chaʼan, «tsiʼ chocoyob majlel chaʼan miʼ subob jiñi i Yumʌntel Dios» (Lucas 9:2). Jiñi ñaxam bʌ xñoptʼañob mach cojach tsiʼ chaʼleyob cʌntesa yaʼ baqui miʼ tempañob i bʌ i chʼujutesañob Dios, tsiʼ chaʼleyob subtʼan jaʼel baqui an cabʌl lac piʼʌlob yicʼot ti ototʌl tac (pejcan Hechos 5:​42; 17:​17). Ili ora jaʼel, jiñi i sujm bʌ xñoptʼañob miʼ chaʼleñob subtʼan baqui jach miʼ tajob lac piʼʌlob. Miʼ cʼʌñob jiñi i yorajlel añoʼ bʌ i chaʼan yicʼot i pʼʌtʌlelob chaʼan miʼ subob jiñi wen tʼan come miʼ cʼuxbiñob jiñi lac piʼʌlob (Marcos 12:​31).

 LAʼ LAC ÑUMEN ÑAʼTAN

4. Miʼ sʌclañob jiñi i sujmlel am bʌ ti Biblia

5. Miʼ subob muʼ bʌ i yʌl jiñi Biblia

 6. Miʼ melob cheʼ bajcheʼ miʼ yʌlob

¿Chuqui tsiʼ yʌqʼue i ñaʼtan juntiquil wiñic i cʼabaʼ Tom chaʼan tsiʼ taja jiñi i sujmlel? Qʼuelela jiñi VIDEO i tem alʌla iliyi:

• ¿Chucoch Tom maʼañic tsiʼ mulaj i melbal jiñi ñopbalʌl tac?

• ¿Chuqui tsiʼ yʌqʼue i ñaʼtan chaʼan tsiʼ taja jiñi i sujmlel?

Jiñi muʼ bʌ la cʌl yom mi lac pʌs ti lac melbal. Pejcanla Mateo 7:​21 i tem alʌla iliyi:

• ¿Chuqui miʼ ñumen qʼuel ti ñuc Jesús, jimba cheʼ mi la cʌl chuqui mi lac ñop o cheʼ mi lac pʌs ti lac melbal?

7. Miʼ cʼuxbiñob i bʌ

• ¿Chuqui yom miʼ pʌsob jiñi xcʌntʼañob i chaʼan Jesús tiʼ tojlel jiñi lac piʼʌlob qʼuexeloʼ bʌ i colorlel i pʌchʌlel o i lumalob?

• ¿I bajcheʼ mi caj i mejlel i melob jiñi cheʼ bʌ woli jumpʼejl guerra?

 TSAʼ BɅ LAJ CɅÑɅ

Jiñi i sujm bʌ xñoptʼañob miʼ melob chuqui miʼ yʌl jiñi Biblia, cabʌl chuqui miʼ melob chaʼan miʼ pʌsbeñob cʼuxbiya jiñi yambʌlob yicʼot miʼ chaʼleñob subtʼan.

¿Chuqui tsaʼ cʌñʌ?

• ¿Baqui chucul i cʌntesa jiñi i sujm bʌ xñoptʼañob?

• ¿Baqui bʌ jiñi melbalʌl muʼ bʌ i yʌcʼ ti cʌjñel jiñi i sujm bʌ xñoptʼañob?

• ¿I chuqui ti eʼtel miʼ melob?