TOLI 18

San o yeepi i fu sabi sama a den tuu Kelesten?

PEE

A omen miliyun sama e kai denseefi Kelesten. Ma toku den nai biibi denseefi sani. Den nai du denseefi sani tu. San o yeepi u fu sabi sama a den tuu Kelesten?

1. Sama a wan Kelesten?

Wan Kelesten, a wan disipel efuso wan bakaman fu Yesesi. (Leisi Toli fu den apostel 11:26.) Fa wo du sabi sama a den bakaman fu Yesesi? Yesesi be taki: ‘Efu we du san mi taki, da wa mi bakaman tuutuu’ (Yohanisi 8:31). A sani ya wani taki wan tuu Kelesten mu e du san Yesesi taki. Leti enke Yesesi, a san sikiifi aini Beibel den tuu Kelesten mu e leli sama.—Leisi Lukasi 24:27.

2. Fa tuu Kelesten e soi taki den lobi taawan?

Yesesi be taigi den bakaman fi en taki: ‘U mu lobi useefi enke fa mi lobi u’ (Yohanisi 15:12). Fa Yesesi soi taki a be lobi den bakaman fi en? A be e gi toli anga den, a be e gi den taanga-sikin, a be e yeepi den te den be fuka, a be de kabakaba fu dede gi den tu (1 Yohanisi 3:16). Leti enke Yesesi, tuu Kelesten nai taki a mofu namo taki den lobi sama, ma a fasi fa den e libi e soi taki den lobi taawan.

3. Sowtu wooko den tuu Kelesten e du?

Yesesi fika wan wooko gi den bakaman fi en fu du. Beibel taki: ‘A sende den fu go peleiki fu a Kownukondee fu Gadu’ (Lukasi 9:2). Den fosi Kelesten á be e wakiti fu sama kon a keliki namo, ma den be e go peleiki gi sama a den osu anga taa peesi. (Leisi Toli fu den apostel 5:42; 17:17.) Aini a ten ya, den tuu Kelesten e go na ala peesi tu fu leli sama san Beibel e taki. A di den lobi sama, meke den e teke den ten e leli den. A so den e toosutu sama. Den e yeepi den tu fu biibi taki wan bun ten de aw fesi e kon.—Malikisi 12:31.

LUKU A TOLI YA MOO FINI

A omen sama e kai denseefi Kelesten. Ma wo luku san o yeepi i fu sabi sama e du den sani di Yesesi be e leli sama tuutuu.

4. Den tuu Kelesten lobi den leli fu Beibel

Den fosi Kelesten be lobi a Wowtu fu Gadu

A ná ala sama di e kai denseefi Kelesten lobi den leli fu Beibel. Pee a FELON, da i luku efii poi piki a akisi ya.

FELON: Fa sama poli a Kelesten biibi (5:11)

San son Kelesten keliki du fu tapu sama fu kon sabi den sani di Yesesi be e leli sama?

A san sikiifi aini a Wowtu fu Gadu Yesesi be e leli sama. Leisi Yohanisi 18:37, da i luku efii poi piki a akisi ya:

Enke fa Yesesi taki, da san o yeepi u fu sabi sama a den tuu Kelesten?

5. A san Beibel taki den tuu Kelesten e leli sama

Den fosi Kelesten be e peleiki

Fosi Yesesi go a hemel, a gi den bakaman fi en wan wooko fu du. Te anga a dei fu tide den tuutuu bakaman fi en e du a wooko ya ete. Leisi Mateyesi 28:19, 20 anga Toli fu den apostel 1:8, da i luku efii poi piki den akisi ya:

Sama den bakaman fu Yesesi be o peleiki gi? On langa den be o du a wooko ya?

6. Den tuu Kelesten e du den sani di den e leli sama

San yeepi Tom fu fende a tuu biibi? Pee a FELON, da i luku efii poi piki den akisi ya.

FELON: Mi be koti mofu taki mi nai go a keliki moo (5:20)

Saide Tom á be wani go a keliki moo?
Saide ai biibi taki na a tuu biibi a de nownow?

Efu wan sama taki en a wan bakaman fu Yesesi, da en libi mu e soi tu taki en a wan bakaman fu Yesesi. Leisi Mateyesi 7:21, da i luku efii poi piki a akisi ya:

Enke fa a tekisi e soi, da saide wa mu e taki anga mofu namo taki wa bakaman fu Yesesi?

7. Tuu Kelesten lobi denseefi

Den fosi Kelesten be lobi denseefi

Tuu Kelesten de kabakaba fu dede gi denseefi? Pee a FELON, da i luku efii poi piki den akisi ya.

FELON: A be de kabakaba fu dede gi en baala (2:55)

Saide Baala Lloyd be de kabakaba fu dede gi Baala Johansson?
I si enke a du sani enke wan tuu Kelesten?

Leisi Yohanisi 13:34, 35, da i luku efii poi piki den akisi ya:

Fa den bakaman fu Yesesi, efuso den tuu Kelesten be o libi anga sama fu wan taa nasi efuso wan taa kondee?
San tuu Kelesten be o du efu tu kondee be o feti anga denseefi?

SON SAMA E TAKI: ‘A naabi toobi sowtu keliki ye go, ala den bun gi Gadu.’