ADZESUA 18
Yebesi Dɛn Ehu Nokwar Christianfo?
Nyimpa ɔpepepem pii na wɔka dɛ wɔyɛ Christianfo. Naaso ɔsor dza hɔn mu biara gye dzi, na ɔsor kwan a hɔn mu biara so fa do bɔ ne bra. Ntsi, yebesi dɛn ehu hɔn a wɔyɛ Christianfo ankasa?
1. Wɔka Christiannyi a, ɔno nye woana?
Christianfo yɛ Jesus Christ n’esuafo, anaa hɔn a wodzi Jesus Christ n’ekyir. (Kenkan Asomafo Ndwuma 11:26.) Ebɛnadze na wɔyɛ dze kyerɛ dɛ wɔyɛ Jesus n’esuafo? Jesus kaa dɛ: “Sɛ hom tsena m’asɛm mu a, nna hom yɛ m’esuafo ampa.” (John 8:31) Iyi kyerɛ dɛ ɔwɔ dɛ hɔn a wɔyɛ Christianfo ankasa no dze Jesus ne nkyerɛkyerɛ bɔ hɔn bra. Afei so, nna Jesus dze ne nkyerɛkyerɛ nyina gyina Kyerɛwnsɛm no do, ntsi dɛmara na ɔwɔ dɛ hɔn a wodzi n’ekyir nokwar mu no so yɛ.—Kenkan Luke 24:27.
2. Nokwar Christianfo si dɛn kyerɛ dɛ wɔwɔ ɔdɔ?
Jesus kaa kyerɛɛ n’ekyirdzifo dɛ: “Hom ndodɔ homho nkorkor, dɛ mbrɛ madɔ hom.” (John 15:12) Ebɛnadze na Jesus yɛe dze kyerɛɛ dɛ ɔdɔ n’esuafo? Onyaa hɔnho adagyer, ɔhyɛɛ hɔn nkuran, na ɔboaa hɔn. Ɔdze no nkwa mpo too hɔ maa hɔn. (1 John 3:16) Dɛ mbrɛ Jesus yɛe no, nokwar Christianfo so mmfa hɔn ano nnka kɛkɛ dɛ wɔwɔ ɔdɔ. Wɔdze hɔn ndzeyɛɛ na hɔn kasaa nyina kyerɛ dɛ wɔdɔ hɔnho.
3. Ebɛn edwuma na hɔn a wodzi Christ n’ekyir ankasa no reyɛ?
Jesus maa hɔn a wɔyɛ n’esuafo no edwuma bi dɛ wɔnyɛ. “Ɔsomaa hɔn dɛ wɔnkɛka Nyankopɔn ahenman ho asɛm.” (Luke 9:2) Christianfo a wodzi kan no kaa Nyankopɔn ho asɛm, naaso nnyɛ hɔn asɔrdan mu nkotsee na wɔyɛɛ dɛm. Nna wɔka asɛm no bi kyerɛ nkorɔfo wɔ bagua mu nye nkorɔfo hɔn efie so. (Kenkan Asomafo Ndwuma 5:42; 17:17.) Ndɛ so, hɔn a wɔyɛ Christianfo ankasa no ka Bible mu nokwar no ho asɛm wɔ beebiara a nyimpa wɔ. Wɔdɔ nyimpa paa, ntsi wofi hɔn pɛ mu dze hɔn ber na hɔn ahoɔdzen ka enyidado na awerɛkyekyesɛm a ɔwɔ Bible mu no kyerɛ hɔn.—Mark 12:31.
PƐNSAPƐNSA MU KƆ EKYIR
Ma yɛnhwɛ kwan a hɔn a wɔyɛ Christianfo ankasa no yɛ soronko fi hɔn a wonndzi Jesus ne nkyerɛkyerɛ nye dza ɔyɛe no ekyir.
4. Wɔhwehwɛ nokwar a ɔwɔ Bible no mu
Nna Christianfo a wodzi kan no nndzi Nyankopɔn n’Asɛm no ho agor
Nnyɛ hɔn a wɔka dɛ wɔyɛ Christianfo nyina na wɔgye to mu dɛ ɔwɔ dɛ yehu nokwasɛm a ɔwɔ Bible mu no na yedzi do. Ma yɛnhwɛ VIDEO yi, na yensusu asɛmbisa a odzi do no ho.
-
Ebɛnadze na asɔrasɔr a wɔka dɛ wɔyɛ Christianfo no ayɛ ma ɔno ntsi wɔayɛ dzen ama nkorɔfo dɛ wobosua Jesus ne nkyerɛkyerɛ?
Jesus kyerɛkyerɛɛ nokwar a ɔwɔ Nyankopɔn n’Asɛm mu no. Ma yɛnkenkan John 18:37, na yensusu asɛmbisa yi ho:
-
Jesus kaa dɛ yebesi dɛn ehu Christianfo a ‘wofi nokwar no mu’?
5. Wɔkyerɛkyerɛ nokwar a ɔwɔ Bible no mu
Nna Christianfo a wodzi kan no ka asɛmpa no kyerɛ nkorɔfo
Ansaana Jesus robɔkɔ sor no, ɔmaa n’ekyirdzifo no edwuma bi dɛ wɔnyɛ, na wɔayɛ dɛm edwuma no ebesi ndɛ. Ma yɛnkenkan Matthew 28:19, 20 na Asomafo Ndwuma 1:8, na yensusu asɛmbisa yi ho:
-
Nna wɔbɛka asɛmpa no ekodu hen?
6. Wɔdze dza wɔkyerɛkyerɛ no bɔ hɔn bra
Ebɛnadze na ɔmaa owura bi a wɔfrɛ no Tom gyee too mu dɛ oehu hɔn a wɔyɛ nokwar Christianfo? Ma yɛnhwɛ VIDEO yi, na yensusu nsɛmbisa a odzidzi do no ho.
-
Wɔ video no mu no, ebɛnadze na ɔmaa Tom paa abaw wɔ nyamesom ho?
-
Ebɛnadze na ɔmaa ɔgyee too mu ampa dɛ oehu nokwar som?
Nnyɛ dza yɛdze hɛn ano ka no kɛkɛ no nye asɛm no, na mbom dza yɛyɛ no na ohia paa. Ma yɛnkenkan Matthew 7:21, na yensusu asɛmbisa yi ho:
-
Dza yɛdze hɛn ano ka no kɛkɛ dɛ yɛgye dzi, nye dza yɛdze hɛn ndzeyɛɛ kyerɛ dɛ yɛgye dzi no, no mu hendze na ohia Jesus paa?
7. Wɔdodɔ hɔnho
Nna Christianfo a wodzi kan no dodɔ hɔnho
Aso Christianfo dze hɔn nkwa to esian mu dze bɔ hɔn nuanom Christianfo ho ban? Ɔwodze ma yɛnhwɛ VIDEO yi, na yensusu nsɛmbisa a odzidzi do no ho.
-
Wɔ video no mu no, ebɛnadze na ɔkaa Lloyd ma ɔdze no nkwa too esian mu maa Onua Johansson?
-
Ehwɛ a ɔyɛɛ n’adze dɛ nokwar Christiannyi?
Ma yɛnkenkan John 13:34, 35, na yensusu nsɛmbisa yi ho:
-
Sɛ obi yɛ nokwar Christiannyi a, ebɛn kwan do na ɔsɛ dɛ ɔnye no nua Christiannyi a ofi ɔman fofor do no dzi?
-
Sɛ ɔko si a, ebɛnadze na nokwar Christianfo bɛyɛ dze akyerɛ dɛ wɔdodɔ hɔnho?
BINOM KA DƐ: “Hɔn a wɔse wɔyɛ Christianfo no mpo, ndzɛmba bɔn a wɔyɛ no, ɔkyɛn hɔn a wɔnnyɛ Christianfo no koraa.”
-
Ebɛn kyerɛwsɛm na ebɛkenkan dze akyerɛ dɛ yɛwɔ nokwar Christianfo ankasa wɔ hɔ?
DZA ESUA
Hɔn a wɔyɛ nokwar Christianfo ankasa no dze dza Bible no kyerɛkyerɛ no bɔ hɔn bra, wɔdodɔ hɔnho, na wɔka nokwar a ɔwɔ Bible mu no ho asɛm kyerɛ nkorɔfo.
Mbobɔdo
-
Hɔn a wɔyɛ nokwar Christianfo no dze hɔn nkyerɛkyerɛ gyina ebɛnadze do?
-
Ebɛn suban na nokwar Christianfo da no edzi?
-
Ebɛn edwuma na hɔn a wɔyɛ nokwar Christianfo no yɛ?
HWEHWƐ PII KA HO
Nyimpakuw bi robɔ mbɔdzen paa dɛ wɔdze Jesus Christ ne nkyerɛkyerɛ bɔbɔ hɔn bra na woeesuasua no. Hwɛ video yi, na ibohu hɔnho nsɛm pii.
Ebɛnadze na ɔboaa maame bi a nna ɔyɛ Roman sista ma ohun hɔn a wɔyɛ nokwar Christianfo? Kenkan asɛm yi, na ibohu dza ɔboaa no.
“Wɔdze Bible No Buaa Asɛmbisa Biara!” (Ɔweɔn-Aban, April 1, 2014)
Hwɛ mbrɛ hɔn a wɔyɛ nokwar Christianfo no boa hɔn nuanom aber a atoyerɛnkyɛm bi esi no dze kyerɛ dɛ wɔdɔ hɔn.
Christianfo a wodzi kan no yɛɛ ndzɛmba a Jesus kaa dɛ ɔbɛma yeehu nokwar Christianfo no. Hwɛ dɛ mbrɛ nokwar Christianfo a wɔwɔ hɔ ndɛ no so reyɛ dɛm ndzɛmba no ara bi.
“Ebɛnadze Na Ɔma Yehu Hɔn A Wɔyɛ Nokwar Christianfo?” (Ɔweɔn-Aban, March 1, 2012)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
