NǓKPLƆNKPLƆN 18
Lee È Nɔ Tuùn Klisanwun Nǔgbo lɛ Gbɔn É
Gbɛtɔ́ liva mɔ̌kpan wɛ nɔ ɖɔ ɖɔ emi nyí Klisanwun. Amɔ̌, ye mɛ bǐ ɖi nǔ nú nǔ ɖokpo ɔ lɛ ǎ, ye mɛ bǐ ka nɔ lɛ́ xwedó nǔgbododó ɖokpo ɔ lɛ ǎ. Nɛ̌ mǐ ka sixu tuùn Klisanwun nǔgbo lɛ gbɔn lo?
1. Etɛ ka nyí tinmɛ Klisanwun nyínyí tɔn?
Klisanwun lɛ wɛ nyí ahwanvu Jezu Klisu tɔn lɛ, alǒ mɛ e nɔ xwedó è lɛ é. (Xà Mɛsɛ́dó 11:26, nwt.) Nɛ̌ ye ka nɔ ɖexlɛ́ ɖɔ emi nyí ahwanvu Jezu tɔn lɛ gbɔn? É ɖɔ: “Enyi mi sè gbè nú mì ɔ, mi nyí ahwanvu ce lɛ nǔgbo.” (Jaan 8:31) Tinmɛ enɛ tɔn wɛ nyí ɖɔ Klisanwun nǔgbo lɛ ɖó na nɔ setónú nú nǔkplɔnmɛ Jezu tɔn lɛ. Nǔ e ɖò Biblu mɛ lɛ é wɛ Jezu nɔ kplɔ́n mɛ hwebǐnu. Mɛ ɖěɖee nɔ xwedó è nǔgbo nǔgbo lɛ é nɔ wà nǔ ɖokpo ɔ.—Xà Luki 24:27.
2. Nɛ̌ Klisanwun nǔgbo lɛ ka nɔ ɖè wanyiyi xlɛ́ gbɔn?
Jezu ɖɔ nú ahwanvu tɔn lɛ ɖɔ: “Mi yí wǎn nú miɖée, lee un yí wǎn nú mi gbɔn é.” (Jaan 15:12) Nɛ̌ Jezu ka xlɛ́ ɖɔ emi yí wǎn nú ahwanvu emitɔn lɛ gbɔn? É zán hwenu ɖó kpɔ́ xá ye, dó wusyɛn lanmɛ nú ye, bo lɛ́ d’alɔ ye. É tlɛ sɔ́ gbɛ̀ tɔn jó dó ta yetɔn mɛ. (1 Jaan 3:16) Mɔ̌ ɖokpo ɔ, Klisanwun nǔgbo lɛ nɔ ɖɔ xó dó wanyiyi wu kpowun ǎ. Ye nɔ ɖexlɛ́ ɖò xó kpo nǔwiwa kpo mɛ ɖɔ emi yí wǎn nú emiɖée lɛ.
3. Azɔ̌ tɛ ka nɔ ján alɔ nú Klisanwun nǔgbo lɛ?
Jezu zɔ́n azɔ̌ ahwanvu tɔn lɛ. “É sɛ́ ye dó, nú ye na yì jlá axɔ́suɖuɖu Mawu tɔn sín xó.” (Luki 9:2) Klisanwun bǐbɛ̌mɛ tɔn lɛ ɖɔ Mawuxó ɖò fí e ye nɔ sɛn Mawu ɖè lɛ é kɛɖɛ ǎ, ye lɛ́ wà mɔ̌ ɖò agbawungba kpo xwé mɛ lɛ tɔn lɛ gbè kpo. (Xà Mɛsɛ́dó 5:42; 17:17, nwt.) Égbé ɖesu ɔ, Klisanwun nǔgbo lɛ nɔ jlá nǔgbo Biblu tɔn ɔ ɖò fí ɖebǔ e gbɛtɔ́ lɛ ɖè é. Ye nɔ yí wǎn nú nɔzo yetɔn lɛ, enɛ wu ɔ, kpo xomɛhunhun kpo wɛ ye nɔ má nukúnɖiɖó kpo gbɔdónúmɛ kpo sín wɛn e ɖò Biblu mɛ é xá ye.—Maki 12:31.
BA DÒ NÚ NǓ D’EJI
Ba dò nú lee a sixu tuùn Klisanwun nǔgbo lɛ ɖó vo nú mɛ ɖěɖee ma nɔ xwedó nǔkplɔnmɛ Jezu tɔn lɛ kpo kpɔ́ndéwú tɔn kpo ǎ lɛ é gbɔn é.
4. Ye nɔ ba nǔgbo Biblu Tɔn
Xó Mawu tɔn xɔ akwɛ nú Klisanwun bǐbɛ̌mɛ tɔn lɛ
Mɛ ɖěɖee nɔ ɖɔ ɖɔ emi nyí Klisanwun lɛ é bǐ wɛ nǔgbo Biblu tɔn xɔ akwɛ na ǎ. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
-
Nɛ̌ sinsɛn ɖěɖee jɛ Klisanwun nyí é ɖé lɛ ka sú nǔkplɔnmɛ Jezu tɔn lɛ sín ali dó mɛ lɛ gbɔn?
Jezu kplɔ́n nǔgbo e ɖò Xó Mawu tɔn mɛ é mɛ lɛ. Xà Jaan 18:37, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ mǐ ka sixu tuùn Klisanwun e “nɔ xwedó nǔgbo ɔ” lɛ é gbɔn bɔ Jezu ɖɔ?
5. Ye nɔ jlá nǔgbo Biblu Tɔn
ye jlá wɛnɖagbe ɔ mɛ ɖevo lɛ
Cobonu Jezu na yì jixwé ɔ, é zɔ́n azɔ̌ ɖé ahwanvu tɔn lɛ, bɔ azɔ̌ enɛ kpò ɖò yiyi wɛ kaka jɛ égbé. Xà Matie 28:19, 20 kpo Mɛsɛ́dó 1:8 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Bǎ tɛ mɛ è ka ɖó na wà wɛnɖagbejijlazɔ́ ɔ yì ɖó?
6. Ye nɔ zán nǔ e ye nɔ kplɔ́n mɛ lɛ é
Etɛ ka zɔ́n bɔ dawe e nɔ nyí Tom é kúdeji ɖɔ emi mɔ sinsɛn Klisanwun tɔn nǔgbo ɔ? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Ðò video ɔ mɛ ɔ, etɛ ka zɔ́n bɔ Tom gbɛ́ sinsɛnxó?
-
Etɛwu é ka kúdeji ɖɔ emi mɔ nǔgbo ɔ?
Nǔwiwa lɛ nɔ ɖɔ xó hugǎn nǔ e nɔ tɔ́n sín nu mɛ é. Xà Matie 7:21, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛ ka ɖò taji hugǎn nú Jezu? Nǔ e mǐ nɔ ɖɔ mǐ ɖi nǔ na é wɛ à alǒ nǔ e mǐ nɔ ɖexlɛ́ gbɔn nǔwiwa mǐtɔn lɛ gblamɛ é?
7. Ye nɔ yí wǎn nú yeɖée Lɛ
bo lɛ́ yí wǎn nú yeɖée lɛ
Klisanwun lɛ ka nɔ sɔ́ gbɛ̀ yetɔn ɖ’axɔ́ nu dó Klisanwun hatɔ́ yetɔn lɛ tamɛ nǔgbo à? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Ðò video ɔ mɛ ɔ, etɛ ka sísɛ́ Nɔví Lloyd b’ɛ sɔ́ gbɛ̀ tɔn ɖó axɔ́ nu dó Nɔví Johansson tamɛ?
-
A ka lin ɖɔ é wà nǔ Klisanwun nǔgbo ɖé ɖɔhun à?
Xà Jaan 13:34, 35, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Nɛ̌ ahwanvu Jezu tɔn lɛ (Klisanwun nǔgbo lɛ) ka ɖó na nɔ wà nǔ xá mɛ e nyí akɔ ɖevo lɛ é, alǒ toɖevomɛnu lɛ gbɔn?
-
Nɛ̌ ye ka na wà mɔ̌ ɖò ahwanhwenu gbɔn?
MƐÐÉ LƐ ÐƆ: “Klisanwun ɖé lɛ sín jijɔ tlɛ nyla hú mɛ e ma nyí Klisanwun ǎ é ɖé lɛ tɔn, bɔ nɛ̌ sinsɛn yetɔn ka sixu nyí nǔgbo ɔ gbɔn?”
-
Wemafɔ Biblu tɔn e xlɛ́ lee mǐ sixu tuùn Klisanwun nǔgbo lɛ gbɔn é tɛ a ka sixu xà nú mɛ mɔ̌hun ɖé?
ETƐ LƐ A KA KPLƆ́N?
Klisanwun nǔgbo lɛ nɔ xwedó nǔkplɔnmɛ Biblu tɔn lɛ, nɔ ɖè wanyiyi mɛɖée sísɔ́ dó savɔ̌ tɔn xlɛ́, bo nɔ jlá nǔgbo Biblu tɔn.
Vɔ̌gbɔnji
-
Etɛ jí Klisanwun nǔgbo lɛ ka nɔ sɔ́ nǔ e ye ɖi nǔ na lɛ é jinjɔn?
-
Jijɔ tɛ ka nɔ dó Klisanwun nǔgbo lɛ gesí?
-
Azɔ̌ tɛ Klisanwun nǔgbo lɛ ka nɔ wà?
KÍJÉ
Kplɔ́n nǔ dó gbɛ̌ta mɛ ɖěɖee nɔ dó gǎn, bo nɔ xwedó kpɔ́ndéwú Jezu Klisu tɔn kpo nǔkplɔnmɛ tɔn lɛ kpo é tɔn ɖé wu d’eji.
Kpɔ́n nǔ e d’alɔ asyɔ́nla xóxó ɖé b’ɛ mɔ “xwédo gbigbɔ tɔn nǔgbo ɖé” é
“Ye Zán Biblu Dó Na Xósin nú Nǔkanbyɔ Ðokpo Ðokpo!” (Atɔxwɛ [Gungbe] 1er juillet 2014)
Kpɔ́n lee Klisanwun nǔgbo lɛ nɔ ɖè wanyiyi xlɛ́ Mawu sɛntɔ́ hatɔ́ yetɔn ɖěɖee ɖó hudo alɔdó tɔn lɛ é gbɔn é.
Kpɔ́n lee Klisanwun bǐbɛ̌mɛ tɔn lɛ kpo Klisanwun nǔgbo égbé tɔn lɛ kpo wà nǔ sɔgbe xá nǔ e Jezu ɖɔ ɖɔ è na tuùn ahwanvu emitɔn lɛ na é gbɔn é.
“Etɛ lɛ È ka Nɔ Dó Tuùn Klisanwun Nǔgbo lɛ Na?” (Atɔxwɛ [Gungbe] 1er juillet 2012)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
