NIKASEMƆ 18
Te Obaafee Tɛŋŋ Ona Mɛi Ni Ji Kristofoi Diɛŋtsɛ Lɛ?
Mɛi akpekpe toi akpei abɔ kɛɔ akɛ Kristofoi ji amɛ. Shi esoro nibii ni amɛteŋ mɔ fɛɛ mɔ heɔ eyeɔ, kɛ bɔ ni amɛhiɔ shi amɛhãa. Hewɔ lɛ, te wɔbaafee tɛŋŋ wɔna mɛi ni ji Kristofoi diɛŋtsɛ lɛ?
1. Mɛni tsɔɔ akɛ mɔ ko ji Kristofonyo?
Kristofoi ji Yesu Kristo kaselɔi, loo esɛɛnyiɛlɔi. (Kanemɔ Bɔfoi 11:26.) Mɛni kɛ́ mɔ ko fee lɛ, no baatsɔɔ akɛ eji Yesu kaselɔ? Yesu kɛɛ: “Kɛji nyɛhi miwiemɔ lɛ mli lɛ, belɛ mikaselɔi ji nyɛ lɛɛlɛŋ.” (Yohane 8:31) Enɛ tsɔɔ akɛ, mɛi ni ji Kristofoi lɛɛlɛŋ lɛ, hiɔ shi yɛ Yesu tsɔɔmɔi lɛ naa. Yesu jɛ Ŋmalɛ lɛ mli etsɔɔ nii, ni nakai nɔŋŋ mɛi ni ji Kristofoi diɛŋtsɛ lɛ hu feɔ.—Kanemɔ Luka 24:27.
2. Mɛɛ gbɛ nɔ mɛi ni ji Kristofoi diɛŋtsɛ lɛ jieɔ suɔmɔ kpo?
Yesu kɛɛ esɛɛnyiɛlɔi lɛ akɛ: “Nyɛsumɔsumɔa nyɛhe tamɔ bɔ ni misumɔɔ nyɛ lɛ.” (Yohane 15:12) Mɛni Yesu fee kɛtsɔɔ akɛ esumɔɔ ekaselɔi lɛ? Ená dekã ehã amɛ, ewo amɛ hewalɛ, ni eye ebua amɛ. Ekɛ ewala po fɔ̃ shi ehã amɛ. (1 Yohane 3:16) Mɛi ni ji Kristofoi diɛŋtsɛ lɛ hu ewieee suɔmɔ he kɛkɛ. Amɛhãa anaa yɛ amɛwiemɔi kɛ amɛnifeemɔi amli akɛ, amɛsumɔsumɔɔ amɛhe.
3. Mɛɛ nitsumɔ mɛi ni ji Kristofoi diɛŋtsɛ lɛ tsuɔ?
Yesu kɛ nitsumɔ wo ekaselɔi lɛ adɛŋ. “Etsu amɛ koni amɛyashiɛ Nyɔŋmɔ Maŋtsɛyeli lɛ.” (Luka 9:2) Jeee hei ni blema Kristofoi lɛ kpeɔ yɛ lɛ pɛ amɛshiɛ yɛ, moŋ lɛ, amɛshiɛ yɛ hei krokomɛi, kɛ mɛi ashĩai amli. (Kanemɔ Bɔfoi 5:42; 17:17.) Ŋmɛnɛ lɛ, mɛi ni ji Kristofoi diɛŋtsɛ lɛ hu shiɛɔ Biblia mli anɔkwalei lɛ, yɛ he fɛɛ he ni amɛbaana mɛi yɛ. Amɛsumɔɔ amɛnyɛmi gbɔmɔ, no hewɔ lɛ, amɛjɛɔ amɛsuɔmɔ mli amɛkɛ mɛi gbaa Biblia lɛ mli sane ni shɛjeɔ mɔ mii, ni hãa mɔ hiɛnɔkamɔ hu lɛ.—Marko 12:31.
KASEMƆ PII OFATA HE
Obaana nɔ ni hãa esoroɔ mɛi ni ji Kristofoi diɛŋtsɛ lɛ, yɛ mɛi ni ehiii shi yɛ Yesu tsɔɔmɔi lɛ anaa, ni amɛkaseee lɛ hu lɛ ahe.
4. Amɛkaseɔ Biblia lɛ, koni amɛna emli anɔkwalei lɛ
Blema Kristofoi lɛ shwɛɛɛ Nyɔŋmɔ Wiemɔ lɛ he
Mɛi komɛi ni kɛɔ akɛ Kristofoi ji amɛ lɛ enaaa akɛ ehe hiaa ni amɛkase Biblia lɛ, ni amɛna emli anɔkwalei lɛ. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛni sɔlemɔi komɛi ni kɛɔ akɛ Kristofoi ji amɛ lɛ efee koni mɛi akale anɔkwalei ni Yesu tsɔɔ lɛ?
Yesu tsɔɔ anɔkwalei ni yɔɔ Nyɔŋmɔ Wiemɔ lɛ mli lɛ. Nyɛkanea Yohane 18:37 lɛ, ni nyɛsusua sanebimɔ nɛɛ he:
-
Mɛni Yesu tsɔɔ akɛ no baahã ana Kristofoi ni “yɔɔ anɔkwale lɛ gbɛfaŋ lɛ”?
5. Amɛshiɛɔ Biblia mli anɔkwalei lɛ
Blema Kristofoi lɛ shiɛ
Dani Yesu baakwɔ kɛya ŋwɛi lɛ, ekɛ nitsumɔ ko wo esɛɛnyiɛlɔi lɛ adɛŋ, ni amɛtsu kɛbashi ŋmɛnɛ. Nyɛkanea Mateo 28:19, 20 kɛ Bɔfoi 1:8 lɛ, ni nyɛsusua sanebimɔ nɛɛ he:
-
Mɛɛ be amɛbaashiɛ kɛyashi? Nɛgbɛ amɛbaashiɛ kɛyashi?
6. Amɛkɛ nɔ ni amɛshiɛɔ lɛ tsuɔ nii
Mɛni hã nuu ko ni atsɛɔ lɛ Tom lɛ he eye akɛ, ena mɛi ni ji Kristofoi diɛŋtsɛ lɛ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛni hã Tom kɛ jamɔ fo tako mli?
-
Mɛni hã ehe eye akɛ, ena mɛi ni ji Kristofoi diɛŋtsɛ lɛ?
Mɔ nifeemɔ hãa anaa mɔ ni eji fe ewiemɔ. Nyɛkanea Mateo 7:21 lɛ, ni nyɛsusua sanebimɔ nɛɛ he:
-
Te nɔ ni Yesu náa he miishɛɛ waa—nɔ ni wɔkɛɛ wɔheɔ wɔyeɔ, aloo nɔ ni wɔnifeemɔi hãa anaa yɛ wɔhe?
7. Amɛsumɔsumɔɔ amɛhe
Blema Kristofoi lɛ sumɔsumɔɔ amɛhe
Ani eji anɔkwale akɛ mɛi ni ji Kristofoi diɛŋtsɛ lɛ kɛ amɛwala fɔ̃ɔ shi hãa amɛnyɛmimɛi Kristofoi lɛ? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛni hã Lloyd ka akɛ ekɛ ewala baafɔ̃ shi ehã Nyɛminuu Johansson lɛ?
-
Kɛ́ okwɛ lɛ, efee enii tamɔ Kristofonyo diɛŋtsɛ?
Nyɛkanea Yohane 13:34, 35 lɛ, ni nyɛsusua sanebimɔi nɛɛ ahe:
-
Te Yesu kaselɔi (loo Kristofoi diɛŋtsɛ) kɛ mɛi ni esoro amɛhewolonɔ su loo amɛjɛ maŋ kroko nɔ lɛ baaye ahã tɛŋŋ?
-
Kɛ́ aawu ta lɛ, te amɛkɛ mɛi baaye ahã tɛŋŋ?
MƐI KOMƐI KƐƆ AKƐ: “Kristofoi efee nibii fɔji pii, no hewɔ lɛ, amɛjamɔ lɛ jeee anɔkwa jamɔ lɛ.”
-
Mɛɛ ŋmalɛ obaanyɛ okane ohã mɔ lɛ kɛtsɔɔ lɛ akɛ, abaanyɛ ana mɛi ni ji Kristofoi diɛŋtsɛ lɛ?
EMLI OTI
Mɛi ni ji Kristofoi diɛŋtsɛ lɛ hiɔ shi yɛ nɔ ni Biblia lɛ tsɔɔ naa, amɛkɛ amɛhe shãa afɔle amɛhãa amɛhe, ni amɛshiɛɔ Biblia mli anɔkwalei lɛ.
Mɛni Okase?
-
Mɛni nɔ mɛi ni ji Kristofoi diɛŋtsɛ lɛ damɔɔ amɛtsɔɔ nii?
-
Mɛɛ su mɛi ni ji Kristofoi diɛŋtsɛ lɛ jieɔ lɛ kpo waa?
-
Mɛɛ nitsumɔ mɛi ni ji Kristofoi diɛŋtsɛ lɛ tsuɔ?
EHE SAJI KROKOMƐI
Obaale kuu ko ni bɔɔ mɔdɛŋ akɛ amɛbaahi shi yɛ Yesu Kristo tsɔɔmɔi lɛ anaa, ni amɛkase lɛ hu lɛ ahe saji.
Obaana bɔ ni fee ni yoo ko ni tuu ehe ehã Katolik jamɔ lɛ bafata Kristofoi diɛŋtsɛ lɛ ahe.
“Amɛjɛ Biblia Lɛ Mli Amɛhã Misanebimɔi Lɛ Fɛɛ Ahetoo!” (Buu-Mɔɔ, April 1, 2014)
Obaana bɔ ni Kristofoi diɛŋtsɛ lɛ jieɔ suɔmɔ kpo amɛtsɔɔ amɛnyɛmimɛi ni ehia amɛ lɛ.
Wɔyeɔ Wɔbuaa Wɔnyɛmimɛi Lɛ Kɛ́ Oshãra Ba—Vidio Lɛ Fã Ko (3:57)
Yesu tsɔɔ nɔ ni akɛbaale mɛi ni ji esɛɛnyiɛlɔi. Obaana akɛ, nakai blema Kristofoi lɛ fee, ni nakai nɔŋŋ mɛi ni ji Kristofoi diɛŋtsɛ ŋmɛnɛ lɛ hu feɔ.
“Mɛɛ Nibii Akɛyoɔ Anɔkwa Kristofoi?” (Buu-Mɔɔ, March 1, 2012)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
