REIREI 18
Aroni Kinaakia Kristian ni Koaua
Birion ma birion aomata aika taku bwa Kristian ngaiia. Ma a kakaokoro aia koaua, ao a kakaokoro naba kaetieti aika maiuakin. Ti na kangaa ngkanne ni kinaia Kristian ni koaua?
1. Antai te Kristian?
Kristian bon taan rimwin Iesu Kristo. (Wareka Mwakuri 11:26.) A na kangaa ni kaotia ae bon taan rimwin Iesu ngaiia? E kangai Iesu: “Ngkana kam teimatoa n taua au taeka, ao bon taan rimwiu ngkami.” (Ioane 8:31) Nanon aei bwa a riai Kristian ni koaua n ongeaba n ana reirei Iesu. Ao n aron Iesu ae kabotoi ana reirei i aon te Koroboki ae Tabu, a kabotoi naba aia koaua i aon te Baibara Kristian ni koaua.—Wareka Ruka 24:27.
2. A kangaa Kristian ni koaua ni kaotiota te tangira?
E tuangia taan rimwina Iesu ni kangai: “Kam na itangitangiri i marenami n arou ae I tangiringkami.” (Ioane 15:12) E kangaa Iesu ni kaotia ae e tangiriia taan rimwina? E kakabanea ana tai ma ngaiia, e kaungaia, ao e buokiia. E anga naba maiuna ibukia. (1 Ioane 3:16) N aron anne, a aki tii tataekina te tangira Kristian ni koaua. A kaotia n aia taeka ao n aia mwakuri bwa a bon itangitangiri i marenaia.
3. Tera te mwakuri ae a katabetabeia iai Kristian ni koaua?
E mwiokoiia taan rimwina Iesu n te mwakuri teuana. “E kanakoia bwa a na uarongorongoa taekan ana Tautaeka n Uea te Atua.” (Ruka 9:2) A aki tii uarongorongo Kristian rimoa n aia tabo n taromauri, ma n ana tabo naba te botannaomata ao ni mwengaia aomata nako. (Wareka Mwakuri 5:42; 17:17.) N aron anne, Kristian ni koaua ni boong aikai a uarongorongoa te koaua man te Baibara nakoia aomata n taabo nako. A tangiriia aomata nako, ngaia are a kukurei n anga aia tai ao korakoraia n tibwaa ana rongorongo te Baibara ae karekea te kantaninga ao te kabebeteaki.—Mareko 12:31.
REIAKINA AE BATI RIKI
Iangoia bwa ko na kangaa n ataa te kaokoro i marenaia Kristian ni koaua ao aomata aika aki kakairi n ana reirei ma ana katoto Iesu.
4. A ukera te koaua man te Baibara
Iai naba aika taku bwa Kristian ngaiia, ma e aki kakawaki irouia te koaua man te Baibara. Kaota te TAAMNEI, ao maroroakina te titiraki aei.
-
A kangaa Aaro tabeua ake a taku bwa Kristian ngaiia, ni kabwaka n reiakinia aomata baike e angareirei iai Iesu?
E angareirei Iesu i aon te koaua man Ana Taeka te Atua. Wareka Ioane 18:37, ao maroroakina te titiraki aei:
-
N aron ae taekinna Iesu, ti na kangaa ni kinaia Kristian aika “ira nanon te koaua”?
5. A uarongorongoa te koaua man te Baibara
Imwaini waeraken Iesu nako karawa ao e mwiokoiia taan rimwina n te mwakuri ae e reitinako karaoana n uaa ngkai. Wareka Mataio 28:19, 20 ao Mwakuri 1:8, ao maroroakina te titiraki aei:
-
E na maanra ao e na raababanakora te mwakuri n uarongorongo?
6. A maiuakina te baere a uarongorongoia
Tera are kairaki iai Tom bwa e na kakoauaa ae e a kunea te Aro ni Kristian ae koaua? Kaota te TAAMNEI, ao maroroakin titiraki aikai.
-
N aron ae oti n te taamnei, tera are e kaira Tom bwa e na kakeaa taekan te Aro?
-
E aera ngkai e kakoauaa ae e a kunea te koaua?
A anaaki riki nanoia aomata n am mwakuri nakon te bae ko taekinna. Wareka Mataio 7:21, ao maroroakina te titiraki aei:
-
Tera ae kakawaki riki iroun Iesu, taekinan te baere ti kakoauaa ke kaotana n ara mwakuri?
7. A itangitangiri i marenaia
A a tia Kristian ni karuanikaia maiuia ibukia raoia ni Kristian? Kaota te TAAMNEI, ao maroroakin titiraki aikai.
-
N aron ae oti n te taamnei, tera are e kaira Lloyd bwa e na karuanikaia maiuna ibukin Brother Johansson?
-
N am iango, e oti n te baere e karaoia ae bon te Kristian ni koaua ngaia?
Wareka Ioane 13:34, 35, ao maroroakin titiraki aikai:
-
Tera aroia taan rimwin Iesu (aika Kristian ni koaua) nakoia kaain te reeti ke te natannaomata teuana?
-
A na kangaa ni karaoa anne n tain te buaka?
A TAKU TABEMAN: “A kakaraoi baika buakaka Kristian, ao e na kangaa ngkanne ni koaua aia Aro?”
-
Tera te kibu ae ko kona n tibwaia, ae e na kaotia bwa ti boni kona ni kinaia Kristian ni koaua?
KAKIMOTOTOANA
Kristian ni koaua a kakairi n ana reirei te Baibara, a kaotiota te tangira ae a anga boni ngaiia iai, ao a uarongorongoa te koaua man te Baibara.
Kauring
-
A kabotoa aia koaua i aon tera Kristian ni koaua?
-
Tera te aroaro ae a kinaaki iai Kristian ni koaua?
-
Tera te mwakuri ae a karaoia Kristian ni koaua?
NORI NABA AIKAI
Nora riki taekaia te koraki aika kakorakoraia ni kakairi n ana katoto ma ana angareirei Iesu.
Nora te baere e kairaki iai te tina n te Aro ni Katorika ngkoa, bwa e na kunea “te botaki n itaritari” ni koaua.
“A Kamanena te Baibara ni Kaekai Iai Au Titiraki ni Kabane!” (Te Taua-n-Tantani, Eberi 1, 2014)
Nora aroia Kristian ni koaua ni kaotiota tangiraia raoia n te onimaki, aika kainnanoa te ibuobuoki.
Neneria bwa a kangaa Kristian rimoa ao aika ni boong aikai, n titeboo raoi aroia ma te baere e taekinna Iesu ae a kinaaki iai taan rimwina.
“Tera Kanikinaeaia Kristian ni Koaua?” (Te Taua-n-Tantani, Mei 1, 2012)”