Gã́bug nen kọ́ọ̀ bà gé nyoonìè nvéè Kráìst. Sõò bà náa ziga ló tẽ̀ènè kà nu àbèè ge tõó boo tẽ̀ènè kà nòòkúu. Vóà naa, mósĩ́ deè ní eé láá nyimá ló kà kà gbò níí Kráìst e?

1. Bà mée ní e bà dú gbò níí Kráìst e?

Gbò níí Kráìst dú gbò e bà gé nyoone nvéè Jíízọ̀s Kráìst. (Bugi Tóm 11:26.) Mósĩ́ deè ní e bà zógè kọọ̀ bà gé nyoonìè nvéè Jíízọ̀s e? Jíízọ̀s beè kọọ̀: “Ò dúì kà kà gbò ea gé nyooném nvée be ò biilii bá ló nà moǹ bel.” (Jọ́ọ̀n 8:31) Níí tõó dọ̀ kọọ̀, kà kà gbò níí Kráìst é íè ge gbàntṍ ló gbò nú e Jíízọ̀s nóòmà. Vaá dì belí Jíízọ̀s, kà kà gbò níí Kráìst é ziga ló gbò nú ea di mm̀ Kpá Káí.—Bugi Lúùk 24:27.

2. Mósĩ́ deè ní e kà kà gbò níí Kráìst ólò zogè kọ bà íèè vulè e?

Jíízọ̀s beè kọ́ nè pá a gbò nyòòne nvée kọọ̀: “Vulei ene, belí bé e nda vulè boolo naa.” (Jọ́ọ̀n 15:12) Mósĩ́ deè ní e Jíízọ̀s beè zogè kọ à vulèè pá a gbò nyòòne nvée ẽ́? A beè tú gã́bug tṍó tõ̀òmà vá ló, siè va kpóó ló, vaá nvèè bá nè va. Kàsĩ́, a beè ú vá boo. (1 Jọ́ọ̀n 3:16) Mm̀ tẽ̀ènè sĩ́deèá, níì áá gè kọ́ nú ea kil ló vulà ní e kà kà gbò e bà gé nyoone nvéè Kráìst é naaé nì. Bàé zógè kọ bà vulèè ene tení dú ló gbò bel e bà ló nè bé e bà lábví láb naa.

3. Mókà tóm ní e kà kà gbò níí Kráìst ólò sì e?

Jíízọ̀s beè nè tóm pá a gbò nyòòne nvée “kọ bàá àà gé vee kpẹ̀a ea kil ló Boǹ Méné Bàrì.” (Lúùk 9:2, NW ) Gbò níí Kráìst mm̀ túá gbò gbááá náa beè kọ́ kpẹ̀a gbẹá áá kiẽ́e e bà ólò tõo nè fã̀, sõò ba beè kọ nágé kpẹ̀a gbẹá kiẽ́e e gbò nen bọọ, nè gbẹá tọọ̀ gbò nen. (Bugi Tóm 5:42; 17:17.) Kà kà gbò níí Kráìst ólò noòmà gbò kà kà bel ea di mm̀ Kpá Káí kọ̀láá kiẽ́e e bà mon nen. Bà ólò vùlè dõòna gbò, vaá nyíé va ólò ẹẹ gè tú ba tṍó nè kói kọọmá gbò bel ea di mm̀ Kpá Káí nè va, ea dú gbò bel ea é náa kọ bàá ié ból dẽesĩ́ nè nvèè nyíé gbàà.—Máàk 12:31.

 KPÁÁ NÓ BỌ̀Ọ̀VẸ̀

4. Bà ólò gbĩ́tẽ́ gbò kà kà bel ea di mm̀ Kpá Káí

5. Bà ólò noòmà kà kà bel ea di mm̀ Kpá Káí

 6. Bà ólò naa gbò nú e bà nóòmà

Éé ní ea beè naa kọọ̀ Tom á àgala boo kọ a monìè kà kà gbò e bà gé nyoone nvéè Kráìst e? Bìlà VÍDIÒÍ, vaá ò gbóó aalai gbò bíb ea nyoone.

• Mm̀ vídiòá, éé ní ea beè naa kọọ̀ Tom á gá ié ná lèèmá mm̀ bõ̀ònaló fã̀ ẽ?

• Éé ní ea beè naa kọ á àgala boo kọọ̀ a monìè kà kà gbò e bà gé nyoone nvéè Kráìst e?

Láb e nen lábví ólò kọ́ gã́bug nú ea kilíé ló èlmà bel ea ló. Bugi Máátìù 7:21, vaá ò gbóó aalai nakà bíbví:

• Éé ní ea palàge bọọ́ ló Jíízọ̀s e—é kọọ̀ nú e kọ́ọ̀ è zigàẹ̀ ló sẹ̀ nú e bẹẹ láb zógè kọ è zigà ló é?

7. Bà ólò vulè ene

• Mó bá ní ea bọ́ló kọọ̀ kà kà gbò níí Kráìst á sẹ̀ẹ̀mà gbò e bà aa dõòna kà bálá sĩ́ àbèè dó é?

• Mósĩ́ deè ní e bàé láá naa vó tṍó bé gím ẽ́?

 NÚ E NI NÓ

Kà kà gbò níí Kráìst ólò gbàntṍ ló gbò nú e Kpá Káí nóòmà, ié dùm ge láá tú lóó vaamá gyọ́ọ, vaá vee kà kà bel ea di mm̀ Kpá Káí.

Ge Òòa Boo

• Éé ní e nú e kà kà gbò níí Kráìst ziga ló ólò dẹ̀ẹ̀a boo é?

• Mókà kpãa ní ea é náa kọ é nyimá ló kà kà gbò e bà gé nyoone nvéè Kráìst e?

• Mókà tóm ní e kà kà gbò níí Kráìst ólò sì e?