ƝAAKWƐLƐI 18
Gwa kilistalea leeleeɠaa kɔlɔn ləi ?
Nu miliyali tamaa da kɛ kɛi ma di kaa a kilistalea. Kəlaa mɛniɠaa di laana ho tanɔn ə ma kɛ di túwɔ́ pələɠaa. Yili ɓa gwa pɛli kilistalea leeleeɠaa kɔlɔn ɉii ləi ?
1. Da kɛ ma kilistalon yili mukulaa ɓaa lə ?
Kilistaleaɠaa kaa a Zesu ŋɔ kalan nea awala kɛtii nuai daa hwilɛn Zesu pulu (Gɛlaɠaa 11:26 ɓo). Da nɛ ləi diɛ ma di kaa a Zesu ŋɔ kalan nea ? Zesu ə mo yɛ ma : “ Akɛ ka kanan ŋɔ́ liɛwooɠaa diɛ, ka kaa kpɔ a ŋɔ́ kalan nɛa leeleeɠaa ” (Ɉaan 8:31). Yili mukulaa ɓaa, maanɛɛ kilistalea leeleeɠaa diɛ Zesu ŋɔ kalan-wooɠaa pɔ tuwɔ ɓo. Ə lɛɛ yɛ pələi kpɔlɔɔ Zesu ŋɔ kalan-nwooɠaa kɔwɔ hwilɛnŋaa kɛ la Yálá Lawoo mɛi, mɛniɠaa kilistalea leeleeɠaa laana, maanɛɛ lɔ gɔwɔ ə ɓo a vilɛnŋaa Biblə mɛi (Lukə 24:27).
2. Kilistalea leeleeɠaa da wɛlikɛmaalaa lɛ ləi ?
Zesu ə kɛ ŋɔ kalan nea diɛ : “ Ka ka kee wɛlilakɛ yɛ pələi ŋi ka wɛlilakɛ la ” (Ɉaan 15:12). Zesu ə nɛ ləi yɛ ma a ŋɔ kalan nea wɛlilakɛ ? Da diɛ ni di kɛi lowai kɛ gee ɓa, yɛ di hwaŋalɔ, ə lɛɛ yɛ kpɔnmaa tɛɛ di pɔ. Ə lɛɛ nwɔnɔ ə hwaa ma ə haa di maamɛni ɓa (Ɉaan dɔlɔɔ 3:16). Bələ lɔ ɓə gaa la, nuai a kilistalea leeleeɠaa di hwa wɛlikɛmaalaa maamɛni ɓo lɔ. Da wɛlikɛmaalaa lɛ di kee ni diɛ di hwaawoo hu ə ma kɛ di túwɔ́ pələ hu.
3. Kóló ləkɛɛ ɓə kilistalea leeleeɠaa yee kaa ma diɛ gɛ ?
Zesu ə kóló tɛɛ ŋɔ kalan nea pɔ. Ə mo diɛ yɛ diɛ : “ Ka li ka Yálá taa Tɔɔlaa maawɛlɛɛ lɛlɛɛ laa həli ” (Lukə 9:2). Kilistalea tolooɠaa di ho kɛi lɔ Yálá Lawoo ɓo nua diɛ di yəi galan gələɠaa mu. Di kɛi li diɛ Yálá Lawoo laahəli pɛlɛɠaa laaləi da ɓɛi nu kpuluɠaa di kɛ laa (Gɛlaɠaa 5:42 ; 17:17 ɓo). Bələ lɔ ɓə gaa la háákələi, kilistalea leeleeɠaa da Yálá Lawoo laahəli ɓɛi lɔpee gəlee nua da kɛ laa. Da nu takpɛliɠaa wɛlilakɛ, yili ɓa, da di wɔ lowai həɠə a kwəinɛɛ da di hwaŋa, gilitɔɔmaa wɛlɛɛ da hwaŋalɔwooi di gaa Biblə hu diɛ naahəli nua diɛ (Markə 12:31).
Ə́ WƆ MƐNIKƆLƆNŊAA TA PƐLƐ MA
Gaa pələi ya pɛli kilistalea leeleeɠaa da nuai di hwa hwilɛn Zesu ŋɔ kalan-nwooɠaa pulu di kulɔbɔ kɛi la.
4. Da Biblə ŋɔ teɲaɠaa kwɛli
Kilistalea tolooɠaa di kɛi Yálá wɛlilakɛ
Nuai da kɛ ma di kaa a kilistalea, gəlee hwəi da Biblə ŋɔ teɲa wooɠaa həɠə a di yee hweelɛ. VIDIO kaa, ə lɛɛ ka lono kɛ gɛɛmaalən ŋɛi mɛi.
-
Kalangbɔnŋaai da kɛ di kpɔɔ kɛi a kilistalea, lə mɛniɠaa ɓə di gɛ ə gɛ nua di ho hiɛ a Zesu ŋɔ kalan-nwooɠaa ?
Deɲaa wooɠaai Yálá Lawoo hu diɛ ɓə Zesu ə kɛi nɛ. Ɉaan 18:37 ɓo, ə lɛɛ ka lono kɛ gɛɛmaalən ŋɛi mɛi :
-
Yɛ pələi Zesu ə mo la, kilistaleaɠaai di kaa “ teɲa pələ mɛi ” gwa di kɔlɔn nəi ?
5. Da Biblə ŋɔ teɲa wooɠaa laahəli
Kilistalea tolooɠaa diɛ Yálá Lawoo laahəli nu takpɛliɠaa diɛ
Gɛɛ Zesu ho tɛ yələkɔlɔn ɉu ə kóló ta tɛɛ ŋɔ kalan neai pɔ yii gaa lɔ nii ma háákələi. Matie 28:19, 20 (Ɉɛɓɛ Yili Ninɛ) da Gɛlaɠaa 1:8 ɓo, ə lɛɛ ka lono kɛ gɛɛmaalən ŋɛi mɛi :
-
Maanɛɛ kɛ Yálá Lawoo laa ə həli ə lɛɛ la ɉu minɛ, ə lɛɛ maanɛɛ kɛ Yálá Lawoo laa həli ə lɛɛ la ɉu minɛ lowai ?
6. Yii da galan da bɔ tuwɔ ɓo
Lə ɓə gɛ Tom yɛ laana kpɔ a neelee yɛ ma aa kulɔ kilistalea leeleeɠaa diɛ ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Vidio hu, lə ɓə gɛ Tom hwii yɛ kpɛɛ kpɔ kɛnɛ kalan mɛni hu ?
-
Lə ɓə gɛ Tom yɛ laana kpɔ a neelee yɛ ma aa kulɔ kilistalea leeleeɠaa diɛ ?
Nu a kɛ ma gaa a Zesu ŋɔ kalan non ya lɔ hwaa ə mo naaləi maanɛɛ ə yili lɛ tii duwɔ pələ hu. Matie 7:21 ɓo, ə lɛɛ ka lono kɛ gɛɛmaalən ŋɛi mɛi :
-
Zesu ɲɛi ɓa, lə mɛni ɓa ya lɔ hwaa gu mo guɔ ma gu kaa a ŋɔ kalan non ?
7. Da di kee ni wɛlilakɛ
Kilistalea tolooɠaa ə lɛɛ diɛ di kee ni wɛlilakɛ
Kilistalea daa ta di nan nonnii di wɔ yɛnɛɛ maakɔnwɔ, ə ma kɛ diɛ kpinii da pɛli mu kɛ di hwɛɠɛ di wɔ yɛnɛɛ hu ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Vidio hu, LIoyd hwaa kɛ ma ə Johansson ŋɔ yɛnɛɛ maakɔnwɔ, ə lɛɛ a pɛli kɛ mun ə hwɛɠɛ yaa kpinii ŋɔ yɛnɛɛ hu. Lə mɛni ɓa ə hwaa tii ma ?
-
Ə́ wɔ kili ɓa ə tuwɔ yɛ kilistalon neelee túwɔ́ pələ ?
Ɉaan 13:34, 35 ɓo, ka lono kɛ gɛɛmaalənŋaa ŋɛi mɛi :
-
Zesu ŋɔ kalan nea leeleeɠaa da lɔi ta kpɛli hu nua hon ləi awala kɛtii huwu takpɛliɠaa ?
-
Ɓɛlowai kɔ a too la da túwɔ́ ləi a nua tɔnɔi tii ?
NUTAƓAA DA KƐ KƐI MA : “ Yálá tɔnɔ lɔ ɓə kilistalea kəlee da matoo ə ma kɛ di hwa kɛ lii kalan gələ tɔnɔ mu. ”
-
Nuta a mo tii yɛ́ vɛlisɛɛ ləkɛɛ ɓə ya ɉəɠə ɉu, yɛ́ pɛli ɉukulɔi pələi gwa pɛli kilistalea neeleeɠaa kɔlɔn ɉii la ?
YII GU GALAN
Kilistalea leeleeɠaa da Biblə wɔ kalan-nwooɠaa pɔ tuwɔ ɓo, diɛ di kee ni wɛlilakɛ kpɔ a neelee, ə lɛɛ diɛ Yálá Lawoo laahəli nua diɛ.
Nɛɛ ə́ kili pɔ
-
Kilistalea leeleeɠaa di wɔ kalan-nwooɠaa kɔwɔ hwilɛnŋaa lə mɛi ?
-
Túwɔ́ pələ ləkɛɛ ɓə da pɛli kilistalea leeleeɠaa kɔlɔn ɉii la ?
-
Kóló ləkɛɛ ɓə kilistalea leeleeɠaa yee kaa ma diɛ gɛ ?
MƐNI TAKPƐLIƓAA :
Mɛni tamaa kɔlɔn yɛ hwilɛn na kpulu ta ɓa yii a zə-mɛni kəlee kɛ, yɛ pɛli hwilɛn ɉii Zesu ŋɔ kɔɔmaa pulu da ŋɔ kalan nwooɠaa.
Gaa yii kpɔnmaa tɛɛ Yálá kóló kɛ nɛɛnu ta pɔ yɛ pɛli kulɔi “ Yálá ɓatoo nua leelee ” diɛ.
“ Di ŋɔ́ kɛɛmaalənŋaa tɛi-tɛi kəlee mukulɔ a Biblə ! ” (La Tour de Garde, 1er avril 2014)
Gaa pələi kilistalea leeleeɠaa da wɛlikɛmaalaa lɛ la di ɓəlaa kalan nea diɛ diɛi di maakpaan gaa kpɔnmaa ɓa.
Kpɔnmaa gu nan nonnii di dɛɛ ɓɛlowai kɛɛ ə kala la kɛɛnaa ta (Vidio naa ta) (3:57)
Gaa pələi kilistalea leeleeɠaa háákələi lɔi mɛi, da kilistalea tolooɠaa pɔɔkɔɔn na.
“ Lə ɓə da kilistalea leeleeɠaa kɔlɔn na ? ” (La Tour de Garde, 1er mars 2012)
