LISYOON 18

Wii khene mer wise weer ti woere kriste sin?

FOERXPIILE

In te kans welt, pilyoone layt saan tas se kriste sin. Awer net al klaape aan ti selwiche tinge orer hale in ti selwiche inlërnunge. Tan, wii khene mer wise weer ti woere kriste sin?

1. Was is eene krist?

Eene krist is eene tisipel, orer, eene woo Yeesus Kristus noo keet. (Lees Aphostele sayn Kexicht 11:26.) Was tsaycht tas yemant Kristus sayne tisipel is? Yeesus hot kesaat: “Wën teyer in mayn wort playpt, sayt teyer wërklich mayn tisipele.” (Yoohan 8:31) Tas petayt tas eene woere krist mus aan heere was Yeesus in kelërnt hot. Ales was Yeesus in kelërnt un kemacht hot, hot mit Kot sayn Wort kextimt. Soo aach, ales was ti woere kriste saan un mache, mus xtime mit te Piipel. — Lees Lukas 24:27.

2. Wii tsayche ti woere kriste liip?

Yeesus saat fer sayn tisipele: “Liipt eene te anere, soo wii ich aych keliipt hon.” (Yoohan 15:12) Wii hot Yeesus ketsaycht tas tee sayn tisipele liipe teet? Tee hot sayn tisipele keholef un uf kemuut, un hot mit tëne tsayt rom kepracht. Yeesus hot soo kaar sayn leepe fer tëne kep. (1 Yoohan 3:16) Soo aach, ti woere kriste mache mee wii ploos xpreche iwich liip. Tii tsayche mit wërter un aktsyoone tas se wërklich eene te anere liipe.

3. In was fer aarwayt xtrenge ti woere kriste sich aan?

Yeesus hot een wichtich aarwayt fer sayn tisipele kep. “[Tee] hot se kexikt Kot sayn Raych preetiche.” (Lukas 9:2) Ti eyerste kriste hon net ploos kepreeticht uf ti pletse woo ti layt Kot aan kepeet hon. Awer tii hon aach uf anere pletse woo layt waare un aan ti layt sayn hayser kepreeticht. (Lees Aphostele sayn Kexicht 5:42; 17:17.) Hayt se taach, tuun ti woere kriste aach ti woerheete fon te Piipel preetiche ekaal woo ti layt sin. Tii liipe ti mënxe. Tes weeche, fraye se sich fer iire tsayt un kraft aan wëne fer tas piiplix pexeet fon troost un hofnung in lërne. — Markus 12:31.

LËRN MEE

Mërk te unerxiit tswixich woere kriste un tii woo net Yeesus sayn inlërnunge in hale un sayn payxpiil noo mache.

4. Tii suuche piiplixe woerheete

Ti friirixe kriste hon Kot sayn Wort aan keheert

Net al woo saan tas se kriste sin tenke tas es wichtich is ti woerheet woo in te Piipel xteet wise. Kukt te WIITEO. Noochte xprecht iwich tiise frooch:

WIITEO: Wii tas kristenthum sich fon te woerheet ap kelënkt hot (5:11)

Was hon etliche khëriche woo sich kriste nëne in kelërnt woo net xtimt mit was Yeesus in kelërnt hot?

Yeesus hot ti woerheet fon Kot sayn Wort in kelërnt. Leest Yoohan 18:37. Noochte xprecht iwich tiise frooch:

Soo wii Yeesus saat, wii khene mer wise weer sin ti kriste woo “uf te sayt fon te woerheet” sin?

5. Tii preetiche ti woerheet fon te Piipel

Ti friirixe kriste hon ti kuute notisye kepreeticht

Eep Yeesus tsurik tsum himel kang is, hot tee sayn tisipele een aarwayt kep woo hayt noch foran keet. Leest Matheus 28:19, 20 un Aphostele sayn Kexicht 1:8. Noochte xprecht iwich tiise frooche:

Meechte ti kuute notisye ploos uf etliche pletse kepreeticht wëre? Wii lang teete se kepreeticht wëre?

6. Tii mache was se in lërne

Was hot kemacht tas eene man woo Tom heest sich sicher waar tas eyer ti woere kriste kefun hot? Kukt te WIITEO. Noochte xprecht iwich tiise frooche:

WIITEO: Ich wolt niks mee iwer relichyoone wise (5:20)

Im wiiteo, was hot kemacht tas Tom niks mee wise wolt fon te relichyoone?
Was hot Tom ti sicherheet kep tas tee ti woerheet kefun hat?

Was ma macht hot mee weyert wii was ma saat. Leest Matheus 7:21. Noochte xprecht iwich tiise frooch:

Was is wichticher fer Yeesus: was ma saat woo ma klaape teet orer was ma pewayst mit was ma macht?

7. Tii liipe eene te anere

Ti friirixe kriste hon eene te anere keliipt

Meechte ti kriste wërklich sayn leepe riskiirt hon fer iire priiter rete? Kukt te WIITEO. Noochte xprecht iwich tiise frooche:

WIITEO: Tee waar perayt fer sayn leepe ap kepe (2:55)

Im wiiteo, was hot kemacht tas Lloyd sayn leepe riskiirt hot fer sayne pruuter Johansson rete?
Mënst tuu tas Lloyd sich aan kextelt hot wii een woere krist?

Leest Yoohan 13:34, 35. Noochte xprecht iwich tiise frooche:

Wii teete Yeesus sayn tisipele (ti woere kriste) eene te anere pehantele? Meecht tas fer tëne unerxiit mache tëm mënx sayn ras orer tas lant woo tee heyer khomt?
Meechte se liip tsayche soo kaar wëns kriich kept?

ETLICHE SAAN: “Kot nëmt ale klaape aan.”