AJUMTALÁB 18
¿Jantʼiniʼ ki exlaʼ jitaʼchik chubax pel i aykol kʼal a Cristo?
Yan i atikláb in ulal abal pel i aykol kʼal a Cristo, pero lej pílits jawaʼ in belálchik ani jawaʼ in tʼajál. Tam, ¿jantʼiniʼ i éjtowal ki exlaʼ jitaʼchik chubax pel i aykol kʼal a Cristo?
1. ¿Jantʼiniʼ játs jitaʼchik chubax pel i aykol kʼal a Cristo?
An aykolchik kʼal a Cristo in nítsʼbiyal jawaʼ jajáʼ in uluw ani in tʼajaʼ (ka ajiy Hechos 11:26). ¿Jantʼiniʼ in tejwamedhálchik abal in nítsʼbiyal a Cristo? A Jesús in uluw: «Max ka bínaʼ [...] a xutsun kʼal an kaw axi nanáʼ u olnál, pel it lej chubax exóbal kʼal nanáʼ» (Juan 8:31). Jitaʼchik chubax pel i aykol kʼal a Jesús kwaʼal kin eyendhaʼ tin ejatal jawaʼ jajáʼ tu exóbchij. In belálchik jawaʼ kʼwajat ti Biblia, antsanáʼ jantʼiniʼ in tʼajaʼ a Jesús (ka ajiy Lucas 24:27).
2. ¿Jantʼiniʼ in tejwamedhál an aykolchik kʼal a Cristo abal u kʼanidháx?
A Jesús in uchaʼ in aykolil: «Kit kʼanidháxin jun kʼal axi jun [...] antsanáʼ jantʼiniʼ nanáʼ in kʼanidhom kʼal tatáʼchik» (Juan 15:12). ¿Jantʼiniʼ in tejwamédhaʼ a Jesús abal in kʼanidhálak in aykolil? In jolkʼálak i kʼij abal ka kʼwajiy kʼal jajáʼchik, in otsʼówiyalak, in tólmiyalak ani ma in bínaʼ in ejatal abal kʼal jajáʼchik (1 Juan 3:16). In aykolil a Jesús yab expidh in ulal abal u kʼanidháx, in tejwamedhál kʼal jawaʼ in tʼajál.
3. ¿Jawaʼ játs an tʼojláb axi más exbadh axi in tʼajál in aykolil a Cristo?
A Jesús in bijchij in aykolil kin tʼajaʼ jun i tʼojláb lej exbadh, in «abaʼchik kin ólnanchij an inikchik an alwaʼ kaw» tin kwéntaj in Eyaltal a Dios (Lucas 9:2). An kʼaʼál aykolchik kʼal a Cristo yab expidh u ólnomak juʼtáj tu támkunal, jayej u kʼalelakchik kin aliy an atikláb tin kʼimáʼ ani ma juʼtámakits kin elaʼchik (ka ajiy Hechos 5:42; 17:17). Xowéʼ ta kʼicháj in aykolil a Cristo jayej in olnál an alwaʼ kaw juʼtámakits ka kʼwajiy. In kʼanidhálchik in at kʼwajíl, jaxtám in eyendhál patal jawaʼ in kwaʼal abal ka kʼalej kin kanatbédhaʼchik ani kin tólmiy abal kin bajuw an ejataláb abal etsʼey (Marcos 12:31).
ABAL KA EXÓBNAʼ MÁS
Ki tsuʼuw jaleʼ ti yab junat in aykolil a Jesús kʼal an atiklábchik axi expidh in ulal abal pel i aykol.
4. Etsʼey in eyendhálchik an Biblia
In aykolil a Jesús axi ti kʼaʼál siglo in pidhálak in jalbíl in Káwintal a Dios
Yab patal jitaʼ in ulal abal pel i aykol kʼal a Cristo in belkál jawaʼ in ulal an Biblia. Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jantʼiniʼ ti kʼanchat yan i atikláb kʼal an iglesias abal kin exlaʼ jawaʼ a Jesús tu ólchij?
A Jesús in exóbchij an atiklábchik in káwintal a Dios. Ka ajiychik Juan 18:37 ani ka tsálpaychik kʼal axéʼ:
-
Kʼal jawaʼ in uluw a Jesús, ¿jantʼiniʼ ti éjtowal ki exlaʼ jitaʼchik játs axi chubax «in pútuwal kʼal an chubaxtaláb»?
5. In olnálchik jawaʼ in ulal an Biblia
In aykolil a Jesús u ólnomak
Tam ti a Jesús neʼetsakits ka wichiy tiwaʼ ti éb, in jílchij jun i exbadh tʼojláb in aykolilchik, ani ma xowéʼ belej kʼwajat ti tʼajnal. Ka ajiychik Mateo 28:19, 20 ani Hechos 1:8, ani ka tsálpaychik kʼal axéʼ:
-
¿Ma juʼtáj neʼetsak ka olnáj an alwaʼ kaw ani ma jaykʼiʼ?
6. In tʼajálchik jawaʼ in olnál
¿Jaleʼ a Tom in lej belál abal in elamal jitaʼchik chubax pel i aykol kʼal a Cristo? Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jaleʼ ti lej tʼeʼpindháj a Tom kʼal jawaʼ in tsuʼuw ban iglesias?
-
¿Jaleʼ in lej belál abal in elamal an kʼakʼnaxtaláb axi chubax?
Jawaʼ ki uluw kwaʼal ki tejwamédhaʼ kʼal jawaʼ i tʼajál. Ka ajiychik Mateo 7:21 ani ka tsálpaychik kʼal axéʼ:
-
¿Jantʼoj játs axi más exbadh abal a Jesús: jawaʼ i ulal o jawaʼ i tʼajál?
7. U kʼanidháxchik
In aykolil a Jesús u kʼanidháxak
In aykolil a Jesús, ¿in kʼaniyamal in epchalchik? Ka tsuʼuwchik an VIDEO, ani ka tʼilaʼchik jawaʼ a tsuʼuw:
-
¿Jaleʼ ti an epchal Lloyd neʼetsak kin bínaʼ in ejatal abal kin kʼaniy an epchal Johansson?
-
¿A tsálpayal abal chubax in tejwamédhaʼ abal pel i aykol kʼal a Cristo?
Ka ajiychik Juan 13:34, 35 ani ka tsálpaychik kʼal axéʼ:
-
¿Jantʼiniʼ ti kwaʼal kin tsuʼuw in aykolil a Jesús an atiklábchik axi pil in wal ani in bichówil?
-
¿Jantʼiniʼ neʼetsak kin putuw axéʼchik xi abatnaxtaláb tam ka waʼtsin i pextaláb?
JAWAʼ TALCHIK IN TSÁLPAYAL: «Yan i atikláb axi in ulal abal pel i aykol kʼal a Cristo in tʼajámal yan jantʼoj axi kidháb. Jaxtám, yab chubax pel i aykol kʼal a Cristo».
-
¿Jawaʼ tam texto axi ti Biblia neʼets ka eyendhaʼ abal ka tejwamédhaʼ jitaʼchik chubax pel i aykol kʼal a Cristo?
JAWAʼ I EXOBNÁMAL
In aykolilchik a Jesús in belkál jawaʼ in ulal an Biblia. In tejwamedhálchik abal chubax u kʼanidhom ani in olnálchik an alwaʼ kaw.
Ki tʼilaʼ jawaʼ i exóbnaʼ
-
¿Juʼtáj in kaldhálchik jawaʼ in belál in aykolil a Jesús?
-
¿Jantʼoj játs axi más in tejwamedhál axi chubax pel i aykol kʼal a Jesús?
-
¿Jawaʼ játs an tʼojláb axi más exbadh abal jajáʼchik?
KA EXÓBNAʼ JANTʼOJ ÍT
Ka exlaʼ más alwaʼ an mudhél i atikláb axi kʼwajat in tsápnanchal kin nitsʼbiy a Jesucristo.
Ka ajiy jantʼiniʼ jun i mimláb axi pelak i monja in elaʼ in jaʼúb kʼal axi chubax u kʼanidháb.
Ka tsuʼuw jantʼiniʼ in aykolil a Jesús chubax u kʼanidháx ani u tolmíx.
I tólmiyal an epchalchik tam in watʼál i yajchiktaláb (pejach) (3:57)
A Jesús in uluw jantʼiniʼ ti neʼetsak ka exláj in aykolil. Ka tsuʼuw jantʼiniʼ tu exlábak ti kʼaʼál siglo ani jantʼiniʼ tu exláb xowéʼ
«¿Jantʼiniʼ ti más u exláb axi chubax pel i aykol kʼal a Cristo?» (La Atalaya, 1 de marzo de 2012)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
