EHONGWA 18
Mo yenene okutjiwa vi kutja Ovakriste vatjiri ooveṋe
Ovandu ovengi ve tja Ovakriste. Posi yokutja owo ve nozongamburiro nḓa panguka nu kave hupu otja komirari vimwe. Nu hapo matu yenene okutjiwa vi kutja Ovakriste vatjiri ooveṋe?
1. Omukriste omundu ngu ri vi?
Ovakriste ovakambure poo ovahongewa va Jesus Kristus. (Lesa Oviungura 11:26.) Hapo owo ve raisa vi kutja ovahongewa va Jesus? Jesus wa tja: “Tji mwa panḓere pomahongero wandje, tjiri, oweṋe ovahongewa vandje.” (Johanes 8:31) Ihi matji hee kutja Ovakriste vatjiri mave sokuṱakamisa omahongero wa Jesus. Tjimuna Jesus tjaa ṱaṱere kOmatjangwa okuṋunisa imbi mbi ma hongo, Ovakriste vatjiri wina ve tjita nao.—Lesa Lukas 24:27.
2. Ovakriste vatjiri ve raisa vi orusuvero?
Jesus wa raera ovemukongorere kutja: “Suverasaneye otja punga ambe mu suvera.” (Johanes 15:12) Omomuano uṋe Jesus ma raisa kutja wa suvera ovahongewa ve? Eye aa twa po oruveze okukara pu na wo, okuvetunduuza nokuvevatera. Eye wina wa yandja omuinyo we okuveṱira. (1 Johanes 3:16) Momuano otjingewo, Ovakriste vatjiri kave hungire ohunga norusuvero uriri, nungwari wina ve raisa kutja va suverasana momambo na movitjitwa vyawo.
3. Ovakriste vatjiri ve ungura otjiungura tjiṋe?
Jesus wa yandja otjiungura kovahongewa ve. Eye we “ve hinda okukazuvarisa Ouhona waNdjambi.” (Lukas 9:2) Ovakriste ovakuru kaave zuvarisa motuveze twawo twomerikotameneno uriri, nungwari wina aave zuvarisa momivanda na mozondjuwo zovandu. (Lesa Oviungura 5:42; 17:17.) Ovakriste vatjiri ndino wina ve zuvarisa ouatjiri wOmbeibela potuveze ngamwa pu va munu ovandu. Owo va suvera ovandu nu mena ranao ve ungurisa oruveze nomasa wawo okuhaṋasana ombuze yomahuhumiṋino noyomaundjiro ku na wo.—Markus 12:31.
KONḒONONA OUKOTO
Tara kutja mo yenene vi okuhaṋa Ovakriste vatjiri kovandu mbe ha kongorere nokuṱakamisa omahongero wa Jesus.
4. Owo ve paha ouatjiri wOmbeibela
Embo ra Mukuru ra ri enanḓengu kOvakriste voruveze orukuru
Ovandu tjiva mbe tja Ovakriste kave munu kutja ounahepero okuzuva ouatjiri wOmbeibela nawa nokuuṱakamisa. Nyanda OKAVIDIO, nu okuzambo hungirira kepuriro ndi.
-
Ovanane vozokereka tjiva mbaave ritja Ovakriste aave tjaere vi ovandu okurihonga ohunga noviṋa Jesus mbyaa hongo?
Jesus aa hongo ouatjiri okuza mEmbo ra Mukuru. Lesa Johanes 18:37, nu okuzambo hungirira kepuriro ndi:
-
Otja komambo wa Jesus Ovakriste mba “za mouatjiri“ owo mba mbe tjita vi?
5. Owo ve zuvarisa ouatjiri wOmbeibela
Ovakriste voruveze orukuru va zuvarisa ku varwe
Ngunda Jesus e hi ya yaruka keyuru, eye wa yandja otjiungura kovemukongorere tji tji kayenda nga ku ndino. Lesa Mateus 28:19, 20 nOviungura 1:8, nu okuzambo hungirira kepuriro ndi:
-
Hapo otjiungura tjokuzuvarisa matji zuvarisiwa tjinene pu pe ṱa pi nu matji zuvarisiwa kotungeveze?
6. Owo ve ṱakamisa imbi mbi ve zuvarisa
Otjikwaye tji tja yandja ongamburiro komurumendu wena Tom kutja wa muna ongamburiro yatjiri? Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio, otjikwaye tji tja tjita kutja Tom ma pandjare ongamburiro mozongamburiro?
-
Otjikwaye tji tji mu pa ongamburiro kutja eye wa muna ouatjiri?
Oviṋa ovandu mbi ve tjita ovinanḓengu pu imbi mbi ve hungira. Lesa Mateus 7:21, nu okuzambo hungirira kepuriro ndi:
-
Otjikwaye tji tji ri otjinanḓengu ku Jesus? Oviṋa mbi tu tja tu kambura mo poo oviṋa mbi matu raisa movitjitwa vyetu?
7. Owo va suverasana
Ovakriste voruveze orukuru va suverasanene
Hapo Ovakriste vatjiri ve twa mo omiinyo vyawo moumba okuvatera Ovakriste ovakwao? Nyanda OKAVIDIO, nu okuzambo hungirira komapuriro ngu maye kongorere mba.
-
Mokavidio, otjikwaye tji tja hinga Mbuti Lloyd okutwa mo omuinyo we moumba kutja ma yame Mbuti Johansson?
-
Hapo mo munu kutja eye we ritjinda otjOmukriste watjiri?
Lesa Johanes 13:34, 35, nu okuzambo hungirira komapuriro nga:
-
Omomuano uṋe ovahongewa va Jesus, owo mbe ri Ovakriste vatjiri, mu ve tjinda ovandu mba za momihoko poo oviwaṋa vyarwe?
-
Owo mave tjindasana vi movita?
OVANDU TJIVA VE TJA: “Ovakriste va tjita oviṋa ovivi tjinene, hapo owo mave yenene vi okukara nongamburiro youatjiri?”
-
Etjangwa riṋe ndi mo yenene okulesera omundu okumuraisira kutja Ovakriste vatjiri ooveṋe?
OKUYARUKIRA PO OUSUPI
Ovakriste vatjiri ve ṱakamisa omahongero wOmbeibela, ve raisa orusuvero rwapeke nu ve zuvarisa ouatjiri wOmbeibela.
Okurizemburukisa
-
Ongamburiro yOvakriste vatjiri ya zikamena ku ye?
-
Otjikaṋena tjiṋe tji tji tjiukisa Ovakriste vatjiri?
-
Ovakriste vatjiri ve ungura otjiungura tjiṋe?
RIHONGA OVINGI
Rihonga ovingi ohunga notjimbumba tji tji kondja nomasa okuṱakamisa omahongero wa Jesus Kristus nokuhorera kotjihorera tje.
Tara kutja otjikwaye tji tja tjita kutja omukazendu ngwa ri o-nun yOkatolika ma mune ‘eṱunḓu ratjiri.’
“Va ungurisa Ombeibela okuzira omapuriro wawo ayehe!” (Oruhungu, 1 ku April, 2014)
Rihonga kutja Ovakriste vatjiri ve raisa vi orusuvero kovakambure ovakwao mbu mave hepa ombatero.
Okuvatera ovakambure ovakwetu indu tji kwa tjitwa oumba—Okarupa okasupi (3:57)
Konḓonona omuano Ovakriste ovakuru nOvakriste vatjiri ndino mu ve tjita oviṋa Jesus mbya tja mavi tjiukisa ovemukongorere.
“Ovikaṋena viṋe Ovakriste vatjiri ku ve tjiukirwa?” (Oruhungu, 1 ku Marta, 2012)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
