ƐLĀ Ō NWU ƆMƐ 18
Ɛgɛ Nɛ A Géē Jé Ācɛ O Yɛce Ukraist Ɔkwɔɔkwɛyi A
Ubiliyɔn alɛwa ku ācɛ gē ka ku aa wɛ Ācɛ O Yɛce Ukraist. Amáŋ ɛjɛɛji uwa i kéē kpɔtuce ɛlā ekponu ŋ. É klla gē lā oyeeyi ɔwɛ ekponu ŋ duu. Ó lɛ a, ɛgɛnyá nɛ alɔ gáā jé Ācɛ O Yɛce Ukraist ɔkwɔɔkwɛyi a?
1. Anyɛ wɛ Ācɛ O Yɛce Ukraist ɔkwɔɔkwɛyi a?
Ācɛ O Yɛce Ukraist ɔkwɔɔkwɛyi wɛ ayikpo ku Ujisɔsi Ukraist amāŋ acɔlohɔnyɛta. (Jé Úklɔ́ kú Ācotɛ̄hɔ̄ 11:26.) Ɛgɛnyá néē gē mafu kéē wɛ ayikpo ku Ujisɔsi a? Ujisɔsi kahinii: “Ɔ́dāŋ́ ka aá géē lɛyítáajɛ lɛ ɛlā kú um, aá géē wɛ ayíkpó kú um ɔkwɛ̄yi.” (Ujɔ́ni 8:31) Ɛnyā wɛ ka Ācɛ O Yɛce Ukraist ɔkwɔɔkwɛyi géē lɛyitaajɛ lɛ ɛlā ō nwu ku Ujisɔsi. Ɛgɛ nɛ ɛlā ō nwu ku Ujisɔsi doodu ŋma ipu Ubáyíbu a, ɔdā nɛ Ācɛ O Yɛce Ukraist ɔkwɔɔkwɛyi kpɔtuce a cika ō ŋma ipu Ubáyíbu.—Jé Ulúku 24:27.
2. Ɛgɛnyá nɛ Ācɛ O Yɛce Ukraist ɔkwɔɔkwɛyi gē mafu ihɔtu a?
Ujisɔsi da ayikpo ku nu kahinii: “Aá yíihɔtū tá ɔ́mpa aá ɛ́gɛ́nɛ̄ n yíihɔtū tū aá lɛ ā.” (Ujɔ́ni 15:12) Ɛgɛnyá nɛ Ujisɔsi mafu kóō yihɔtu ayikpo ku nu a? Ó gē lɛ eko taajɛ gē yɔ mla uwa, ó gē ta uwa ɔtu kwu ɔtu klla gē ta uwa abɔ. Ó klla lɛ oyeeyi ku nu gwɛɛya ohigbu uwa. (1 Ujɔ́ni 3:16) Bɛɛka Ujisɔsi a, ācɛ nōo gē yɛce ɔ ɔkwɔɔkwɛyi a i gē kɛla lɛyikwu ihɔtu anca ŋ. É gē ma ɔ fu ipu ɛlā ō ka mla uce ō ya ku uwa kéē yihɔtu iyi uwa.
3. Uklɔ nyá nɛ Ācɛ O Yɛce Ukraist ɔkwɔɔkwɛyi gē ya a?
Ujisɔsi je uklɔ lɛ ayikpo ku nu kéē ya. “Ó lɛ uwá tɛ̄hɔ̄ gɛcɛ kéē nyɔ̄ gaá tɔ́ɔna kú olɛhɔ̄ kú ajɔ̄ɔ̄cɛ́ kú Ɔwɔicō.” (Ulúku 9:2) Ācɛ O Yɛce Ukraist ku eko aflɛyi a i gē tɔɔna ɛga ō gba ɛ̄gbā ku uwa foofunu ŋ, amáŋ é gē tɔɔna ɛga nɛ ācɛ gē yɔ mla ɔlɛ ku ācɛ duu. (Jé Úklɔ́ kú Ācotɛ̄hɔ̄ 5:42; 17:17.) Ācɛ O Yɛce Ukraist ɔkwɔɔkwɛyi icɛ gē tɔɔna ku ɔkwɛyi nōo yɔ ipu Ubáyíbu a ɛga duuma néē má ācɛ. É yihɔtu aoladogbe ku uwa, ohigbu ɛnyā é gē bi eko mla ɔfu ku uwa le tɔɔna ku olɛhɔ ku Ubáyíbu lɛyikwu eyiyoce mla ɔtoole.—Umáki 12:31.
JÉ GƆBU
Gbɛla lɛyikwu ɔdā nōo gē ya ku Ācɛ O Yɛce Ukraist ɔkwɔɔkwɛyi kéē wɛ ɛyɛɛyi gwu ācɛ nōó gē yɛce ɛlā ō nwu mla ocabɔ ku Ujisɔsi ŋ ma.
4. É gē bɔkwu ɛlā ɔkwɛyi ku Ubáyíbu
Ɛlā ku Ɔwɔico jɛ Ācɛ O Yɛce Ukraist ku eko aflɛyi a eyī
Ó wɛ ɛjɛɛji ācɛ nōo gē ka ku aa wɛ Ācɛ O Yɛce Ukraist a gbɛla kóō cɛgbá kéē bi ɔkwɛyi ku Ubáyíbu le yuklɔ a ŋ. Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ɔdi nɛ aicɔɔci nōo ka ku aa wɛ Ācɛ O Yɛce Ukraist a ya kéē ci ācɛ ŋma ō nwu ɛlā lɛyikwu ɛlā nɛ Ujisɔsi nwu a?
Ujisɔsi nwu ɔkwɛyi ŋma ɛlā ku Ɔwɔico. Jé Ujɔ́ni 18:37, cɛɛ ku aa kɔka lɛyikwu ɔka nyā:
-
Ɛgɛ nɛ Ujisɔsi ka a, ɛgɛnyá nɛ alɔ gáā jé Ācɛ O Yɛce Ukraist “nōo cɛ̄ɛla ɔkwɛ̄yi ā”?
5. É gē tɔɔna ku ɔkwɛyi ku Ubáyíbu
Ācɛ O Yɛce Ukraist ku eko aflɛyi a tɔɔna lɛ ācɛ ɔhá
Gbɔbu ɛɛ ka Ujisɔsi kóō gā ɔkpanco a, ó je uklɔ lɛ ayikpo ku nu kéē ya nōo kéē yɔ i gɔbu jaa kwu icɛ. Jé Umátiyu 28:19, 20 mla Úklɔ́ kú Ācotɛ̄hɔ̄ 1:8, cɛɛ ku aa kɔka lɛyikwu ɔka nyā:
-
Ɛgɛnyá néē cika ō yuklɔ ku ɔna ō ta a gáā kwu a?
6. É gē ya ɔdā néē gē tɔɔna a
Ɔdi cɛ lɛ ɔcɛnyilɔ éyi nōo lé ka u Tom kóō gáā cɛ kpɔcii kóō lɛ ɔwɛ ō gba ɛ̄gbā ku ɔkwɛyi a má ɛ ma? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ipu uvidio a, ɔdiya nɛ u Tom lɛ ɛlá ku nu gwu ŋma ɔwɛ ō gba ɛ̄gbā doodu a?
-
Ɔdiya nɛ ó gáā cɛ kpɔcii kóō lɛ ɔkwɛyi a má ɛ ma?
Uce ō ya ku ɔcɛ gē mafu ɛdɔ ɔcɛ nɛ ó wɛ a fiyɛ ɛlā ō ka. Jé Umátiyu 7:21, cɛɛ ku aa kɔka lɛyikwu ɔka nyā:
-
Ɔdi cɛgbá lɛ Ujisɔsi fiyɛ duu a, ɔdā nɛ alɔ ka ka alɔ kpɔtuce a nɛɛ kɛɛ ka ɔdā nɛ alɔ gē mafu ipu uce ō ya ku alɔ a?
7. É yihɔtu iyi uwa
Ācɛ O Yɛce Ukraist ku eko aflɛyi a yihɔtu iyi uwa
Ācɛ O Yɛce Ukraist lɛ oyeeyi ku uwa kwu ikwū ajaajɛ lɛ Ācɛ O Yɛce Ukraist ɔmpa uwa ɔkwɔɔkwɛyi ɛ? Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.
-
Ipu uvidio a, ɔdi lɛ abɔ kwu Lloyd ɔtu kóō lɛ oyeeyi ku nu kwu ikwū ajaajɛ ohigbu ɔyinɛ alɔ nɔnyilɔ Johansson a?
-
A gbɛla ka ɔdā nɛ ó ya a mafu kóō wɛ Ɔcɛ O Yɛce Ukraist ɔkwɔɔkwɛyi?
Jé Ujɔ́ni 13:34, 35, cɛɛ ku aa kɔka lɛyikwu aɔka nōo ba nyā:
-
Ɛgɛnyá nɛ ayikpo ku Ujisɔsi (Ācɛ O Yɛce Ukraist ɔkwɔɔkwɛyi) géē ya odee mla ācɛ nōo ŋma uce amāŋ éwo ɔhá a?
-
Ɛgɛnyá néē géē ya ɛnyā ɛpleeko ku ɛfu ō kpo a?
ĀCƐ ŌHĪ GĒ KA: “Ācɛ O Yɛce Ukraist ya ɔdobɔbi alɛwa ɛ, ó lɛ a, ɛgɛnyá nɛ ɔwɛ ō gba ɛ̄gbā ku ɔkwɛyi géē yɔ kpɔ a?”
-
Ɛga ku Ubáyíbu nyá nɛ a lɔfu jé lɛ ɔcɛ nōo géē mafu lɛ ɔ ɛgɛ nɛ alɔ géē jé Ācɛ O Yɛce Ukraist ɔkwɔɔkwɛyi a?
ƆDI NƐ A NWU A?
Ācɛ nōo wɛ Ācɛ O Yɛce Ukraist ɔkwɔɔkwɛyi a gē yɛce ɛlā ō nwu ku Ujisɔsi, gē mafu ihɔtu ɔkwɛyi ŋma ɔtu ekponu klla gē tɔɔna ku ɔkwɛyi ku Ubáyíbu.
Aɔka ō tu alɔ ɛlá kwu ɔdā nɛ alɔ nwu
-
Imi nɛ ɔtu okpoce ku Ācɛ O Yɛce Ukraist ɔkwɔɔkwɛyi ŋma a?
-
Uce ō ya nyá nɛ a gáā bi le jé Ācɛ O Yɛce Ukraist ɔkwɔɔkwɛyi a?
-
Uklɔ nyá nɛ Ācɛ O Yɛce Ukraist ɔkwɔɔkwɛyi gē ya a?
JILA ƐLĀ NYĀ MÁ TŌŌTƆ̄Ɔ̄
Nwu ɛlā tōōtɔ̄ɔ̄ lɛyikwu ígwu ku ācɛ nōo ceyitikwu yɛce ocabɔ mla ɛlā ō nwu ku Ujisɔsi.
Má ɔdā nōo ta ɔcɛnya éyi nōo wɛ ipu ígwu ku ɔwɛ ō gba ɛ̄gbā éyi abɔ kóō gáā wɛ ipu “apɔlɛ nōo gē gba Ɔwɔico ɔkwɛyi ɛ̄gbā a.”
“They Used the Bible to Answer Every Question!” (The Watchtower, April 1, 2014)
Nwu ɛgɛ nɛ Ācɛ O Yɛce Ukraist ɔkwɔɔkwɛyi mafu ihɔtu lɛ ācɛ ō gba Ujehofa ɛ̄gbā ɔmpa uwa nɛ ɛgbá ce uwa a.
Ō Je Otabɔ Lɛ Ayinɛ Alɔ Eko Nɛ Amiya Le Ya—Aya Ō Kpii Ku Nu (3:57)
Leyi yɛ ɛgɛ nɛ Ācɛ O Yɛce Ukraist ku ikee a mla Ācɛ O Yɛce Ukraist ku icɛ a ya ɔdā nɛ Ujisɔsi ka ka ō géē mafu ācɛ nōo gē yɛce ɔ ɔkwɔɔkwɛyi a.
“What Are the Marks of True Christianity?” (The Watchtower, March 1, 2012)
