ANG ỌJẸ́JẸ 18

Abwọlẹ Á ka Bwu Jẹ́ Angịnyị nya ỊKịrayịsị Nyịlẹhị

Uku-ụnọ ịmanyị tị́ nya angịnyị kaa ya nyori ịwa nyị ri Angịnyị nya ịKịrayịsị. Ma ọmyịmyị nyaa datị-datị, ehile ọlẹ kị kaa hịhị bajẹ tị datị-datị ịnyịnyị. Lẹ ányị ahị tị́ ka bwu jẹ́ angị ri Angịnyị nya ịKịrayịsị nyịlẹhị tịtị?

1. Owo anyị à tị́ ri Angịnyị nya ịKịrayịsị?

Angịnyị nya ịKịrayịsị ri angịjụgbẹyị nya iJisọsị ịKịrayịsị, lee angị kaa bọọ jẹ. (Wa Ụkụrwọ nya Alẹrụ 11:26.) Ányị ị tị́ kaa mẹjẹ nyori ị ri angịjụgbẹyị nya iJisọsị? IJisọsị yẹkẹẹ: “Ó ri kaanụ ayịdang á juwa kpa ẹla ọmẹjẹ nyam ọlẹ họ ụkụrwọ ẹ-ẹpwụ nya ọhịhị nyanụ kịlahị-ịlahị lẹ aalẹ, anụ ri angịjụgbẹyị nyam ịnyịlẹhị lẹ.” (ỊJọn 8:31) Ọọwa ri, Angịnyị nya ịKịrayịsị ịlam ka ju ihi nya ẹla ọmẹjẹ nya iJisọsị pyii. Ẹla ọlẹ ká Ụpwụ Ịgọgọ ya iJisọsị à kaa mẹjẹ ụka myị́ ụka lẹ. Angịlẹ kị kaa bọọ jẹ nyịlẹhị kaa họ ịnyị ịnyịnyị.—Wa iLuku 24:27.

2. Ányị Angịnyị nya ịKịrayịsị à tị́ kaa mẹ ọháha jẹ?

IJisọsị byị angị kaa bọọ jẹ yẹkẹẹ: “Anụ la ọháha nya ịlẹhị-ịlẹhị ẹ-ẹga nya awụlẹ, jaabwọ kaam ayịdang wẹẹ la ọháha ọlịnyị ẹ-ẹga nyanụ mẹ.” (ỊJọn 15:12) Ányị iJisọsị à tị́ mẹjẹ nyori ọ la ọháha ẹ-ẹga nya angịjụgbẹyị nyamwụ? Ọ bịrị ụka balaa, ọ jwaa ọhụ, bala ọ-daa ụbwọ. Ọ pẹhi ọhịhị nyamwụ chajị nyaa. (1 ỊJọn 3:16) Lala iJisọsị, angịlẹ kị kaa bọọ jẹ á kaa ya ẹla rụ́ ọháha kem ka. Ị kaa mẹjẹ bwula ẹla ọyaya bala abwẹla nyaa nyori ị la ọháha ẹ-ẹga nya awụlẹ.

3. Ụkụrwọ oyina Angịnyị nya ịKịrayịsị nyịlẹhị à tị́ kaa họ?

IJisọsị ya ụkụrwọ ha angịjụgbẹyị nyamwụ. Ọ “daa ẹrụ kpehe, nyị kele kaka ya ẹrụ ọnyịịla nya ịpyị Adịrahụ nya Ohe Oluhye.” (ILuku 9:2) Angịnyị nya ịKịrayịsị ịla oyi ọhọhẹ á kaa ya ẹla nya Ohe e-ebe ị-kpa gbịgba nyaa kem ka, ma ị kaa ya ẹ-ẹga nya alụma bala ẹpwa nya angịnyị ịnyịnyị. (Wa Ụkụrwọ nya Alẹrụ 5:42; 17:17.) Angị ri Angịnyị nya ịKịrayịsị ịlam alẹ kaa ma ẹlịlẹhị ọlẹpwụ nya ịBayịbụụ jẹ ẹ-ẹga myị́ ẹga ká angịnyị ji ịnyịnyị. Angịnyị aanaa háa, lẹ ọ kaa kpaa ịpyọ nyọka kpa ụka bala ọngịrị nyaa mẹ ang jẹ angịnyị u-uhye nya ẹhị ọrịrịị-rịrị bala ẹjẹ ọkpụ́kpụ ọlẹpwụ nya ịBayịbụụ.—ỊMakị 12:31.

JẸ́ GỤ ỌỌWA

Kụ ẹhị yẹ abwọlẹ á ka bwu jẹ́ ọdatị nya Angịnyị nya ịKịrayịsị ịlam bala angịlẹ kị kaa ba ang ọmẹjẹ bala ọgụ-ẹpẹtẹ nyamwụ jẹ ka.

4. Ị kaa mwahị nya ẹlịlẹhị ọlẹpwụ nya ịBayịbụụ

Angịnyị nya ịKịrayịsị ịlụka onyogo jẹ́ apyobwuna nya Omyi Ẹla nya Ohe

Ọ-ọng myị́ ọng ọlẹ kọ ya ọwa nyị ri Ọngịnyị nya ịKịrayịsị, à jẹ́ apyobwuna nyọka ba ẹlịlẹhị ọlẹpwụ nya ịBayịbụụ jẹ ka. Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

IFIM: Abwọlẹ Kị Bwu Bịrị Ẹla nya Ohe (5:11)

Ányị ịchọọchị ịhyẹ ịlẹ kị ya ịwa nyị ri Angịnyị nya ịKịrayịsị à tị́ bwu ya ẹla ọlẹ ká iJisọsị mẹjẹ kpịbaa hi angịnyị?

IJisọsị mẹ ẹlịlẹhị jẹ bwu ẹpwụ nya Omyi Ẹla nya Ohe. Wa ịJọn 18:37, kanụ ya ẹla u-uhye nya ịtọ ẹla ọlẹ:

Jaabwọ ká iJisọsị ya, ányị ahị tị́ ka bwu jẹ́ Angịnyị nya ịKịrayịsị ịlẹ kị “ji oye nya ẹla nya ịlẹhị”?

5. Ị kaa mẹ ẹlịlẹhị ọlẹpwụ nya ịBayịbụụ jẹ

Angịnyị nya ịKịrayịsị ịlụka onyogo kaa ya ẹla nya Ohe je angịkịla

Ene ká iJisọsị rụ ka epwoohe, ọ ya ụkụrwọ ha angị bọọ jẹ, ụkụrwọ ọọwa tị jam daalẹ wẹẹ. Wa ịMatiyu 28:19, 20 bala Ụkụrwọ nya Alẹrụ 1:8, kanụ ya ẹla u-uhye nya ịtọ ẹla ọlẹ:

Ányị ụkụrwọ nya ẹla nya Ohe oyaya à tị́ ka pyẹ kaka ba?

6. Ị kaa kpa ẹla ọlẹ kị kaa mẹjẹ họ ụkụrwọ

Ịyẹ tị́ du ká Tom jẹ́ myị̀myị̀ nyori ọwa nyị jẹ́ Angịnyị nya ịKịrayịsị nyịlẹhị lẹ? Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Ẹla nya Ịgba Ọgbagba Dam Gbẹgbịlẹ (5:20)

Ẹ-ẹpwụ nya ifim ọwẹ, ịyẹ tị́ du ká ẹla nya ịgba ọgbagba da Tom gbẹgbịlẹ?
Ịyẹ tị́ du kọ jẹ́ myị̀myị̀ nyori ọ yé ẹlịlẹhị lẹ?

Abwẹla nya ọngịnyị à kaa yoo dodehe gụ ẹla ọlọnụ lẹ. Wa ịMatiyu 7:21, kanụ ya ẹla u-uhye nya ịtọ ẹla ọlẹ:

Oyina à tị́ baba ha iJisọsị gụ—ẹla ọlẹ kahị ya nyori ahị myị la lee ang ọlẹ ká abwẹla nyahị kaa mẹjẹ tị́?

7. Ị kaa la ọháha ẹ-ẹga nya awụlẹ

Angịnyị nya ịKịrayịsị ịlụka onyogo la ọháha ẹ-ẹga nya awụlẹ

Angịnyị nya ịKịrayịsị kaa ya ọhịhị nya ịlaa ju odo chajị nya Angịnyị nya ịKịrayịsị aanaa? Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

IFIM: Ọ Myị Ọnụ Nyọka Hu Ọhịhị Nyamwụ Ha (2:55)

Ẹ-ẹpwụ nya ifim ọwẹ, ịyẹ à tị́ gu Lloyd gbịla nyọka hu ọhịhị nyamwụ ju odo chajị nya Ọọnahị Johansson?
À me irya kọ họ ẹla lala Ọngịnyị nya ịKịrayịsị nyịlẹhị?

Wa ịJọn 13:34, 35, kanụ ya ẹla u-uhye nya ịtọ ẹla ịlẹ:

Ányị angịjụgbẹyị nya iJisọsị (Angịnyị nya ịKịrayịsị nyịlẹhị) à tị́ ka kpa angị bwu epweji lee ẹpwụma ọkịla?
Ányị ị tị́ ka họ ịnyị lụka nya ẹwụ?

ANGỊHYẸ KAA YẸKẸẸ: “Angịnyị nya ịKịrayịsị kaa họ ang ịtịpyọ, lẹ ányị ị tị́ bwu ri ịgba ọgbagba nyịlẹhị?”

Ụpwụ ịgọgọ oyina a tị́ ka wa je ọngịnyị nyọka mẹjọ́ọ jaabwọ kọ ka bwu jẹ́ Angịnyị nya ịKịrayịsị nyịlẹhị?

ẸLỊYẸ A TỊ́ JẸ́?

Angịnyị nya ịKịrayịsị nyịlẹhị kaa ju ihi nya ẹla ọlẹ ká ịBayịbụụ mẹjẹ, ị kaa la ọháha o-bwu ẹpwụ ọkịlẹtụ, bala ọ-kaa mẹ ẹlịlẹhị ọlẹpwụ nya ịBayịbụụ jẹ.