UKỌCHẸ 18

Abu A Neke M’Abo Kraist Ochochi

PLAY

Amonẹ wewe akaki ma ch’Abo Kraist. Ama, amẹñwu ku ma kẹdọno kpai ọna ku ma chẹñwu ch’ojoji ñwu ọlama. Todulẹ, abu a neke m’Abo Kraist Ochochi?

1. Abo che Abo Kraist?

Abo Kraist ch’amakọchẹ abẹki abo ki ale b’ikpa Kraist. (Gba Ẹwñ 11:26.) Abu ma du ña kaki ma ch’amakọchẹ Jisọs? Jisọs kakini: “Ichẹwñ k’amẹ gugu ef ọla e-mi alo waa, mak amẹ ch’amakọchẹ-mi ochochi.” (Jọn 8:31) E-lẹ du ña kaki i ch’otila k’Abo Kraist ochochi ki lebọ am’ukọ Jisọs. Dabalu ki Jisọs akọ amonẹ kwefu baibul, abo ki alebọ ikpa Jisọs ach’abalẹ gẹ.—Gba Luku 24:27.

2. Abu Abo Kraist ochochi ad’ufẹdọ ña?

Jisọs ka ñwu am’akọchẹ-wñ kakini: “K’amẹ ki fẹdọ omunẹ alu k’u fẹdọ mẹ.” (Jọn 15:12) Abu Jisọs du ña kaki i afẹdọ am’akọchẹ-wñ? I ad’iko tanẹ ch’oluka kp’ama, i ad’ugbẹdọ ñwu ma, i la ñọ ch’atẹko ma. E-ki ch’ogbogaga tule che kaki, i d’ọlai-wñ r’ọmẹ koji ma. (1 Jọn 3:16) Dabu Jisọs, abo ku ma lebọ ukọ-wñ kọla lugbo ufẹdọ kate n, ama ma du ña lefu ukọla ma kpai uche ma kaki ma fẹdọ ọlama.

3. Ẹñwu ch’ukọlọ ogbogaga k’Abo Kraist ache?

Jisọs d’ukọlọ ñwu am’akọchẹ-wñ. “I f’uma kpẹ lo ku ma ny’atakoya Ojanẹ Ọjọ.” (Luku 9:2) Abo Kraist ejodudu j’uchẹnyọ r’amonẹ ef’unyi ma kpai ugbo du ku ma li amonẹ, i ch’efu unyi arẹ ma kate n. (Gba Ẹwñ 5:42; 17:17.) Abo Kraist ochochi eñini-i onugo aj’uchẹnyọ r’amonẹ ugbo du ku ma li ma. Ma afẹdọ abo adogbe ma, todulẹ ma d’ẹdọ ma chaka d’iko kpai ukpahiu ma kpukpẹ am’ọla ukibeno manyu ugbẹdọ ki defu Baibul.—Mark 12:31.

N’UMA NYỌGBA

G’alu k’ẹ neke m’ojoji ki d’agbade Abo Kraist ochochi kpai abo ku ma ma lebọ am’ukọ Jisọs kpai ujiwe-wñ n.

4. Ma gwili ochochi ki d’efu Baibul

Baibul che w’Abo Kraist ejodudu eju

I ch’ọgbọ amonẹ ku ma akaki ma lebọ Kraist akpibe kaki i chẹñwu ogbogaga k’onẹ ki lebọ am’ochochi ki defu Baibul n. G’IFIDIO-i, ubilẹ mẹ ch’oluka oji ene-i.

IFIDIO: Ma F’ọna Arẹ Abo Kraist Kpabiẹ (5:11)

Ẹñwu ichẹka ef’abo chọchi ku ma kaki ma ch’Abo Kraist che todu ku ma kp’ọna ny’amonẹ ku ma we kọchẹ ochochi?

Jisọs kọ amonẹ ochochi ki defu Ọla Ọjọ. Gba Jọn 18:37, ubilẹ mẹ ch’oluka oji ene-i:

Dabalu ki Jisọs ka, abu a neke ma Abo Kraist du ‘k’ẹtẹ-ma ch’ochochi’?

5. Ma j’uchẹnyọ ochochi ki d’efu Baibul

Abo Kraist ejodudu j’uchẹnyọ r’amonẹ

Taki Jisọs dabi t’efu ojale, i d’ukọlọ ka ny’amakọchẹ-wñ ọwọ, ukọlọ lẹ la dọmọ t’eñini-i. Gba Matiu 28:19, 20 kpai Ẹwñ 1:8, ubilẹ mẹ ch’oluka oji ene-i:

Ugbo am’akọchẹ lẹ aj’uchẹnyọ lẹ ka de?

6. Ma ach’amẹñwu ku ma aj’uchẹnyọ-wñ

Ẹñwu ẹnẹkẹlẹ ku ma dọ ki Tom li ki jẹñwu ma kaki i f’Abo Kraist ochochi li mẹ? G’IFIDIO-i, ubilẹ mẹ ch’oluka oji am’ene-i.

IFIDIO: Ọna Ọjọ Egwa Mu Mi Ọwọ Kọbanẹ Ma (5:20)

Ef’ifidio-i, ẹñwu chi ki Tom ma kẹdọno ọna Ọjọ egwa gẹ n?
Ẹñwu jẹñwu ki nẹru Tom eju kaki i f’Abo Kraist ochochi li mẹ?

Amẹñwu k’onẹ ache ad’ọla ẹnẹ ki che tejugede t’amẹñwu ki aka le. Gba Matiu 7:21, ubilẹ mẹ ch’oluka oji ene-i:

Ẹñwu ch’ogbogaga tule eju Jisọs, amẹñwu k’a kaki a kẹdọno abẹki amẹñwu k’uche wa adu tejugede?

7. Ma Afẹdọ Ọlama

Abo Kraist ejodudu che fẹdọ ọlama

Ochochi i che kaki Abo Kraist ka d’oji ọlama t’ukwu todu Abo Kraist omunẹ? G’IFIDIO-i, ubilẹ mẹ ch’oluka oji am’ene-i.

IFIDIO: I Mọla Ki Kwu Todu Onukwu-wñ (2:55)

Efu ifidio-i, ẹñwu jẹñwu Lloyd d’oji ọla-wñ t’ukwu todu Ọmaye wa Johansson?
Ẹ neju kaki ẹñwu ki che-i du ña kaki Ẹnẹ Kraist ochocchi i che?

Gba Jọn 13:34, 35, ubilẹ mẹ ch’oluka oji am’ene-i:

Abu i dukpẹ k’amakọchẹ Jisọs (Abo Kraist ochochi) ki na chẹñwu kp’abo ichi omunẹ abẹki abo ojanẹ omunẹ?
Ẹgba ogwu, abu Abo Kraist ochochi adu ña kaki ma afẹdọ abo ku ma wa kw’ojanẹ abẹki ichi omunẹ?

ABO KA KAKINI: “Abo Kraist chẹ n’ọwọ efu amẹñwu ẹbiẹnẹ wewe todulẹ abile k’ọna Ọjọ egwa ma aneke ch’ochochi?”