UWUHRẸ AVỌ 18
Epanọ A rẹ rọ Riẹ Ileleikristi Uzẹme
Ima-idu ahwo buobu a bi se omarai Ileleikristi. Rekọ aikpobi na a rọwo eware evona ha, yọ a bi lele izi evona gbe he. Kọ ẹvẹ ma sae rọ riẹ Ileleikristi uzẹme?
1. Ono a re se Oleleikristi?
Ileleikristi yọ ilele hayo ahwo nọ a bi lele Jesu Kristi. (Se Iruẹru Ikọ 11:26.) Ẹvẹ a re ro dhesẹ nọ ilele Jesu a rrọ? Jesu ọ ta nọ: “Wha te bi koko ẹme mẹ ẹsikpobi, whai ginọ ilele mẹ.” (Jọn 8:31) Onana u dhesẹ nọ Ileleikristi a re ru lele iwuhrẹ Jesu hrọ. Ofariẹ, Ikereakere na iwuhrẹ Jesu e jẹ hai no ze, fikiere Ebaibol na iwuhrẹ Ileleikristi i re no ze re.—Se Luk 24:27.
2. Ẹvẹ Ileleikristi uzẹme a re ro dhesẹ uyoyou?
Jesu ọ ta kẹ ilele riẹ nọ: “Wha you ohwohwo wọhọ epanọ me you owhai na.” (Jọn 15:12) Ẹvẹ Jesu o ro dhesẹ nọ o you ilele riẹ? Ọ raha oke kugbe ae, ọ tuduhọ ae awọ, o te je fiobọhọ kẹ ae. O tube whu fiki rai dede. (1 Jọn 3:16) Epọvo na re, unu ọvo Ileleikristi uzẹme a rẹ rọ ta kpahe uyoyou ho. Te ẹmeunu te uruemu rai a re ro dhesẹ nọ a you ohwohwo.
3. Iruo vẹ Ileleikristi uzẹme a bi ru?
Jesu ọ kẹ ilele riẹ iruo jọ. O “vi [rai] vrẹ re a nyai whowho Uvie Ọghẹnẹ.” (Luk 9:2) Ileleikristi ọsosuọ a jẹ ta usi uwoma na, rekọ orọnọ evaọ iwou egagọ rai ọvo ho, rekọ te eria ẹgbede efa gbe evaọ obọ iwou ahwo. (Se Iruẹru Ikọ 5:42; 17:17.) Epọvo na Ileleikristi uzẹme a bi ru nẹnẹ re, a rẹ ta ẹme Ọghẹnẹ kẹ ahwo evaọ oria kpobi. Fikinọ a you erivẹ rai, a rẹ rehọ oke gbe ẹgba rai whowho ovuẹ ẹruore gbe omosasọ nọ o rrọ Ebaibol na kẹ ae.—Mak 12:31.
GBE WUHRẸ EWARE EFA
Wuhrẹ epanọ whọ sai ro vuhu Ileleikristi uzẹme, gbe ahwo nọ a bi lele iwuhrẹ gbe oriruo Jesu hu.
4. A rẹ kiẹ gwọlọ uzẹme Ebaibol
Ileleikristi ọsosuọ a rri Ẹme Ọghẹnẹ ghaghae
Orọnikọ ahwo kpobi nọ a bi se omarai Ileleikristi a rri oware nọ Ebaibol na ọ ta ghaghae he. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Oghẹrẹ vẹ ahwo ichọche jọ a ro ru ahwo siọ uzẹme Ebaibol na ba ewuhrẹ no?
Ebaibol na Jesu o je wuhrẹ uzẹme na no ze. Se Jọn 18:37, kẹsena wha vẹ ta ẹme kpahe onọ nana:
-
Wọhọ epanọ Jesu ọ ta, ẹvẹ ma sai ro vuhu Ileleikristi nọ e “rrọ abọ uzẹme na”?
5. A rẹ vuẹ amọfa oware nọ Ebaibol na ọ ta
Ileleikristi ọsosuọ a ta usi uwoma kẹ amọfa
Taure Jesu o te ti zihe kpobọ odhiwu, ọ kẹ ilele riẹ iruo jọ nọ a gbe bi ru rite inẹnẹ na. Se Matiu 28:19, 20 gbe Iruẹru Ikọ 1:8, kẹsena wha vẹ ta ẹme kpahe onọ nana:
-
Ẹvẹ a te ta usi uwoma na kẹre te?
6. A re ru lele eware nọ a be vuẹ amọfa
Eme ọ kẹ ọzae jọ nọ a re se Tom imuẹro nọ ọ ruẹ Ileleikristi uzẹme no? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Eme whọ jọ ividio na ruẹ nọ u ru Tom kpairoro vrẹ egagọ?
-
Eme ọ kẹ riẹ imuẹro nọ ọ ruẹ uzẹme na no?
Uruemu o rua vi egede. Se Matiu 7:21, kẹsena wha vẹ ta ẹme kpahe onọ nana:
-
Eme ọ rẹ mae were Jesu, kọ oware nọ ma be ta nọ ma rọwo manikọ eware nọ ma bi ru?
7. A re you ohwohwo
Ileleikristi ọsosuọ a you ohwohwo
Kọ Ileleikristi jọ a rọwo nọ a re whu fiki ibe Ileleikristi rai no? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Evaọ ividio na, eme ọ lẹliẹ Lloyd ta nọ a sa ọyomariẹ viukpọ Brọda Johansson?
-
Kọ who roro nọ o ru wọhọ uvi Oleleikristi?
Se Jọn 13:34, 35, kẹsena wha vẹ ta ẹme kpahe enọ nana:
-
Ẹvẹ ilele Jesu (koyehọ Ileleikristi uzẹme) a re ru ahwo ovioma hayo orẹwho ofa?
-
Oghẹrẹ vẹ a re ro ru ere evaọ oke ẹmo?
AHWO JỌ A RẸ TA NỌ: “Ileleikristi a ru eware iyoma buobu no, kọ ẹvẹ a sae rọ jọ egagọ uzẹme na?”
-
Oria Ebaibol vẹ whọ sai se kẹ ohwo ro dhesẹ epanọ ma rẹ rọ riẹ Ileleikristi uzẹme na?
EME WHO WUHRẸ NO?
Ileleikristi uzẹme a re lele iwuhrẹ Ebaibol, a re dhesẹ uyoyou nọ a sai ro whu kẹ omọfa dede, a rẹ vuẹ amọfa oware nọ Ebaibol ọ ta.
Ọkiẹkpemu
-
Diẹse eware nọ Ileleikristi uzẹme a rọwo i re no ze?
-
Eware vẹ a rẹ rọ riẹ Ileleikristi uzẹme?
-
Didi iruo Ileleikristi uzẹme a bi ru?
KIẸ KPAHE EFA
Gbe wuhrẹ kpahe utu ahwo nọ a be dawo ẹgba rai kpobi lele oriruo gbe iwuhrẹ Jesu Kristi.
Rri oware nọ u fiobọhọ kẹ aye jọ nọ ọ jọ ozerẹ-aye vẹre ruẹ “eg’Ọghẹnẹ nọ e wọhọ uviuwou ọvo.”
“A Rehọ Ebaibol Kẹ Uyo Onọ Kpobi nọ Mẹ nọ Rai!” (Uwou-Eroro Na, Ane 1, 2014)
Rri epanọ uvi Ileleikristi a re ro dhesẹ uyoyou kẹ ibe eg’Ọghẹnẹ rai nọ okpẹtu o via kẹ.
Obọ nọ A Fihọ Kẹ Inievo Mai Okenọ Okpẹtu O Via—Amabọ Jọ Riẹ (3:57)
Wuhrẹ kpahe epanọ Ileleikristi uzẹme inẹnẹ a bi ro ru eware nọ Ileleikristi ọsosuọ a ru wọhọ epanọ Jesu ọ ta nọ a te rọ riẹ ilele riẹ.
“Eware jọ Vẹ A re ro Vuhu Ileleikristi Uzẹme?” (Uwou-Eroro Na, Ahrẹ-Azie, 2012)
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
