LESN 18

Ou Wi Kyan Nuo Di Chuu Kristiyan Dem?

PLIE

Wol iip a piipl se dem a Kristiyan, bot dem no biliiv an du di siem sitn dem. Bot ou yu tingk wi kyan nuo di chuu Kristiyan dem?

1. Uu a wan Kristiyan?

Piipl we a Kristiyan a piipl we a fala Jiizas Krais. (Riid Aks 11:26.) Ou wi kyan nuo dem piipl de? Jiizas se: “Ef unu gwaan du di sitn dem we mi tiich, unu a mi falara dem fi chuu.” (Jan 8:31) Dat miin tu se wan chuu Kristiyan a-go a du di sitn dem we Jiizas se dem fi du. An jos laik Jiizas, eniting we dem tiich se fi kom fram di Baibl.—Riid Luuk 24:27.

2. Wa a som sitn we Kristiyan du we mek wi si se dem lov dem wan aneda?

Jiizas did tel im falara dem se: “Lov unu wan aneda siem laka ou mi lov unu.” (Jan 15:12) Wi kuda si se Jiizas did lov im falara dem, kaaz im yuus tu spen wol iip a taim wid dem. Im elp dem out, an im mek dem fiil gud bout demself. Im lov dem so moch dat im aal ded fi dem. (1 Jan 3:16) A siem so, di wan dem we a riil Kristiyan no jos taak se dem lov piipl. Di tingz we dem du an se mek wi si se dem lov dem wan aneda.

3. A wa di chuu Kristiyan dem aalwiez a du?

Jiizas did gi im falara dem wok fi du. ‘Im sen dem out fi tel piipl bout Gad Kindom.’ (Luuk 9:2) Di Kristiyan dem we did de bout wen di Baibl did a rait, a no onggl iina Gad ous wan dem go go priich tu piipl. Eniwe dem kuda fain piipl, dem priich tu dem. Dem go aal a piipl yaad tu fi go priich tu dem. (Riid Aks 5:42; 17:17.) A siem so, di chuu Kristiyan dem tide, eniwe we piipl liv dem go go priich tu dem. A kaa dem lov piipl mek dem yuuz dem taim, an dem chrent we dem av fi go priich Gad mesij tu dem. An da mesij de mek piipl fiil gud bout demself, an it gi dem sitn gud fi luk faawod tu.—Maak 12:31.

LORN SOM MUO

Luk pan di sitn dem we di chuu Kristiyan dem fi a du.

4. Dem chrai aad fi fain di chuut we de iina di Baibl

Di Kristiyan dem we did liv bak iina di taim wen di Baibl did a rait did biliiv se ef dem du wa Gad Wod se, tingz wuda wok out gud fi dem

A no evribadi we se dem a Kristiyan tingk se wa di Baibl se mek sens, ar dem afi du wa it se. Plie di VIDIYO, an den wi a-go taak bout di neks kwestiyan.

VIDIYO: Wa Kaaz Di Kristiyan Dem Fi Staat Worship Gad Di Rang Wie? (5:11)

Wa som a di choch dem a du wa mek wi nuo se dem naa tiich wa Jiizas waahn dem fi tiich?

Eniting we Jiizas tiich fram Gad Wod, a so it go. Riid Jan 18:37, an den wi a-go taak bout da kwestiyan ya:

Azkaadn tu Jiizas, ou wi kyan nuo di Kristiyan dem “we lov di chuut”?

5. Dem tiich di chuut fram Gad Wod

Di Kristiyan dem we did liv bak iina di taim wen di Baibl did a rait did priich Gad mesij tu piipl

Bifuo Jiizas did gu baka evn, im gi im falara dem wan wok fi du we dem fi a du dong tu tide die. Riid Matyu 28:19, 20 an Aks 1:8, an den wi a-go taak bout da kwestiyan ya:

Umoch priichin dem wuda du, an ou faar dem wuda go wid dem priichin?

6. Eniting dem priich, a it dem du

A wa Tom did si we mek im nuo se, ye, im fain di chuu Kristiyan dem we a fala Jiizas? Plie di VIDIYO, an den wi a-go taak bout di neks kwestiyan dem.

VIDIYO: Mi Kudn Bada Wid Rilijan No Muor (5:20)

Wa did mek Tom kudn bada wid rilijan agen?
Wa mek Tom did nuo se im did fain di chuu rilijan?

Di big ting a no wa yu se, bot a wa yu du. Riid Matyu 7:21, an den wi a-go taak bout da kwestiyan ya:

Wa yu tingk mata muor tu Jiizas—wa wi se, ar di sitn dem we wi du?

7. Dem lov dem wan aneda

Di Kristiyan dem we did liv bak iina di taim wen di Baibl did a rait did lov dem wan aneda

Yu tingk se chuu Kristiyan riili du tingz fi dem wan aneda, iivn duo dem nuo dem mait-a ded ef dem dwi’it? Plie di VIDIYO, an den wi a-go taak bout di neks kwestiyan dem.

VIDIYO: Im Did Redi Fi Ded Fi Im (2:55)

Wa mek Lloyd did redi fi ded fi Breda Johansson?
Yu tingk wa im did du a dat wan riil Kristiyan fi du?

Riid Jan 13:34, 35, an den wi a-go taak bout dem kwestiyan ya:

Ou Jiizas falara dem (ar di chuu Kristiyan dem) tide chriit piipl we kom fram somwe els, ar we luk difrant fram dem?
Wen waar brok out, ou dem wuda chriit ada piipl we difrant fram dem?

SUMADI MAIT-A SE: “Di Kristiyan dem du som wikid sitn. So ou dem kyan se dem a di chuu rilijan?”

Wich skripcha yu kuda yuuz fi mek sumadi si uu a di chuu Kristiyan dem?

DIS A WA YU FI MEMBA

Chuu Kristiyan du wa di Baibl se dem fi du. Dem lov dem wan aneda so moch dat dem redi fi ded fi dem wan aneda. An dem onggl tiich bout di chuut we de iina di Baibl.