DISÁ 18
Kyebhi Kitutena Kwijiya o Jikidistá Jakidi
Kumundu woso, mazunda ni mazunda a athu amba kwila Jikidistá. Maji enoso kaxikina mu kima kimoxi mba a kayela itendelesu imoxi. Mu kiki kyebhi kitutena kwijiya o Jikidistá jakidi?
1. Ihi ilombolola kukala Kidistá?
O Jikidistá maxibulu mba akayedi a Jezú Kidistu. (Tanga Ikalakalu 11:26.) Ihi ilondekesa kwila, o muthu dixibulu dya Jezú? Mwene wambe: ‘Se mu kolokota mu maka mami, mwala mu maxibulu mami.’ (Nzwá 8:31) Kiki kilombolola kwila, o Kidistá ya kidi, watokala kubelesela o ilongesu ya Jezú. Yoso yexile muzwela Jezú ni ima yexile mu bhanga ya tundile mu Mak’â Nzambi. Kyene kimoxi we ni Jikidistá jakidi, o ima ya zwela ni ima ya bhanga, itunda mu Bibidya.—Tanga Luka 24:27.
2. Kyebhi o Jikidistá jakidi kya londekesa o henda?
Jezú wambela o akayedyê: “Dizodyenu mudyenu, kala ki nga mizola eme.” (Nzwá 15:12) Kyebhi Jezú kya londekesa kwila, wazolele o maxibulu mê? Mwene wa aswinisa, wabhiti nawu kithangana, wa akwatekesa. Mwene wabhakula o mwenyu wê phala kwabhulula. (1 Nzwá 3:16) Kala Jezú, o Jikidistá jakidi kazwela ngó ya lungu ni henda, ene alondekesa o henda yiyi. Kikalakalu kyebhi kyene mu bhanga o Jikidistá jakidi.
3. Kikalakalu kyebhi kyene mu bhanga o Jikidistá jakidi?
Jezú wabhana kikalakalu kya dikota kumaxibulu mê. ‘Mwene wa atumikisa phala kuboka o Utuminu wa Nzambi.’ (Luka 9:2) O Jikidistá jadyanga kexile mu boka ngó mu ididi ya ubhezelu, exile we mu boka mu ididi mu bhita athu avulu ni mu mabhata a athu. (Tanga Ikalakalu 5:42; 17:17.) Lelu, o Jikidistá jakidi aboka o njimbu ya Bibidya kabasa kididi bhwala o athu. Ene azolo o athu, mukonda dya kiki, asanguluka mu kukatula kithangana kya soko ni nguzu, phala kuboka o njimbu yambote ya Bibidya ibhana kidyelelu.—Máluku 12:31.
DILONGE DINGI
Tala ihi itungula o Jikidistá ku athu kene mu kayela o milongi ya Jezú ni phangu yê.
4. Ene atokwesa o kidi kyala mu Bibidya
O Jikidistá jadyanga abhanene valolo mu Mak’â Nzambi
Sayi athu amba kwila Jikidistá, kamono kwila, kima kyambote kwijiya o kidi kyala mu Bibidya. Tala OVIDYU, mukusuluka bhanga o kibhwidisu kya kayela.
-
Ihi ya bhange o athu atokala mu jingeleja amba kwila Jikidistá phala kufidisa o athu kutanga o Bibidya?
Jezú walongo o kidi kya Mak’â Nzambi. Tanga Nzwá 18:37, mukusuluka bhanga o kibhwidisu kya kayela:
-
Kala kya longo Jezú, kyebhi kitutena kwijiya o Jikidistá a “xikana o kidi”?
5. Ene aboka o kidi kya Bibidya
O Jikidistá jadyanga exile mu bokela akwa
Ande dya Jezú kuvutuka kudyulu, mwene wabhana kikalakalu kumaxibulu mê kya mu suluka katé lelu. Tanga Matesu 28:19, 20 ni Ikalakalu 1:8, mukusuluka bhanga o kibhwidisu kya kayela:
-
Thembu kuxi ni mu ididi yebhi mweji suluka ni kuboka o njimbu yambote?
6. Ene abhanga o ima ya longa
Ihi ya kwatekesa diyala amwixana Tom kwijiya kwila, wasangele o Jikidistá jakidi? Tala OVIDYU, mukusuluka bhanga o ibhwidisu ya kayela.
-
Kala kitwamono mu vidyu, ihi ya bhangesa Tom kweha kuya mu jingeleja?
-
Ihi ya mu bhangesa kuxikina kwila wasange o kidi?
O kubhanga kwabeta o kota, kuzwela ndenge. Tanga Matesu 7:21, mukusuluka bhanga o kibhwidisu kya kayela:
-
Ihi ya beta o kota phala Jezú, o ima itwamba kwila tu ixikina, inga o ima itulondekesa kwila tu ixikina bhu kaxi ka ibhangelu yetu?
7. Ene adizolo mudyâ
O Jikidistá jadyanga adizolele mudyâ
O kwila o Jikidistá ata o myenyu yâ mu kilwezu phala kubhulula o jiphange jâ? Tala OVIDYU, mukusuluka bhanga o ibhwidisu ya kayela.
-
Mu vidyu itwatale, ihi ya bhangesa phange Lloyd kuta o mwenyu wê mu kilwezu phala kubhulula phange Johansson?
-
Ihi i ubanza, o kwila kya bhange phange Lloyd kilondekesa kwila, mwene Kidistá ya kidi?
Tanga Nzwá 13:34, 35, mukusuluka bhanga o ibhwidisu ya kayela:
-
Kyebhi o maxibulu a Jezú, o (Jikidistá jakidi) kyeji talatala o athu akikonda mba mwiji ki udifu?
-
O kwila ene eji londekesa o henda yiyi, né mwene mu kithangana kya ita?
ATHU AVULU AMBA: “Kabasa ngeleja, o kima kya beta o kota, o kuxikina Jezú.”
-
Ibatulu yebhi ya Bibidya iweji tanga ni muthu phala kulondekesa kwila tutena kwijiya o Jikidistá jakidi?
IHI IWADILONGO
O Jikidistá jakidi abelesela o milongi ya Bibidya, alondekesa o henda ya kidi, aboka o njimbu yambote.
Kubhitulula
-
O ima ya zwela ni ima ibhanga o Jikidistá jakidi, ya lungu ni ihi?
-
Idifwa yebhi ilondekesa kwila ene o Jikidistá jakidi?
-
Kikalakalu kyebhi kyene mu bhanga o Jikidistá jakidi?
TOKWESA DINGI
Tokwesa dingi ya lungu ni kibuka kya athu ene mu bhanga nguzu phala kukayela o phangu ni milongi ya Jezú Kidistu.
Tala o musoso wamuhatu waxisa o kididi bhwa mu sasela mu ngeleja (madre), yu wasange “mwiji wakidi mu nzumbi.”
“A Tambuijila o Ibhuidisu Iami Ioso ni Bibidia!” (O Mulangidi, 1 wa Kasamanu wa 2014)
Tala kyebhi o Jikidistá jakidi, kya londekesa henda ku jiphange jâ abhindama.
Kukwatekesa o Jiphange Jetu mu Ididi Mwabhiti o Mavuwa—Mbandu ya vidyu (3:57)
Dilonge dingi kyebhi o Jikidistá jakidi lelu, kya bhanga o ima kala o Jikidistá mu ukulu mu kubelesela o milongi ya Jezú.
“Ihi Ikwatekesa Kwijiya o Jikidistá ja Kidi?” (O Mulangidi, 1 wa Kasamanu wa 2012)