ERISOMO 18
Ngoku Wanga Minyerera Abakristayo ab’Okwenene
Esyobbiliyoni sy’abandu bakabugha bathi ni Bakristayo. Aliwe abosi, esyonyikirirya syabu sisisosene, kandi sibali ghendera okwa bihano bighumerera. Neryo ibbwa kwesi thwanga minyerera thuthi Abakristayo ab’okwenene?
1. Omukristayo w’okwenene y’owahi?
Abakristayo ni bigha ba Yesu Kristo, kutse abakamukwama. (Soma Emibiri 11:26.) Bakakanganaya bathi ku ni bigha ba Yesu? Yesu mwabugha athi: ‘Mwamabya mukakwama ebinywe byaghe, imuli bigha baghe kwenene.’ (Yoane 8:31) Eki kikamanyisaya kithi Abakristayo ab’okwenene batholere ibakwama esyongangirirya sya Yesu. Kandi ngoku Yesu anaseghemeraya erikangirirya liwe oko Masako, n’Abakristayo ab’okwenene bakaseghemeraya esyonyikirirya syabu oko Biblia.—Soma Luka 24:27.
2. Abakristayo ab’okwenene bakakanganaya bathi olhwanzo?
Yesu mwabwira abakamukwama athi: ‘Mwanzane, ngoku nabiribanza.’ (Yoane 15:12) Yesu mwakangania athi kw’anzire abigha biwe? Iniakasiba nabu, iniabahimba, n’eribawathikya. Nibya mwahayo engebe yiwe busana nabu. (1 Yoane 3:16) Kuthya, Abakristayo ab’okwenene sibali subulira okw’ikania oko lhwanzo lisa. Bakakikanganaya omwa binywe n’omwa mikolere ngoku banzene.
3. Ni mubiiri wahi ogho Abakristayo ab’okwenene bakakolha kutsibu?
Yesu mwaha abigha biwe b’omubiiri w’erikolha. ‘Mwathumabo erithulha omwatsi w’Obwami bwa Nyamuhanga.’ (Luka 9:2) Abakristayo ab’erimbere mubathulira, butsira omo myanya eya bakaramirayamu misa aliwe n’omwa yindi myanya eyikabya mw’abandu banene n’omo miyi y’abandu. (Soma Emibiri 5:42; 17:17.) Kuthya, Abakristayo ab’okwenene munabwire bakathulhughanaya ekwenene ye Biblia ahosi-hosi ahali abandu. Banzire abaliranwa babu, neryo bakatsema bakakolesya endambi yabu n’akaghalha eribwira abandi oko mwatsi we Biblia owakaha amaha n’erihumulikania.—Mariko 12:31.
THASYIGHA BINGYI
Minya ngoku wanga ghabulha Abakristayo ab’okwenene okwa bandu abathekwama esyongangirirya sya Yesu n’eky’erileberyako kiwe.
4. Bakasondekanaya ekwenene ye Biblia
Abakristayo abakera mubalhangira Ekinywe kya Nyamuhanga mwa kindu kikulhu
Abandi abakayahulhamo Bakristayo sibalilhangira ekwenene ye Biblia mwa y’obughuli. Mubughaye EVIDIYO, mwanakania okwa kibulyo ekikakwamako.
-
Awandi madini awakayahulhamo Bakristayo abirilemwa athi erikangirirya ebyo Yesu akangiriraya?
Yesu mwakangirirya ekwenene eyiri omwa Kinywe kya Nyamuhanga. Soma Yoane 18:37, mwanakania okwa kibulyo kino:
-
Erikwamana na Yesu, thwanga minyerera thuthi Abakristayo abali okwa lhuhandi ‘lhw’omwatsi w’ekwenene’?
5. Bakathulha ekwenene ye Biblia
Abakristayo abakera mubathulira abandi
Yesu athali aghenda elhubulha, mwaha abakamukwama b’omubiiri ow’anemulholha embere namunabwire. Soma Matayo 28:19, 20 na Emibiri 1:8, mwanakania okwa kibulyo kino:
-
Omubiiri w’erithulira angakolirwe erihika okwa lhulengo lhungahi?
6. Bakaghendera okwa bya bakakangiriraya
Ni kyahi ekyakakasaya omulhume oyukahulhawamo Tom ngoku abiribana edini y’Ekikristayo ey’okwenene? Mubughaye EVIDIYO, mwanakania okwa bibulyo ebikakwamako.
-
Omo vidiyo, ni byahi ebyaleka Tom iniahwa okwa by’edini?
-
Busana naki lino akaligha kw’abiribana ekwenene?
Ebya thukakolha bikathubisulhako bingyi kwilhaba ebyo thukabugha. Soma Matayo 7:21, mwanakania okwa kibulyo kino:
-
Ebikulhu kutsibu embere sya Yesu—by’ebya thukabugha thuthi thwikirirye kutse by’ebya thukakanganaya omwa bya thukakolha?
7. Banzene
Abakristayo abakera mubanzana
Mbwino Abakristayo banabiritsama engebe yabu busana n’Abakristayo balikyabu? Mubughaye EVIDIYO, mwanakania okwa bibulyo ebikakwamako.
-
Omo vidiyo, ni kyahi ekyaleka Lloyd iniatsama engebe yiwe busana na Mughalha wethu Johansson?
-
Wukalhangira eby’akolha sibirikanganaya ekya Mukristayo w’okwenene atholere erikolha?
Soma Yoane 13:34, 35, mwanakania okwa bibulyo bino:
-
Abigha ba Yesu (Abakristayo b’okwenene) batholere ibathwalha bathi abandu b’eyindi rangyi kutse ab’ekindi kihanda?
-
Ekyo banga kikolha bathi omwa buthuku bw’olhuhi?
ABANDI BAKABUGHA BATHI: “Edini siki, ekikulhu ly’erikirirya.”
-
N’isako lyahi eryo wangakolesya erikangania ngoku thwanga minyerera Abakristayo ab’okwenene?
OMWA BIKUHI
Abakristayo ab’okwenene bakaghendera okwa syongangirirya sye Biblia, bakakanganaya olhwanzo lhw’eriyihayo, kandi bakathulha ekwenene ye Biblia.
Eriyibukya
-
Esyonyikirirya sy’Abakristayo b’okwenene siseghemere okuki?
-
Ni mubere wahi owakaminyikalhaya Abakristayo ab’okwenene?
-
Ni mubiiri wahi ogho Abakristayo b’okwenene bakakolha?
MINYA BINGYI
Minya bingyi okwa gurupu ya bandu abakalengaho erikwama eky’erileberyako kya Yesu Kristo n’esyongangirirya siwe.
Lhangira ekyaleka oyuwabya musisita iniabana “erihiika ery’okwenene ery’obunyakirimu.”
“Mubakolesya e Biblia Erisubirya Obuli Kibulyo!” (The Watchtower, Okwakani 1, 2014)
Minya ngoku Abakristayo b’okwenene bakakanganaya olhwanzo okwa baramya balikyabu abakayithagha obuwathikya.
Eriwathikya Balikyethu Hakabya Ekitsinduli—Akatsweka kake (3:57)
Lhangira ngoku Abakristayo abakera n’Abakristayo ab’okwenene abamunabwire bakaghendera ndeke okwa bya Yesu abugha athi byangaminyikerye abakamukwama.
“Ni Byahi Ebikaminyikalhaya Abakristayo b’Okwenene?” (The Watchtower, Okwakasathu 1, 2012)
