LUFUNJISHO 18
Byo Twafwainwa Kuyuka Bena Kilishitu ba Kine
Bantu bavula betongola’mba bena Kilishitu. Pano bino, abano bonse kechi baitabila mu bintu bimotu ne. Kabiji kechi balondela mikambizho intutu imo ne. Pano twakonsha kuyuka byepi bena Kilishitu ba kine?
1. Bena Kilishitu bo ba ñanyi?
Bena Kilishitu ke baana ba bwanga ba kwa Yesu. (Tangai Byubilo 11:26.) Ñanyi bintu byo boba bimwesha’mba baana ba bwanga ba kwa Yesu? Yesu waambile’mba: “Umvwe saka mulama byambo byami, ko kuba’mba mwi baana bami ba bwanga.” (Yoano 8:31) Akino kyalumbulula’mba bena Kilishitu ba kine bafwainwa kukookela byafunjishanga Yesu. Byonkatu Yesu byo aingijishanga Binembelo pa kufunjisha bantu, ne bena Kilishitu ba kine nabo bafunjisha bifuma mu Baibolo.—Tangai Luka 24:27.
2. Bena Kilishitu ba kine bamwesha byepi butemwe?
Yesu wabuujile baana banji ba bwanga amba: “Mwitemwe anwe bene na bene byonkatu byo nemutemwa.” (Yoano 15:12) Yesu wamwesheshe byepi kuba’mba watemenwe baana banji ba bwanga? Wamonangapo kimye kya kwikala nabo, wibatundaikanga ne kwibakwasha. Kabiji wibafwijile. (1 Yoano 3:16) Byonkatu byajinga Yesu ne bena Kilishitu ba kine nabo kechi bambatu pa kanwa amba batemwa bakwabo ne. Pakuba kutemwa bakwabo kumwekela mu bintu byo bamba ne kuba.
3. Ñanyi mwingilo ubena kwingila bena Kilishitu ba kine?
Yesu wapeele baana banji ba bwanga mwingilo wa kwingila. “Wibatumine kuya na kusapwila pa Bufumu bwa Lesa.” (Luka 9:2) Bena Kilishitu batanshi kechi basapwilangatu mu bipwilo ne. Pakuba basapwilanga ne mu mapunzha mutaanwa bantu bavula ne ku nzubo ku nzubo. (Tangai Byubilo 5:42; 17:17.) Bena Kilishitu ba kine nabo lelo jino basapwila bukine bwa mu Baibolo konse kutanwa bantu. Na mambo a kutemwa bakwabo, kyo kibalengela kwingijisha kimye kyabo ne ngovu yabo kusapwila bantu bukine buji mu Baibolo bukwasha ne kutekenesha bantu.—Mako 12:31.
FUNJILAIPO BIKWABO
Imwenai bena Kilishitu ba kine byo bapusana na bantu babula kulondela byafunjishanga Yesu ne byo aubanga.
4. Bakebakeba bukine buji mu Baibolo
Bena Kilishitu batanshi banemekele bingi Mambo a Lesa
Kechi bantu bonse betela’mba bena Kilishitu banemeka bukine buji mu Baibolo ne. Tambai VIDYO, ne kwisamba buno bwipuzho.
-
Machechi amo etela’mba a bena Kilishitu alengela byepi bantu kubula kuyuka bintu byafunjishanga Yesu?
Yesu wafunjishanga bantu bukine kwingijisha Mambo a Lesa. Tangai Yoano 18:37, ne kwisamba buno bwipuzho:
-
Kwesakana na byaambile Yesu, twafwainwa kuyuka byepi bena Kilishitu ‘batemwa bukine’?
5. Basapwila bukine bwa mu Baibolo
Bena Kilishitu batanshi kusapwila bantu
Yesu saka akyangye kuya mwiulu, wapeela baana banji ba bwanga mwingilo wa kusapwila ye tubena kwingila ne lelo jino. Tangai Mateo 28:19, 20 ne Byubilo 1:8, ne kwisamba buno bwipuzho:
-
Uno mwingilo bakamwingila kufika pi?
6. Bengijisha bintu byo basapwila mu bwikalo bwabo
Ñanyi kintu kyalengejile ba Tom kushiinwa’mba bataana bena Kilishitu ba kine? Tambai VIDYO, ne kwisamba ano mepuzho.
-
Mu vidyo ye mwatamba, ñanyi kintu kyalengejile ba Tom kushikwa bupopweshi?
-
Ñanyi kintu kibakwashishe kushiinwa’mba bataana bukine?
Inge muntu waamba’mba ne mwana wa bwanga wa kwa Yesu, wafwainwa kumwesha kino mu byubilo byanji. Tangai Mateo 7:21, ne kwisamba buno bwipuzho:
-
Nanchi kyepi kyanema bingi kwi Yesu, kwambatu pa kanwa amba twi bena Kilishitu nangwa kwikumwesha mu bintu byo tuba?
7. Betemwa bene na bene
Bena Kilishitu batanshi kwitemwa bene na bene
Nanchi kine bena Kilishitu babika bumi bwabo mu kizumba kuba’mba bapulushe bakwabo bena Kilishitu nyi? Tambai VIDYO, ne kwisamba ano mepuzho.
-
Mu vidyo ye mwatamba, ñanyi kintu kyalengejile mulongo Lloyd Likhwide kubika bumi bwanji mu kizumba na mambo a mulongo Johansson?
-
Nanchi mwalanguluka’mba kyo baubile kimwesha’mba bena Kilishitu ba kine nyi?
Tangai Yoano 13:34, 35, ne kwisamba ano mepuzho:
-
Nanchi bena Kilishitu ba kine bamona byepi bantu ba mu mulaka mukwabo nangwa bafuma ku kyalo kingi?
-
Nanchi bena Kilishitu ba kine boba byepi kimye kya nkondo?
BANTU BAMO BAMBA’MBA: “Kuji bupopweshi bwavula bingi. Nanchi bwepi bupopweshi bwa kine?”
-
Ñanyi kinembelo kyo mwakonsha kutangila muntu kyaamba pa byo twafwainwa kuyuka bena Kilishitu ba kine?
ÑANYI BISHINKA BYO MWAFUNDA?
Bena Kilishitu ba kine balondela byaamba Baibolo, betemwa bene na bene kabiji basapwila bantu bukine bwa mu Baibolo.
Mepuzho a kupitulukamo
-
Nanchi bena Kilishitu ba kine bafumyapi bintu byo baitabilamo?
-
Ñanyi kyubilo kya kuyukilako bena Kilishitu ba kine?
-
Ñanyi mwingilo wingila bena Kilishitu ba kine?
KEBAI BISHINKA BIKWABO
Funjilaipo bishinka bikwabo pa bantu bebikileko kulondela byaubanga Yesu Kilishitu ne byo afunjishanga.
Monai byalengejile wajinga kala katolika kutanwa mu “kisemi kya ntanda yonse kya balongo ne banyenga bengijila Lesa.”
“Baingijishe Baibolo pa Kukumbula Mepuzho Onse!” (Kyamba kya Usopa, April 1, 2014)
Tangai pa bena Kilishitu ba kine byo boba kumwesha’mba batemwa bakwabo babena kupita mu makatazho.
Imwenai bishinka byaamba pa bena Kilishitu batanshi ne bena Kilishitu ba kine lelo jino byo babena kumwesha byubilo byaambilepo Yesu bya kwibayukilako kuba’mba baana banji ba bwanga.
“Ñanyi Byubilo bya Kuyukilako Bena Kilishitu ba Kine?” (Kyamba kya Usopa, March 1, 2012)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
