SUƐI LEBOLII 18

Vɛɛ Naŋ Looku yɛ Miŋ Sina Kilisiɔŋaa Tonyaa?

PILEI

Wanaa bɔɔbɔɔ dimi hau maa Kilisiɔŋnda nda cho ni. Kɛ nda kpou nɔ laalaŋnda pilɛ le, nduyɛ a nɔ vɛlɛ sawala pilɛ le. Lelaŋ, vɛɛ naŋ looku yɛ miŋ sina Kilisiɔŋaa tonyaa?

1. Nɛɛ yaa cho yɛ Kilisiɔŋnda?

Kilisiɔŋnda cho buɛiyaa Chiisuaa, ɔɔ tol kɔɔliaa nduaa ni. (Nuawɔ Walta Kiilaa 11:26.) Vɛɛ nda chɔm yɛ maa buɛiyaa Chiisuaa nda cho ni? Mi Chiisu dimi aa: “Te la hiou pɛ lachi a nyɛ ya dimi wo tosaa, mɛɛ buɛiyaa niaa lekɛndɛi nya cho ni.” (Chɔŋ 8:31) Mɛɛ hei chɔm ni maa Kilisiɔŋaa tonyaa nɔ ma tol pɛɛkula Chiisulaŋ kɔɔli. Diom Mɛlɛkaa Chiisu ndoo soliŋ kpeku lɔɔlɔɔ ni le waŋnda pɛɛkoo. Kilisiɔŋaa tonyaa bɛɛ, o Baabuiyo choo laalaŋnda ndalaŋ la tɔlnuŋ ni.—Nuawɔ Luku 24:27.

2. Vɛɛ Kilisiɔŋaa tonyaa chɔm yɛ kaalaa?

Mi Chiisu dimul tol kɔɔliaa nduaa aa: “La kaaliaŋ vellaa velle, mɛɛ ya I kaala nya yɛ.” (Chɔŋ 15:12) Vɛɛ Chiisu ndoo chɔm yɛ maa o kaala buɛiyaa nduaa? Mi ndoo chua teleŋndo le waa latulu a nda, mbo dɛɛniaa nda, nduyɛ mbo mala nda. Mbo yɔŋgu pɛɛŋ yoomu ndɔɔ le nda. (1 Chɔŋ 3:16) O nɛi pilɛ koŋ choo, o cho ko a sondo le Kilisiɔŋaa tonyaa kaaliaŋ te. Kɛ, nyɛ nda tosa wo bɛɛ chɔm maa a kaaliaŋ vellaa velle.

3. Wali yɛɛ Kilisiɔŋaa tonyaa kɛsi yɛ kɔllo choo?

Mi Chiisu ke buɛiyaa nduaa wallo le tosaa. “Mbo viam nda . . . le ma kɔ dimi suɛi Mɛlɛkɛi a Masale Mɛlɛkaleŋ okɔɔ.” (Luku 9:2) O cho ko o fondaŋnda ndala lepiɛilaŋ te Kilisiɔŋaa tasiaa ndaa dimi yooŋgu kɛndɔɔ le. Kɛ mi ndaa kuɛ vɛlɛ o chiɛila waŋnda a o luŋ kpendekele. (Nuawɔ Walta Kiilaa 5:42; 17:17.) Hau bɛɛ, mi Kilisiɔŋaa tonyaa komal waŋnda o fondaŋnda yɛ yɛ laŋ le nda tonya Baabuiyo pɛɛkoo. A kaala chaaŋaa ndaa waŋnda chieeya. Le hei, a cho a kɔl kɛndɛ le teleŋ ndaa a yoomuma ndaŋ soliŋndo kpeku, le nda yooŋgu Baabui ke nda kɔl dɛɛniaa a tiindaŋndo wo dimullo.—Maki 12:31.

CHƆƆLU YAASIAA

Yaasiaa wɔ ma che teŋgeŋ cho Kilisiɔŋaa tonyaa tɛɛŋ, a wanaa kɛɛ le pɛɛkula Chiisulaŋ a tamasi ndɔɔ tolɔɔ kɔɔli wa.

4. Ma nuuviaa tonya Baabuiyo

Kilisiɔŋnda o wɔsiŋ kɛmɛ tasoŋ niŋ ndaa nɔ bɛɛleŋ le Diom Mɛlɛkaa

O cho Kilisiɔŋnda kpou le buulaŋ le sinaa tonya Baabuiyo le. Handu VIDUEIYO, okoŋ mi la suukaŋ o nyunaa hoo choo:

VIDUEIYO: Vɛɛ Kaaŋnde Faŋaŋ Yɛ o Pɛɛkula Chiisulaŋ Choo? (5:11)

Vɛɛ kaaŋnde ipum kɛɛ yɛ niŋ le waŋnda pɛɛkula Chiisulaŋ pɛɛkoo?

Mi Chiisu pɛɛku waŋnda tonya cho o Diom Mɛlɛkaa niŋndo. Nuawɔ Chɔŋ 18:37, okoŋ mi la suukaŋ o nyunaa hoo choo:

A mɛɛ Chiisu dimi yɛ, vɛɛ naŋ looku yɛ miŋ sina Kilisiɔŋaa cho o “kumbu tonyaa choo” wa?

5. Ma pɛɛku waŋnda tonya Baabuiyo

Kilisiɔŋnda o wɔsiŋ kɛmɛ tasoŋ niŋ ndaa dimul waŋnda yooŋgu kɛndɔɔ

Tuupa mi Chiisu miiŋgu o choo choo niŋ, mbo ke buɛiyaa nduaa wallo le tosaa. Nduyɛ wallo hoo cho wɔ tosaŋndo suŋ suŋ. Nuawɔ Maatiu 28:19, 20 a Walta Kiilaa 1:8, okoŋ mi la suukaŋ o nyunaa hoo choo:

Vɛɛ kpɛ Chiisu ndoo dimi yɛ maa wali dimiaa yooŋgu kɛndɔɔ nɔ mbo tosaŋ?

6. Ma tosa nyɛ nda dimul waŋnda wo

Yɛɛ tosa yɛ mi po pilɛ diolaŋ aa Tɔm laalaŋ kɛsɛ maa o saaluŋ Kilisiɔŋnde tonyaleŋ? Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Mi Tambu Kɔl a Piɛiye (5:20)

O vidueiyo hoo niŋ, yɛɛ tosa yɛ mi Tɔm tambu kɔl a piɛiye?
Le yɛɛ o laalaŋ yɛ maa o saaluŋ tonyaa?

O cho dimioo le kɛ tosaa. Nuawɔ Maatiu 7:21, okoŋ mi la suukaŋ o nyunalaŋ ndaŋ choo:

Yɛɛ nɛŋi yɛ Chiisu kɔllo? Dimioo maa ŋ laalaŋ o ndu niŋ ɔɔ nyɛ naŋ laalaŋndo dɔwɔɔ o wali niŋ?

7. A kaaliaŋ vellaa velle

Kilisiɔŋnda o wɔsiŋ kɛmɛ tasoŋ niŋ ndaa kaaliaŋ vellaa velle

Baa Kilisiɔŋnda luei niŋ pa yoomula ndalaŋ o kpundɔɔ niŋ le chaaŋaa ndaa Kilisiɔŋnda? Handu VIDUEIYO, okoŋ mi la suukaŋ o nyunalaŋ ndaŋ choo:

VIDUEIYO: Mbo Yɔŋguŋ le Ma Dii Ndu le Ndu (2:55)

O vidueiyo hoo niŋ, yɛɛ nyindu yɛ Lɔd le dimioo maa a dii ndu le Ŋgɔɔ Chohaŋsiŋ?
A yiyaŋ pa maa mbo chɔm maa Kilisiɔŋnɔ tonyaa o cho ni?

Nuawɔ Chɔŋ 13:34, 35, okoŋ mi la suukaŋ o nyunalaŋ ndaŋ choo:

Vɛɛ buɛiyaa Chiisuaa (ɔɔ Kilisiɔŋaa tonyaa) nɔ yɛ ma bii wanaa nda cho kaale pilɛ le wa?
Vɛɛ nda tosa yɛ hei a teleŋ chɔuwo?

TE WAŊNDO DIMI PƐ AA: “Kilisiɔŋnda tosa niŋ sɔɔŋ wɔɔŋndoŋ tau. Lelaŋ, nda bɛɛ cho o tonya choo le.”

Bolle Baabuile kuɛɛ ŋ soliŋ yɛ kpeku le ndu chɔmndo mɛɛ naŋ nɔla miŋ saaluŋ Kilisiɔŋaa tonyaa yɛ?

SƆƆŊ KULLOŊ

Mi Kilisiɔŋaa tonyaa tol pɛɛkula cho o Baabuiyo niŋndaŋ kɔɔli, ma chɔm kaala kpeekpeiyo, nduyɛ ma pɛɛku waŋnda tonya Baabuiyo.

Nyunala miiŋgaa choo laŋ

O yɛɛ choo laalaŋnda Kilisiɔŋaa tonyaa tɔlnuŋ yɛ?
Suliŋ kuɛɛ mala yɛ naa miŋ sina Kilisiɔŋaa tonyaa?
Wali kuɛɛ Kilisiɔŋaa tonyaa tosa yɛ?

Poonyiaa paale suɛi lebolle hei chuu leŋ:

Kpeleŋ ŋ nɔ ma kɛsi wo

Te o bɛnda pɛ, kɔ mɛɛndiaŋ lɛuvii Seiyaa Chɛhowaa cho num ikɛiye.

Nyɛ cheleŋ:

Your other goal

CHƆƆLU SƆƆŊ PUM TOFA

Chɔɔlu wɔ pɛɛku ma sina wanaa cho kindiŋndo le tamasi Chiisu wo tolɔɔ kɔɔli, a pɛɛkula ndɔlaŋ ndo.

Nɛɛ Yaa Cho yɛ Seiyaa Chɛhowaa? (1:13)

Tofawɔ nyɛ mala ndepilɛnɔ wa paandu Katolikiinɔɔ, mbo “saaluŋ Kilisiɔŋaa tonyaa” wo.

“Ma Soliŋ Baabuiyo Kpeku le Nyunala Nilaŋ Kpou Mulioo!” (Bandu Mɛŋgɛlaa, Nyaakuɛiyo 1, 2014)

Tofawɔ ma che mɛɛ Kilisiɔŋaa tonyaa chɔm chaaŋaa ndaa laalaŋnda kaalaa yɛ, te kpundɔɔ komal nda pɛ.

Puaapiliaa Naa Malaa Te Kpundɔɔ Del Pɛ—Buŋgɛi Pɔmbɔ (3:57)

Mi Chiisu chɔm nyɛ cho tosa mi waŋnda sina buɛiyaa nduaa wo. Tofawɔ ma che mɛɛ Kilisiɔŋaa tonyaa waalioo cho tamasi Kilisiɔŋaa tasiaa tolɔɔ kɔɔli le nyɛ o dimi koŋ ndo tosaa yɛ.

“Sɔɔŋ Kuɛɛ Mala yɛ Naa le Sinaa Kilisiɔŋaa Tonyaa?” (Bandu Mɛŋgɛlaa, Fuoo 1, 2012)

Naapum a Yeema Dɔɔ Vɛlɛ

NYUNALA WAŊNDA NYUNA LƆƆLƆƆ LAŊ

Yɛɛ Cho yɛ Pɛɛku Baabuiyo?

Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.

TUEI YOOMOO YEELA LEFAFƐƐŊ!—YAUWO LE BAABUIYO PƐƐKOO.