DILONGI 18
Mutindu ya kuzaba Baklisto ya kedika
Bamilion ya bantu ketubaka ti bakele Baklisto. Kasi bakendimaka mambu mesuasana mpe bakesadilaka bansikudukusu yina mesuasana. Na yau, yinki mutindu beto lenda zaba Baklisto ya kedika?
1. Nani kele Muklisto?
Baklisto kele banlonguki, to bantu yina kelandaka Yesu Klisto. (Tanga Bisalu 11:26.) Yinki mutindu bakemonisaka ti bakele banlonguki ya Yesu? Yandi tubaka: ‘Kana beno mebikana na kati ya mpova na munu, beno kele mpenza banlonguki na munu.’ (Yoane 8:31) Yamemonisa ti Baklisto ya kedika fueti zitisa malongi ya Yesu. Mutindu kaka Yesu vuandaka sadila Masonukua na malongi na yandi, malongi ya Baklisto ya kedika kekatukaka kaka na Biblia.—Tanga Luka 24:27.
2. Yinki mutindu Baklisto ya kedika kemonisaka nzola?
Yesu tubilaka banlonguki na yandi: ‘Beno zolana beno na beno mutindu munu zolaka beno.’ (Yoane 15:12) Yinki mutindu Yesu monisaka ti yandi kezolaka banlonguki na yandi? Yandi vuandaka lutisa ntangu kintuadi na bau, kukindisa bau, mpe kusadisa bau. Yandi pesaka ata luzingu na yandi samu na bau. (1 Yoane 3:16) Mutindu mosi na Yesu, nzola ya Baklisto suka kaka ve na bampova. Bakemonisaka na bampova mpe na bisalu na bau ti bakezolanaka bau na bau.
3. Yinki kisalu Baklisto ya kedika kekukipesaka na yau?
Yesu pesaka kisalu mosi na banlonguki na yandi. ‘Yandi tindaka bau na kusamuna Kimfumu ya Nzambi.’ (Luka 9:2) Baklisto ya siekle ya ntete vuandaka samuna, kaka ve na kisika na bau ya nsambudulu kasi bavuandaka kuenda na bisika ya bantu mingi mpe na bayinzo ya bantu. (Tanga Bisalu 5:42; 17:17.) Mutindu mosi Baklisto ya kedika na ntangu na beto, bakesamunaka kedika ya Biblia bisika nionso yina bakekuta bantu. Bakezolaka bantu yankaka, na yau bakesadilaka na kiese nionso ntangu mpe ngolo na bau samu na kusamuna nsangu ya Biblia yina kepesaka kivuvu mpe yina kebombaka.—Marko 12:31.
KOTA NA MPINDA
Tadila mutindu nge lenda sala lusuasanu kati na Baklisto ya kedika na bayina kelandaka ve malongi mpe kifuani ya Yesu.
4. Bakesosaka kedika ya Biblia
Baklisto ya siekle ya ntete vuandaka zitisa Mpova ya Nzamb
Baklisto nionso ve kebakaka Biblia na mfunu. Tula VIDEO, mpe na manima tadila kiuvu yayi melanda.
-
Yinki mutindu mabundu yina ketubaka ti bakele Baklisto kena kukoka ve kulonga malongi yina Yesu longaka?
Yesu longaka kedika yina katukaka na Mpova ya Nzambi. Tanga Yoane 18:37, mpe na manima tadila kiuvu yayi:
-
Samu na Yesu, yinki mutindu beto lenda zabila Baklisto yina kele ‘na ndambu ya kedika?’
5. Bakesamunaka kedika ya Biblia
Baklisto ya siekle ya ntete vuandaka samunina bantu yankaka
Tekila Yesu kuenda na dizulu, yandi pesaka banlonguki kisalu mosi kena salama ti bubu yayi. Tanga Matayo 28:19, 20 mpe Bisalu 1:8, mpe na manima tadila kiuvu yayi:
-
Yinki mutindu kisalu ya kusamuna kena kusalama bubu yayi?
6. Bakesadilaka mambu yina bakesamunaka
Yinki ndimisaka muntu mosi na nkumbu ya Tom ti yandi mebaka kedika? Tula VIDEO, mpe na manima tadila biuvu yayi melanda.
-
Na video, yinki tindaka Tom yandi bika mabundu?
-
Samu na yinki yandi ndimaka mpenza ti yandi memona kedika?
Mambu yina beto kesalaka kevuandaka na bupusi kuluta bampova na beto. Tanga Matayo 7:21, mpe na manima tadila kiuvu yayi:
-
Samu na Yesu, yinki meluta mfunu—kutuba ti beto kele na kiminu to kumonisa yau na bisalu?
7. Bakezolanaka bau na bau
Baklisto ya siekle ya ntete vuandaka monisa nzola kati na bau
Baklisto tulaka mpenza luzingu na bau na kivonza samu na bampangi na bau? Tula VIDEO, mpe na manima tadila biuvu yayi melanda.
-
Na video yayi, yinki tindaka Lloyd yandi lomba bakufua yandi na kisika ya mpangi Johansson?
-
Nge mekanisa ti yandi salaka mambu lokola Muklisto ya kedika?
Tanga Yoane 13:34, 35, mpe na manima tadila biuvu yayi:
-
Yinki mutindu banlonguki ya Yesu (Baklisto ya kedika) ketadilaka bantu ya nkanda to ya buala yankaka?
-
Yinki mutindu bakesalaka yau na ntangu ya mvita?
BANTU YANKAKA METUBA: “Baklisto salaka mambu ya yimbi kuluta —Yinki mutindu balenda vuanda dibundu ya kedika?”
-
Yinki verse nge lenda sadila samu na kumonisa mutindu beto lenda zabila Baklisto ya kedika?
BUNKUFI
Baklisto ya kedika kelandaka malongi ya Biblia, bakemonisaka nzola yina kelombaka kukiyimina, mpe bakesamunaka kedika ya Biblia.
Mvutukulu
-
Wapi kisika malongi ya Baklisto ya kedika kekatukaka?
-
Yinki kikadulu bakezabilaka Baklisto ya kedika?
-
Yinki kisalu Baklisto ya kedika kesalaka?
SOSA
Tadila mambu mingi yina metadila kimvuka ya bantu yina kesalaka ngolo samu na kulanda kifuani mpe malongi ya Yesu.
Tala yinki sadisaka mamelo mosi yandi mona “dibuta ya kimpeve ya kedika.”
“Basalelaki Biblia mpo na koyanola na motuna nyonso!” (Linɔ́ngi ya Mosɛnzɛli ya 1 Avril, 2014)
Longuka mutindu Baklisto ya kedika kemonisaka nzola na bampangi na bau yina kele na nsatu ya lusadusu.
Kusadisa bampangi na beto na ntangu ya kivonza—Video ya nkufi (3:57)
Tala mutindu Baklisto ya siekle ya ntete mpe Baklisto ya bubu yayi kena kulanda kifuani yina Yesu tubaka samu na kuzaba banlonguki na yandi.
“Ndenge nini okoki koyeba bakristo ya solo?” (Linɔ́ngi ya Mosɛnzɛli ya 1 Mars, 2012)
