TUTO 18
Molukona Kuzibela Bakreste ba Niti
Batu babañata baipapata kuli ki Bakreste. Kono litumelo za batu bao zashutana mi hape habalateleli likuka zeswana mwa bupilo bwabona. Kacwalo, lukona kuziba cwañi Bakreste ba niti?
1. Mukreste ki mutu yacwañi?
Bakreste ki balutiwa kamba balateleli ba Jesu Kreste. (Mubale Likezo 11:26.) Kono babonisa cwañi kuli ki balutiwa ba Jesu? Jesu naabulezi kuli: “Haiba muzwelapili mwa linzwi laka, mu balutiwa baka luli.” (Joani 8:31) Taba yeo italusa kuli Bakreste ba niti baswanela kulatelela lituto za Jesu. Mi sina feela Jesu hanaalutanga batu kuzwelela mwa Mañolo, zebalumela Bakreste ba niti ni zona lizwa mwa Bibele.—Mubale Luka 24:27.
2. Bakreste ba niti babonisa cwañi lilato?
Jesu naabulelezi balateleli bahae kuli: “Mulatane sina moni milatezi.” (Joani 15:12) Jesu naabonisize cwañi kuli naalata balutiwa bahae? Naatandanga nako ni bona, naabasusuezanga, mi naabatusanga. Mane naabashwezi. (1 Joani 3:16) Kwandaa kubulela feela za lilato, Bakreste ba niti ni bona baezanga lika zeñwi zebonisa kuli banani lilato. Zebaeza ni zebabulela libonisa kuli balatana.
3. Ki musebezi mañi obapatehile kueza Bakreste ba niti?
Jesu naalaezi balutiwa bahae kuli baeze musebezi omuñwi. Naabalumile “kuyo kutaza Mubuso wa Mulimu.” (Luka 9:2) Bakreste ba kwa makalelo bao nebakutalize mwa libaka zene balapelelanga, mwa libaka za nyangela, mane hamohocwalo ni fa ndu ni ndu. (Mubale Likezo 5:42; 17:17.) Bakreste ba niti ni bona kacenu bakutazanga litaba za niti za mwa Bibele kokufumaneha batu kaufela. Bakeñisa kuli balata batu babañwi, Bakreste ba niti baitusisanga nako ni maata abona kutaluseza babañwi litaba za mwa Bibele zeomba-omba ni zefa sepo.—Mareka 12:31.
MUBATISISE
Munyakisise momukona kuzibela Bakreste ba niti ni momukona kuzibela batu babasa lateleli lituto ni mutala wa Jesu.
4. Babatisisanga niti ya mwa Bibele
Bakreste ba mwa linako za baapositola nebakuteka hahulu Linzwi la Mulimu
Haki batu kaufela babaipapata kuli ki Bakreste babakuteka litaba za niti za mwa Bibele. Mubuhe VIDIO, mi kihona mukanyakisisa puzo yelatelela.
-
Bulapeli bobuñwi bobuipapata kuli ki bwa Sikreste buezize lika mañi zetahisize kuli batu bapalelwe kuituta litaba zanaalutile Jesu?
Jesu naalutanga litaba za niti kuzwelela mwa Linzwi la Mulimu. Mubale Joani 18:37, mi kihona mukanyakisisa puzo yelatelela:
-
Ka kuya ka litaba zanaalutile Jesu, lukona kuziba cwañi Bakreste baba “kwa lineku la niti”?
5. Bakutazanga niti ya mwa Bibele
Bakreste ba mwa linako za baapositola nebakutazanga ku babañwi
Pili asika kutela kale kwa lihalimu, Jesu naafile balateleli bahae musebezi obasa zwelapili kueza ni kacenu. Mubale Mateu 28:19, 20 ni Likezo 1:8, mi kihona mukanyakisisa puzo yelatelela:
-
Bakreste ba niti nebaka kutaza kuisa lili mi nebaka eza cwalo kuyo fita kai?
6. Bakreste ba niti bapila ka kulumelelana ni zebakutaza
Ki lika mañi zenekolwisize muuna yabizwa Tom kuli ufumani bulapeli bwa niti? Mubuhe VIDIO, mi kihona mukanyakisisa lipuzo zelatelela.
-
Ka kuya ka zemuboni mwa vidio, ki kabakalañi bo Tom hane bazwafisizwe ki bulapeli?
-
Ki kabakalañi cwale habanani buikolwiso bwa kuli bafumani bulapeli bwa niti?
Zebaeza batu ki zona zebonisa luli mobainezi. Mubale Mateu 7:21, mi kihona mukanyakisisa puzo yelatelela:
-
Ki lika mañi zaanga Jesu kuba za butokwa mwahalaa zeluipapata kulumela ni zelueza?
7. Bakreste ba niti balatana
Bakreste ba mwa linako za baapositola nebalatana
Kana Bakreste ba niti batusanga Bakreste sina bona niha bakona kuipumana mwa butata? Mubuhe VIDIO, mi kihona mukanyakisisa lipuzo zelatelela.
-
Mwa vidio yelubuhile, ki nto mañi yenesusuelize bo Lloyd kusileleza Muzwale Johansson niha nebakona kuba mwa kozi?
-
Kana munahana kuli zene baezize libonisa kuli ki Bakreste ba niti?
Mubale Joani 13:34, 35, mi kihona mukanyakisisa lipuzo zelatelela:
-
Balutiwa ba Jesu, bona Bakreste ba niti baswanela kuunga cwañi batu ba mubala wa litalo oshutana ni wabona kamba babazwa kwa naha isili?
-
Bakreste bao bakona kubonisa cwañi lilato kwa batu babacwalo ka nako ya ndwa?
BABAÑWI BABULELANGA KULI: “Bakreste baezize lika zemaswe hahulu, kacwalo bulapeli bwabona haki bwa niti.”
-
Ki liñolo mañi lemukona kubalela mutu kuli mumutuse kuziba Bakreste ba niti?
LITABA KA BUKUSWANI
Bakreste ba niti balatelela lituto za mwa Bibele, balata batu babañwi, mi bakutaza litaba za niti za mwa Bibele.
Mulundulule
-
Litaba zebalumela Bakreste ba niti lifumaneha kai?
-
Bakreste ba niti bazibahala ka kalemeno mañi?
-
Ki musebezi mañi obaeza Bakreste ba niti?
MUBONE LITABA ZEÑWI
Muitute zeñata ka za sikwata sa batu babaeza mobakonela kaufela kulatelela mutala wa Jesu Kreste ni lituto zahae.
Mubone zenetusize musali yomuñwi yanaabanga mukatolika kufumana bulapeli bwa niti.
“Nebaalabile Lipuzo Zaka Kaufela ka Kuitusisa Bibele!” (Tawala ya Mulibeleli, April 1, 2014)
Muitute mo Bakreste ba niti baboniseza lilato kwa balapeli babañwi babatokwa kutusiwa.
Kutusa Mizwale Baluna Babatahezwi ki Likozi—Kalulonyana ya vidio (3:57)
Munyakisise zebonisa kuli Bakreste ba mwa linako za baapositola ni Bakreste ba niti kacenu bapila ka kulumelelana ni zanaabulezi Jesu kuli nelika zibahaza balateleli bahae.
“Ki Lika Mañi Zezibahaza Bakreste ba Niti?” (Tawala ya Mulibeleli, March 1, 2012)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
