CHILONGESA 18
Mwakutachikijila Vaka-Kulishitu vaMuchano
Vatu vavavulu valivuluka kupwa vaka-Kulishitu. Oloze keshi nge vosena vafwelela vyuma vyovimweko, kaha nawa kavakavangiza jishimbi jojimweko. Jino natutachikiza ngachilihi ovo vapwa vaka-Kulishitu vamuchano?
1. Uno vaka-Kulishitu vapwa veya?
Vaka-Kulishitu vapwa tumbaji chipwe ngwetu vaka-kukavangiza Yesu Kulishitu. (Tanga Vilinga 11:26.) Uno veji kusololanga ngachilihi ngwavo vapwa tumbaji twaYesu? Yesu ambile ngwenyi: “Kachi nge namutwamanga mumazu ami, kaha chikupu vene munapu mutumbaji twami.” (Yowano 8:31) Echi chalumbununa nge vaka-Kulishitu vamuchano, vatela kukavangizanga vyuma anangwilenga Yesu. Ngana muze Yesu anangwilenga vatu vyuma vyamuVisoneka, navaka-Kulishitu vamuchano nawa vatela kunangulanga vatu vyuma vyamuMbimbiliya.—Tanga Luka 24:27.
2. Uno vaka-Kulishitu vamuchano veji kusololanga ngachilihi zangi?
Yesu alwezele vaka-kumukavangiza ngwenyi: “[Lizangenunga] navakwenu nganomu ngunamizangenga enu.” (Yowano 15:12) Uno Yesu asolwelelenga ngachilihi tumbaji twenyi zangi? Ashikaminenga navo, nakuvakolezeza nakuvakafwa. Kaha nawa echele mwono wenyi hali vakiko. (WaYowano 1, 3:16) Chochimwe nawa, vaka-Kulishitu vamuchano kavakumina kaha hakuhanjika ngwavo vazanga vakwavoko. Oloze veji kusolwelanga vakwavo zangi muhanjikiso namuvilinga.
3. Mulimo muka vazata vaka-Kulishitu vamuchano?
Yesu ahanyine tumbaji twenyi mulimo. “Avatumine kuya nakwambulula Wangana waKalunga.” (Luka 9:2) Vaka-Kulishitu vakulivanga vambulwilenga mujimbu kuvihela vyakulemesela Kalunga, nakuvihela vyasanga namumembo. (Tanga Vilinga 5:42; 17:17.) Navaka-Kulishitu vamuchano makumbi ano veji kunangulanga vatu muchano wamuMbimbiliya kwosena okwo navavawana. Vazanga vakwavo vatu. Echi chikiko chavalingisa vazachise lwola lwavo nangolo javo mangana vavambulile mujimbu wamuMbimbiliya wakuvendejeka nakuvakafwa vatalilile vyuma vyamwaza kulutwe.—Mako 12:31.
LINANGULE VYAKUJIMINYINA
Shinganyeka havyuma vyalingisa vaka-Kulishitu vamuchano valihandunune navatu vaze kavakavangiza vyuma anangwilenga Yesu nachakutalilaho chenyiko.
4. Veji kutondatondanga muchano wamuMbimbiliya
Vaka-Kulishitu vakulivanga vamwenenga Mazu aKalunga kupwa amalemu
Vatu vamwe vaze valivuluka ngwavo vaka-Kulishitu kavamona muchano wamuMbimbiliya kupwa waulemuko. Talenu VINDIYO, nakushimutwila hachihula chinakavangizaho.
-
Uno jichachi javaze valivuluka kupwa vaka-Kulishitu jinahono ngachilihi kunangula vatu vyuma anangwilenga Yesu?
Yesu anangwilenga vatu muchano wamuMazu aKalunga. Tangenu Yowano 18:37, nakushimutwila hachihula chino:
-
Kweseka namazu ahanjikile Yesu, natutachikiza ngachilihi vaka-Kulishitu vaze ‘vakavangiza muchano’?
5. Veji kwambululanga muchano wamuMbimbiliya
Vaka-Kulishitu vakulivanga vambulililenga vatu mujimbu
Shimbu kanda Yesu ayenga mwilu, ahanyine vaka-kumukavangiza mulimo uze uliko namakumbi ano. Tangenu Mateu 28:19, 20 naVilinga 1:8, kufumaho shimutwilenu hachihula chino:
-
Uno mulimo wakwambulula vali nakuuzata kuheta haseteko muka?
6. Veji kulinganga vyuma veji kwambululanga
Vyuma muka vyakunywile Tom vize vyasolwele nge nawane vaka-Kulishitu vamuchano? Talenu VINDIYO, nakushimutwila havihula vinakavangizaho.
-
Vyuma muka vyalingishile Tom afume mukwitava apwile?
-
Vyuma muka vyamukunywile amone ngwenyi nawane muchano?
Vatu veji kulondezezanga chikuma vyuma natulinga, keshi vize natuhanjika kahako. Tangenu Mateu 7:21, nakushimutwila hachihula chino:
-
Uno vyuma vize tweji kuhanjikanga vikiko vyavilemu kuli Yesu tahi, nyi vize tweji kulinganga?
7. Valizanga navakwavo
Vaka-Kulishitu vakulivanga valizangilenga navandumbwavo
Uno vaka-Kulishitu veji kuhakanga kuyoya chavo muponde mangana vakinge vakwavo vaka-Kulishitu tahi? Talenu VINDIYO, nakushimutwila havihula vinakavangizaho.
-
Chuma muka chalingishile ndumbu Lloyd Likhwide ahake kuyoya chenyi muponde hakukinga ndumbu Johansson?
-
Kutala washinganyeka ngwove alingile chuma atela kulinga muka-Kulishitu wamuchano tahi?
Tangenu Yowano 13:34, 35, nakushimutwila havihula vino:
-
Vyuma muka vatela kulinga tumbaji twaYesu (kulumbununa vaka-Kulishitu vamuchano) kuvatu vavikova vyeka chipwe vakumafuchi eka?
-
Vyuma muka vatela kulinga mulwola lwajita?
VATU VAMWE NGWAVO: “Vaka-Kulishitu veji kulinganga vyuma vyavipi kuli vakwavo. Jino navapwa ngachilihi vaka-kwitava vamuchano?”
-
Chisoneka muka nautangila mutu chize nachisolola mwakutachikijila vaka-Kulishitu vamuchano?
CHISHINA UNALINANGULA
Vaka-Kulishitu vamuchano veji kukavangizanga vyuma yanangula Mbimbiliya, nakusolola zangi yamwenemwene, nakwambulula muchano wamuMbimbiliya.
Kuhituluka
-
Uno vyuma vafwelela vaka-Kulishitu vamuchano vyazama haka?
-
Uno vaka-Kulishitu vamuchano vavatachikijila haka?
-
Uno vaka-Kulishitu vamuchano vazata mulimo muka?
WANA VYAVIVULU
Linangule vyavivulu havatu vaze veji kuzatanga nangolo mangana vakavangize chakutalilaho chaYesu Kulishitu navyuma anangwilenga.
Wana vyuma vyalingishile mutu umwe uze apwile shishita wamuliuka lyakwitava awane “tanga yamuchano yakushipilitu.”
“Vazachishile Mbimbiliya haKukumbulula Vihula Vyami Vyosena!” (Kaposhi Kakutalila, July 1, 2014)
Wana omwo vaka-Kulishitu vamuchano veji kusolwelanga zangi vandumbwavo vali muukalu.
Kukafwa Vandumbwetu Nge Kunasoloka Ukalu Wakulijila—yaChihanda (3:57)
Wana omwo vaka-Kulishitu vamuchano makumbi ano, vali nakulinga vyuma valingilenga vaka-Kulishitu vakulivanga, vize ambile Yesu ngwenyi navakatachikijilaho vaka-kumukavangiza.
“Vyuma Muka Natutachikijilaho Vaka-Kulishitu Vamuchano?” (Chihande chamuKaposhi Kakutalila)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
