Elõñ pilien armej rej ba bwe er Kũrjin. Ijoke, tõmak ko aer rej oktak jãn doon, im eoktak l̦õmn̦ak eo aer jãn doon kõn ta eo em̦m̦an im ta eo enana. Kõn men in, ewi wãween ad maroñ kile ro rej m̦oolin Kũrjin?

1. Ta mel̦el̦ein ñe juon ej Kũrjin?

Ro rej Kũrjin rej ri-kal̦oor ro an Jesus Christ. (Riit Jerbal 11:26.) Ewi wãween aer kam̦ool bwe rej ri-kal̦oor ro an Christ? Jesus ear ba: “El̦aññe kom̦ naaj pokake wõt naan ko aõ, kom̦ij lukkuun ri-kal̦oora.” (Jon 8:31) Mel̦el̦ein bwe Kũrjin ro rem̦ool rej aikuj pokake katak ko an Jesus. Im ãinwõt an kar katak ko an Jesus pedped wõt ioon Naanin Anij, tõmak eo an Kũrjin ro rem̦ool rej aikuj in bar pedped wõt ioon Baibõl̦ eo.​—Riit Luk 24:27.

2. Ewi wãween an ro rej m̦oolin Kũrjin kwal̦o̦k yokwe?

Jesus ear ba ñan ri-kal̦oor ro an: “Kom̦win yokwe doon ãinwõt aõ kar yokwe kom̦.” (Jon 15:12) Ewi wãween an kar Jesus kwal̦o̦k bwe ej yokwe ri-kal̦oor ro an? Ear jol̦o̦k iien ippãer, kõkajoor er, im jipañ er. Joñan, ear lel̦o̦k mour eo an kõn er. (1 Jon 3:16) Ejja ãindeinl̦o̦k wõt, Kũrjin ro rem̦ool rejjab baj kõnono wõt kõn yokwe, ak rej kwal̦o̦k aer yokwe doon ikijjeen naan im kõm̦m̦an ko aer.

3. Ta jerbal eo Kũrjin ro rem̦ool rej poub kake?

Jesus ear lel̦o̦k juon jerbal ñan ri-kal̦oor ro an. “Ear jilkinl̦o̦k er bwe ren kwal̦o̦k naan kõn Aelõñ eo an Anij.” (Luk 9:2) Kũrjin ro jinoin rar jab baj kwal̦o̦k naan wõt ilo jikin kabuñ ko aer, ak rar bar kwal̦o̦k naan ilo̦bwilej im ilo m̦õko im̦õn armej. (Riit Jerbal 5:42; 17:17.) Kũrjin ro rem̦ool rainin, rej bareinwõt kwal̦o̦k kõn katak ko rem̦ool ilo Baibõl̦ ilo jabdewõt jikin ewõr armej ie. Rej yokwe aolep armej, innem rej m̦õn̦õn̦õ in kõjerbal iien im maroñ ko aer ñan kwal̦o̦k kõn ennaan eo ilo Baibõl̦ me ej kaenõm̦m̦an kõj im letok juon kõjatdikdik.​—Mark 12:31.

 KAM̦WILAL̦L̦O̦K AM̦ MEL̦EL̦E

4. Rej pukot katak ko rem̦ool ilo Baibõl̦

5. Rej kwal̦o̦k naan kõn katak ko rem̦ool jãn Baibõl̦

 6. Rej jerbali men ko rej katakin kaki

Ta eo ear kõm̦m̦an bwe juon em̦m̦aan etan Tom en tõmak bwe ear lo ro rej m̦oolin Kũrjin? Kõjo̦e PIJAIN ALWÕJ eo, innem bwebwenato kake kajjitõk kein:

• Ilo pijain alwõj eo, ta eo ear kõm̦m̦an bwe en jako an Tom tõmak ilo kabuñ ko?

• Etke ej tõmak bwe em̦õj an lo m̦ool eo?

Kõm̦m̦an ko an juon armej el̦apl̦o̦k tokjãer jãn naan ko an wõt. Riit Matu 7:21, innem bwebwenato kake kajjitõk in:

• Ta eo eaorõkl̦o̦k ippãn Jesus​—men ko jej ba bwe jej tõmaki ak men ko jej kam̦ool ad tõmaki ikijjeen kõm̦m̦an ko ad?

7. Rej yokwe doon

• En kar ewi wãween an ri-kal̦oor ro an Jesus (Kũrjin ro rem̦ool) kõm̦m̦an ñan armej ro rej itok jãn bar juon aelõñ?

• Enaaj ewi wãween aer kõm̦m̦ane men in ñe ewõr tarin̦ae?

 TARLEP IN KATAK EO ILO TUKADU

Ro rej m̦oolin Kũrjin rej pokake katak ko ilo Baibõl̦, rej kwal̦o̦k yokwe ilo aer m̦õn̦õn̦õ in kaarmejjeteik er make, im rej kwal̦o̦k naan kõn katak ko rem̦ool ilo Baibõl̦.

Ãlij

• Tõmak eo an Kũrjin ro rem̦ool rej pedped ioon ta?

• Kadkad ta eo ej kaalikkar wõn Kũrjin ro rem̦ool?

• Jerbal ta eo Kũrjin ro rem̦ool rej kõm̦m̦ane?