LECCIÓN 18
¿Ndáana kúú na̱ cristiano na̱ nda̱a̱?
Ku̱a̱ʼání na̱ yiví káʼa̱nna ña̱ kúúna cristiano, soo va̱ása inkáchi íyo ña̱ kándíxana ta saátu va̱ása inkáchi íyo ña̱ kéʼéna. Tá saá, ¿ndáa ki̱ʼva kivi kunda̱a̱-iniyó ndáana kúú cristiano na̱ nda̱a̱?
1. ¿Ndáana ndixa kúú cristiano?
Cristiano kúú na̱ discípulo ta̱ Jesucristo á na̱ ndíku̱n sa̱tára (kaʼvi Hechos 11:26). ¿Ndáa ki̱ʼva náʼa̱na ña̱ ndixa ndíku̱nnara? Ta̱ Jesús ni̱ka̱ʼa̱nra ña̱yóʼo: “Tá ndíku̱nndó ña̱ sánáʼi̱ ndóʼó, mií ña̱ ndixa kúúndó discípuloi̱” (Juan 8:31). Ña̱yóʼo kúni̱ kachiña, ña̱ na̱ ndixa kúú cristiano xíniñúʼu kandíxana ña̱ sa̱náʼa̱ ta̱ Jesús. Ña̱ kándíxa na̱ ndixa kúú cristiano va̱xiña nu̱ú Biblia, nda̱a̱ táki̱ʼva íyo ña̱ sa̱náʼa̱ ta̱ Jesús saáchi nu̱ú Biblia ka̱na ña̱yóʼo (kaʼvi Lucas 24:27).
2. ¿Ndáa ki̱ʼva náʼa̱ na̱ ndixa kúú cristiano ña̱ kúʼvi̱-inina xínina inkana?
Ta̱ Jesús ni̱ka̱ʼa̱nra xíʼin na̱ discípulora ña̱ ná keʼéna ña̱yóʼo: “Kuʼvi̱-inindó kunitáʼanndó nda̱a̱ táki̱ʼva kúʼvi̱-ini yi̱ʼi̱ xínii̱ ndóʼó” (Juan 15:12). ¿Ndáa ki̱ʼva ni̱na̱ʼa̱ ta̱ Jesús ña̱ xi̱kuʼvi̱-inira xi̱xinira na̱ discípulora? Ta̱vára tiempo ña̱ ni̱xi̱yora xíʼinna, ña̱ chi̱ka̱a̱ra ndee̱ xíʼinna ta saátu ña̱ chi̱ndeétáʼanra xíʼinna ta nda̱a̱ ni̱xi̱ʼi̱ra xa̱ʼa̱na (1 Juan 3:16). Nda̱a̱ táki̱ʼva ke̱ʼé ta̱ Jesús saátu kéʼé na̱ ndixa kúú cristiano, saáchi va̱ása káʼa̱n kuitína ña̱ kúʼvi̱-inina xínitáʼanna chi náʼa̱na ña̱yóʼo xíʼin tu̱ʼun ña̱ káʼa̱nna ta saátu xíʼin ña̱ kéʼéna.
3. ¿Ndáa chiñu kúú ña̱ kéʼé na̱ ndixa kúú cristiano?
Ta̱ Jesús chi̱ndaʼára na̱ discípulora “ña̱ ku̱ʼu̱nna natúʼunna xa̱ʼa̱ Reino Ndióxi̱” (Lucas 9:2). Na̱ nu̱ú xi̱kuu cristiano va̱ása níxinatúʼun kuitína xa̱ʼa̱ Ndióxi̱ nu̱ú xi̱ndakutáʼanna ña̱ ndasakáʼnunara, chi saátu xi̱xa̱ʼa̱nna xi̱natúʼunna nu̱ú íyo ku̱a̱ʼá na̱ yiví ta saátu xi̱xa̱ʼa̱nna veʼe tá veʼe (kaʼvi Hechos 5:42; 17:17). Ta saátu tiempo vitin, na̱ ndixa kúú cristiano nátúʼunna xa̱ʼa̱ ña̱ káʼa̱n Biblia xíʼin na̱ yiví ni nda̱a̱ ndáaka nu̱ú ndóona. Xa̱ʼa̱ ña̱ kúʼvi̱-inina xínina na̱ yiví, xíʼin ña̱ si̱í-ini xíniñúʼuna tiempona xíʼin ndee̱na ña̱ va̱ʼa natúʼunna xíʼinna xa̱ʼa̱ ña̱ káʼa̱n Biblia koo chí nu̱únínu ta saátu ña̱ sandíkona-inina (Marcos 12:31).
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva síín íyo na̱ ndixa kúú cristiano nu̱ú inka na̱ yiví na̱ va̱ása ndíku̱n yichi̱ ta̱ Jesús ña̱ sa̱náʼa̱ra.
4. Nándukúna ña̱ nda̱a̱ nu̱ú Biblia
Na̱ cristiano na̱ nu̱ú xi̱ndakunina ña̱ ndáyáʼviní tu̱ʼun Ndióxi̱.
Su̱ví ndiʼi na̱ káʼa̱n kúú cristiano ndákuni ña̱ ndáyáʼviní ña̱ va̱xi nu̱ú Biblia. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Sava na̱ veʼe-ñu̱ʼu na̱ káʼa̱n kúú cristiano sa̱sina nu̱ú na̱ yiví ña̱ va̱ʼa ná kǒo kunda̱a̱-inina xa̱ʼa̱ ña̱ sa̱náʼa̱ ta̱ Jesús, ¿ndáa ki̱ʼva ke̱ʼéna ña̱yóʼo?
Ta̱ Jesús sa̱náʼa̱ra xa̱ʼa̱ ña̱ nda̱a̱ ña̱ va̱xi nu̱ú tu̱ʼun Ndióxi̱. Kaʼvindó Juan 18:37 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva ni̱ka̱ʼa̱n ta̱ Jesús, ¿ndáa ki̱ʼva kivi kunda̱a̱-iniyó ndáana kúú na̱ cristiano na̱ kéʼé ña̱ nda̱a̱?
5. Nátúʼunna xa̱ʼa̱ ña̱ nda̱a̱ ña̱ va̱xi nu̱ú Biblia
Na̱ cristiano na̱ nu̱ú xi̱natúʼunna xa̱ʼa̱ tu̱ʼun Ndióxi̱ xíʼin inka na̱ yiví.
Tá kúma̱níka ku̱ʼu̱n ta̱ Jesús chí ndiví, sa̱ndákoora iin chiñu ndaʼa̱ na̱ discípulora ta nda̱a̱ tiempo vitin kéʼéna ña̱yóʼo. Kaʼvindó Mateo 28:19, 20 xíʼin Hechos 1:8, ta ka̱ʼa̱nndó xa̱ʼa̱ ña̱yóʼo:
-
¿Ama ta ndáa míí xa̱a̱na natúʼunna xa̱ʼa̱ tu̱ʼun Ndióxi̱?
6. Xíʼin ña̱ kéʼéna nátúʼunna xíʼin na̱ yiví
¿Nda̱chun ka̱ndíxaní iin ta̱a ta̱ naní Tom ña̱ nda̱ni̱ʼíra na̱ ndixa kúú cristiano? Kotondó VIDEO, ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱niyó nu̱ú video, ¿nda̱chun sa̱ndákava ña̱ religión ini ta̱ Tom?
-
¿Nda̱chun kándíxaní ta̱ Tom ña̱ nda̱ni̱ʼíra ña̱ nda̱a̱?
Ña̱ káʼa̱nyó xíniñúʼu na̱ʼa̱yóña xíʼin ña̱ kéʼéyó. Kaʼvindó Mateo 7:21 ta ka̱ʼa̱nndó xa̱ʼa̱ ña̱yóʼo:
-
¿Ndáaña kúú ña̱ ndáyáʼvika nu̱ú ta̱ Jesús, ña̱ káʼa̱nyó ña̱ kándíxayó á ña̱ naʼa̱yó ña̱yóʼo xíʼin ña̱ kéʼéyó?
7. Kúʼvi̱-inina xínitáʼanna
Na̱ cristiano na̱ nu̱ú xi̱kuʼvi̱-inina xi̱xinitáʼanna.
¿Á íyo tu̱ʼva na̱ cristiano ña̱ kuvina xa̱ʼa̱ na̱ ndásakáʼnu Ndióxi̱ xíʼinna? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáa xa̱ʼa̱ kúú ña̱ ni̱xi̱yo tu̱ʼva ta̱ hermano Lloyd ña̱ kuvira xa̱ʼa̱ ta̱ hermano Johansson?
-
¿Á ke̱ʼéra nda̱a̱ táki̱ʼva kéʼé na̱ ndixa kúú cristiano?
Kaʼvindó Juan 13:34, 35 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva xíniñúʼu keʼé na̱ ndixa kúú cristiano xíʼin na̱ yiví na̱ inka raza á na̱ inka ñuu?
-
Ta, ¿ndáa ki̱ʼva kéʼéna ña̱yóʼo tá íyo guerra?
ÑA̱ KÁʼA̱N SAVA NA̱ YIVÍ: “Na̱ cristiano xa̱a̱ ku̱a̱ʼání ña̱ va̱ása va̱ʼa kéʼéna. ¿Ndáa ki̱ʼva kivi koona religión ña̱ nda̱a̱?”.
-
¿Ndáa texto kúú ña̱ kaʼviún ña̱ va̱ʼa na̱ʼún ndáana ndixa kúú cristiano?
ÑA̱ XA̱A̱ SA̱KUAʼAYÓ
Na̱ ndixa kúú cristiano kéʼéna ña̱ sánáʼa̱ ña̱ Biblia, ta chíka̱a̱na ndee̱ ña̱ keʼéna nda̱a̱ ndáaka ña̱ʼa xa̱ʼa̱ inkana xa̱ʼa̱ ña̱ kúʼvi̱-inina xíninana, ta saátu nátúʼunna xa̱ʼa̱ ña̱ nda̱a̱ ña̱ va̱xi nu̱ú Biblia.
Ná ndakaʼányó xa̱ʼa̱ ña̱yóʼo
-
¿Ndáa míí tává na̱ ndixa kúú cristiano ña̱ kándíxana?
-
¿Ndáaña va̱ʼa kúú ña̱ kúúmií na̱ ndixa kúú cristiano?
-
Ta, ¿ndáa chiñu kúú ña̱ kéʼéna?
NANDUKÚKA XA̱ʼA̱ÑA
Kuxini̱ka na̱ yiví na̱ chíka̱a̱ ndee̱ ña̱ kundiku̱nna yichi̱ ta̱ Jesucristo ta saátu ña̱ sa̱náʼa̱ra.
Kaʼvi ndáa ki̱ʼva ni̱xa̱a̱ iin ñaʼá ñá xi̱kuu monja nda̱ni̱ʼíñá iin familia na̱ ndixa ndásakáʼnu Ndióxi̱.
Koto ndáa ki̱ʼva náʼa̱ na̱ ndixa kúú cristiano ña̱ kúʼvi̱-inina xínina na̱ hermano tá xíniñúʼu na̱yóʼo ña̱ chindeétáʼanna xíʼinna.
Chíndeétáʼanndi̱ xíʼin na̱ hermanondi̱ tá kúu iin tu̱ndóʼo (iin táʼvíña) (3:57)
Ta̱ Jesús ni̱ka̱ʼa̱nra ndáa ki̱ʼva koo na̱ ndíku̱n miíra. Koto ndáa ki̱ʼva kítáʼan ña̱ xi̱keʼé na̱ cristiano na̱ ni̱xi̱yo tá siglo nu̱ú xíʼin ña̱ kéʼé na̱ ndixa kúú cristiano na̱ íyo tiempo vitin.
“¿Ndáaña náʼa̱ ndáana ndixa kúú cristiano?” (La Atalaya, 1 tí marzo ku̱i̱ya̱ 2012)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
