CIJIJO 18

Tingamazivisa Kudini Makristu Okadi?

RIJANYI

Mu nyika yese, mamiriau o vandhu vanonanga kuti tiri Makristu. Asi asipi vese vanotenda zviro zvimwezvo, kana vanoteveja jijiso yondhoyo. Waro, tingamazivisa kudini Makristu ocokwadi?

1. Zvinoda kurevenyi kuva Mukristu?

Mukristu mujiji kana kuti muteveri wa Jesu Kristu. (Verenganyi Mabasa o Vapostori 11:26.) Ngo zvapi zvinovonesa kuti ivona ndi vajiji va Kristu? Jesu wakati: “Kudari mukagara meciita zvandinonanga imwimwi muri vajiji vangu kamare.” (Johani 8:31) Izvi zvinoda kureva kuti Mukristu wokadi anodikana kuzwira zvakajijiswa ndi Jesu. Zvese zvaijijisa Jesu no zvaaita zvaizwirana no Soko ra Mwari. Mu njira yakaezana, zvese zvinonangwa ngo Makristu okadi no kuita zvinodikana kuzwirana no zvinonangwa ngo Bhaibheri.—Verenganyi Ruka 24:27.

2. Makristu okadi anokhombijisa kudini rudo?

Jesu wakavhunja vateveri vake kudari: “Disananyi ngocenyu inga zvandakamuda.” (Johani 15:12) Jesu wakakhombijisa kudini kuti waida vajiji vake? Iyena waibesera vajiji vake no kuvavangisa, cimwenizve waipeja mukuvo navo. Jesu wakaguma pakupira upenyu hwake ngo ndava yo vajiji vake. (1 Johani 3:16) Mukufananavo, Makristu okadi anoitavo zvizinji kupinda kuvereketa basi ngo pamusoro po rudo. Ivona vanokhombija ngo magama no zviito kuti vano rudo kuno umwe no umweni.

3. Makristu okadi anobatikana pakuita basa renyi?

Jesu wakapa vajiji vake basa rinosisira maningi. “Iyena wakavatuma kocumaera Umambo hwa Mwari.” (Ruka 9:2) Kuvhira kare, Makristu okadi aacaicumaera basi mundau jo kunamatira. Vaicumaerazve mundau jaiwanika vandhu vakawanda no kucumaera muzi ngo muzi. (Verenganyi Mabasa o Vapostori 5:42; 17:17.) Nyamasi uno, Makristu okadi anocumaeravo cokwadi co Bhaibheri kuri kwese kunowanika vandhu. Ivona vanoda maningi vandhu. Ngo kudaro, izvi ndizvona zvinoita kuti vadakare ngo kushandisa nguva yavo no simba pakujijisa masoko o mu Bhaibheri anopa vetero no embezero.—Marko 12:31.

NASANYI KUPSAKISISA

Vonanyi musiyano uripo pakati po Makristu okadi na vaya vacikateveri jijiso ja Jesu no muezaniso wake.

4. Ivona vanoda kuziva cokwadi ciri mu Bhaibheri

Makristu okutanga aireremeja Soko ra Mwari

Asipi vese vanonanga kuti tiri Makristu, vanorangarira kuti zvinosisira kuziva cokwadi ciri mu Bhaibheri. Rijanyi VHIDHIYO, perapo bhuisananyi ngo muvhunjo unotevera.

VHIDHIYO: Manera Akapauka Makristu mu Cokwadi (5:11)

Zviara zvimweni zvainanga kuti tiri Makristu, zvakajijisenyi zvakasiyana no zvakajijiswa ndi Jesu?

Jesu wakajijisa cokwadi co Soko ra Mwari. Verenganyi Johani 18:37, perapo bhuisananyi ngo muvhunjo unotevera:

Mukuzwirana na Jesu, tingazivisa kudini Makristu “ari ku divi ro cokwadi”?

5. Ivona vanocumaera cokwadi co Bhaibheri

Makristu okutanga ari kujijisa vamweni

Jesu acito ahwirira kudenga, iyena wakapa vajiji vake basa riri kuithwa mbhera nyamasi uno. Verenganyi Mateu 28:19, 20 na Mabasa o Vapostori 1:8, perapo bhuisananyi ngo muvhunjo jinotevera:

Kureva kuti masoko akanaka aidikana kucumaehwa mu nyika nganani? Iwona aizocumaehwa ko mukuvo wakadini?

6. Ivona vanopona mukuzwirana no zvavanojijisa

Icinyi cakakhohwesa mwanarume umweni anodanijwa Tomu kuti iyena wainga awana Makristu ocokwadi? Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Ndainga Ndaremba ngo zvo Ciara (5:20)

Mu vhidhiyo, zvicinyi zvakaita kuti Tomu asiye zvo ciara?
Icinyi cakamukhohwesa kuti iyena wainga awana cokwadi?

Zviito zvinosisira maningi kupinda magama. Verenganyi Mateu 7:21, perapo bhuisananyi ngo muvhunjo unotevera:

Ngo zvapi zvinosisira maningi kuna Jesu: Nga zviyana zvatinonanga kuti tinotenda kana ngo zvatinotenda ngo zviito?

7. Ivona vanodisana

Makristu okutanga ari kudisana umwe no umweni

Kureva kuti Makristu akadira upenyu hwavo pa ngozi kuti aponese hama jawo? Rijanyi VHIDHIYO, perapo bhuisananyi ngo muvhunjo jinotevera.

VHIDHIYO: Iyena Wakapira Upenyu Hwake (2:55)

Mu vhidhiyo, Lloyd wakadirisa kudini upenyu hwake pa ngozi kuti aponese hama Johanisoni?
Munorangarira kuti Lloyd wakaita zviro mukuzwirana no Makristu ocokwadi?

Verenganyi Johani 13:34, 35, perapo bhuisananyi ngo muvhunjo jinotevera:

Vajiji va Jesu (kana Makristu okadi) vaizotajana kudini? Kureva kuti ivona vaizoita zvakasiyana ngo ndava yo ganda kana nyika yavanovha?
Kureva kuti ivona vaizokhombija rudo uhu pikija pa mukuvo wo hondo?

VANDHU VAMWENI VANOTI: “Azvinenyi no ciara caunoenda, cinosisira maningi ikutenda muna Jesu.”