MUTU 18
Mwatingaziŵile Akhristu Acendi
Pacalo conse pali ŵanthu mabiliyoni amene okamba kuti ni Akhristu. Koma okhulupilila vinthu vosiyana ndipo okonkha lini mfundo zolingana. Tetyo, kansi Akhristu acendi tingaŵaziŵe tyani?
1. Kansi Akhristu ni ŵanthu otyani?
Akhristu ni ophunzila a Yesu Khristu. (Ŵelengani Machitidwe 11:26.) Kansi oonesha tyani kuti ni ophunzila a Yesu? Yesu ekamba kuti: “Ngati musunga mau ŵangu nthawi zonse, ndiye kuti nimwe ophunzila ŵangu cendi.” (Yohane 8:31) Izi zutanthauza kuti Akhristu acendi ofunika kukonkha ziphunziso za Yesu. Nthawi zonse, Yesu enzophunzisa zinthu zocokela m’Malemba. Nao Akhristu acendi ocita cimozimozi.—Ŵelengani Luka 24:27.
2. Kansi Akhristu acendi oonesha tyani kuti okondana?
Yesu euzhya ophunzila ŵake kuti: “Mukokondana monga ni mwanakukondelani neo.” (Yohane 15:12) Kansi Yesu eonesha tyani kuti enzoŵakonda ophunzila ŵake? Enzotandala nao, enzoŵalimbikisha noŵayavya. Enzoŵakonda ngako cakuti efwika na poŵafwila. (1 Yohane 3:16) Molingana na izi, Akhristu acendi okamba lini tyala na pakamwa kuti okondana. Koma oonesha kuti okondana cendi kupitila mu zokamba na zocita zao.
3. Kansi Akhristu acendi ocita nchito yanji?
Yesu etuma ophunzila ŵake ‘kuti akalalikile za Ufumu wa Mulungu.’ (Luka 9:2) Akhristu oyambilila enzolalikila lini tyala m’malo olambilila. Koma enzolalikila soti ku malo kwenzopezeka ŵanthu anyinji na ku mang’anda ya ŵanthu. (Ŵelengani Machitidwe 5:42; 17:17.) Nao Akhristu acendi olalikila uthenga wabwino kulikonse kungapezeke ŵanthu. Oseŵenzesha nthawi yao na mphamvu zao polalikila uthenga wabwino wamene upasa ŵanthu ciyembekezo na citonthozo.—Maliko 12:31.
PHUNZILANI ZINYINJI
Phunzilani zingakuyavyeni kusiyanisha pakati pa Akhristu acendi na Akhristu awenye.
4. Ofufuza cendi ca m’Baibo
Akhristu oyambilila enzoona kuti Mau a Mulungu ni ofunika
Ŵanthu ayakine amene okamba kuti ni Akhristu, olemekeza lini mfundo za m’Baibo. Onelelani VIDYO, nokambilana konsho yokonkhapo.
-
Kansi machechi amene okamba kuti ni acikhristu, ocitanji pokangisha ŵanthu kukonkha zeciphunzisa Yesu?
Yesu enzophunzisa cendi copezeka m’Mau a Mulungu. Ŵelengani Yohane 18:37, nokambilana konsho iyi:
-
Molingana na zecikamba Yesu, kansi tingaŵaziŵe tyani Akhristu amene ali “kumbali ya cendi”?
5. Olalikila cendi ca m’Baibo
Akhristu oyambilila enzolalikila
Akaliyoluta kululu, Yesu epasa ophunzila ŵake nchito yamene ikalucitika mpaka masiku ŵano. Ŵelengani Mateyu 28:19, 20 na Machitidwe 1:8, nokambilana konsho iyi:
-
Kansi nchito yolalikila yufunika kucitika kufwika pamlingo wotyani?
6. Ocita zinthu mokatizhyana na zakulalikila
N’cinji cesimikizhyila Tom kuti wapeza Akhristu acendi? Onelelani VIDYO, nokambilana makonsho okonkhapo.
-
Mu vidyo iyi, n’cinji cenze cepangisha Tom kuleka kukhulupilila cipembezo ciliconse?
-
N’cinji cemusimikizhyila kuti wapeza Akhristu acendi?
Vocita vasu vuonesha zinyinji zokhuza umunthu wasu kupambana mau ŵasu. Ŵelengani Mateyu 7:21, nokambilana konsho iyi:
-
Kansi Yesu oona kuti cofunika ngako n’cinji pakati pa zatukamba kuti tukhulupilila, olo zatuonesha m’zocita zasu?
7. Okondana
Akhristu oyambilila enzokondana
Kansi n’cendi kuti Akhristu oika moyo wao pangozi kuti apulumuse Akhristu ayao? Onelelani VIDYO, nokambilana makonsho aŵa.
-
Mu vidyo iyi, n’cinji celimbikisha Lloyd kuika moyo wake pangozi kuti apulumuse Mkwasu Johansson?
-
Muona kuti zecicita zeonesha kuti ni Mkhristu wacendi?
Ŵelengani Yohane 13:34, 35, nokambilana makonsho aŵa:
-
Kansi ophunzila a Yesu (kapena kuti Akhristu acendi) ocita zinthu m’njila yotyani na ŵanthu a mtundu uyakine olo a kucalo ciyakine?
-
Kansi izi angazicite tyani pa nthawi ya nkhondo?
ŴANTHU AYAKINE OKAMBA KUTI: “Akhristu acita vinthu vinyinji viipa. Lomba cipembezo cao cingankhale tyani cacendi?”
-
Kansi mungaŵelenge lemba yotyani yamene yuonesha mwatingaziŵile Akhristu acendi?
MFUNDO ZACIDULE
Akhristu acendi okonkha zayuphunzisa Baibo, ooneshana cikondi cokonzeka kufwila ayakine, ndipo olalikila cendi ca m’Baibo.
Kuwelezhya mfundo zikulu-zikulu
-
Kansi zinthu zakukhulupilila Akhristu acendi n’zozikiwa pa cinji?
-
Ni nkhalidwe yanji yuziŵikisha Akhristu acendi?
-
Nanga Akhristu acendi ocita nchito yanji?
FUFUZANI
Phunzilani za gulu ya olambila amene oyesayesa kukonkha cisanzo ca Yesu Khristu na zeciphunzisa.
Onani zeyavya munakazi wamene kale enze sisita wacikatolika kupeza Akhristu acendi.
“Enzoseŵenzesha Baibo Poyankha Konsho Iliyonse!” (Nsanja ya Olonda, April 1, 2014)
Onani mwamene Akhristu ooneshela cikondi kuli ayao amene ofunikila thandizo.
Kupeleka Thandizo Kuli Akwasu Amene Akumana na Soka Yacilengedwe—Kambali kake (3:57)
Onani mwamene Akhristu acendi masiku ŵano, ocitila zinthu zolingana na zeenzocita Akhristu oyambilila, zamene Yesu ekamba kuti zikaŵaziŵikishe kuti ni ophunzila ŵake acendi.
“Kansi Akhristu Acendi Mungaŵaziŵe Tyani?” (Nsanja ya Olonda, March 1, 2012)
