THUTO 18
O ka Tseba Bjang Bakriste ba Nnete?
Batho ba dimilione ba ipotša gore ke bona Bakriste. Eupša melao yeo ba phelago ka yona, le ditumelo tša bona, ga di swane. Bjale potšišo ke gore, re ka tseba bjang Bakriste ba nnete?
1. Go ba Mokriste go bolela eng?
Go ba Mokriste go bolela go ba morutiwa wa Jesu Kriste, goba go ba molatedi wa gagwe. (Bala Ditiro 11:26.) Bakriste ba swanetše go bontšha bjang gore ke barutiwa ba Jesu? Jesu o itše: “Ge e ba le dula lentšung la ka, gona le barutiwa ba ka e le ka kgonthe.” (Johane 8:31) Se se bolela gore Bakriste ba nnete ba swanetše go kwa seo Jesu a se rutago. Go no swana le ge dithuto tšeo Jesu a bego a di ruta di be di etšwa ka Mangwalong, ditumelo tša Bakriste ba nnete le tšona di swanetše go tšwa ka Beibeleng.—Bala Luka 24:27.
2. Bakriste ba nnete ba bontšhana lerato bjang?
Jesu o ile a botša balatedi ba gagwe gore: “Le ratane go etša ge ke le ratile.” (Johane 15:12) Jesu o bontšhitše bjang gore o be a rata barutiwa ba gagwe? O bontšhitše se ka go fetša nako a na le bona, a ba kgothatša, e bile a ba thuša. Le gona o ile a ba a ba hwela. (1 Johane 3:16) Ka mo go swanago, Bakriste ba nnete le bona ga ba no bolela feela ka melomo gore ba a ratana. Mara ba bontšhana seo ka mediro.
3. Ke mošomo ofe woo Bakriste ba nnete ba o dirago?
Jesu o file barutiwa ba gagwe mošomo wa gore ‘ba yo botša batho ka Mmušo wa Modimo.’ (Luka 9:2) Bakriste ba pele ba be ba botša batho ditaba tše dibotse ba le mafelong a bona a borapedi, mafelong a batho bohle, le ka magaeng a bona. (Bala Ditiro 5:42; 17:17.) Ka mo go swanago, lehono Bakriste ba nnete ba botša batho ditaba tše dibotse kae le kae moo ba ba hwetšago gona. Ka ge ba rata batho ba bangwe, ga ba na bothata bja go diriša nako le matla a bona gore ba ba botše ditaba tše dibotse tša Mmušo wa Modimo.—Mareka 12:31.
ITHUTE KA MO GO TSENELETŠEGO
Ekwa gore o ka tseba bjang Bakriste ba nnete.
4. Ba nyakišiša therešo ya Beibele
Bakriste ba pele ba be ba tšea Lentšu la Modimo le le bohlokwa
Bakriste ba bangwe bao e sego ba nnete, ga ba bone go le bohlokwa gore ba nyakišiše therešo ya Beibele. Bapalang BIDIO ye, gomme le boledišaneng ka potšišo e latelago:
-
Dikereke tšeo di ipolelago gore ke tša Bokriste, di ile tša dira’ng go thibela batho gore ba ithute ka Jesu?
Jesu o be a ruta therešo yeo e tšwago ka Lentšung la Modimo. Balang Johane 18:37, gomme le boledišaneng ka potšišo e latelago:
-
Go ya ka Jesu, re ka tseba bjang Bakriste bao ba “emago le therešo”?
5. Ba ruta batho therešo ya Beibele
Bakriste ba pele ba be ba botša batho ka Modimo
Pele Jesu a eya legodimong, o ile a fa balatedi ba gagwe mošomo woo ba bego ba swanetše go o dira. Mošomo woo o sa dirwa le lehono. Balang Mateo 28:19, 20 le Ditiro 1:8, gomme le boledišaneng ka potšišo e latelago:
-
Barutiwa ba Jesu ba be ba swanetše go bolela ditaba tše dibotse go fihla bokgoleng bofe?
6. Ba dira seo ba se rutago batho
Ke’ng seo se ilego sa dira gore monna yoo a bitšwago Tom a tshepe gore o hweditše Bakriste ba nnete? Bapalang BIDIO ye, gomme le boledišaneng ka dipotšišo tše di latelago:
-
Mo bidiong ye, ke’ng seo se dirilego gore Tom a tlogele kereke?
-
Ke ka baka la’ng a be a kgodišegile gore o hweditše therešo?
Ga se ra swanela go no bolela feela, mara re swanetše go dira dilo tšeo re di bolelago. Balang Mateo 7:21, gomme le boledišaneng ka potšišo e latelago:
-
Na selo se bohlokwa go Jesu ke ge re no bolela feela ka melomo gore re badumedi, goba na ke ge re bontšha seo ka ditiro?
7. Ba a ratana
Bakriste ba pele ba be ba ratana
Na ke nnete gore Bakriste ba kile ba bea maphelo a bona kotsing gore ba phološe Bakristegotee le bona? Bapalang BIDIO ye, gomme le boledišaneng ka dipotšišo tše di latelago:
-
Mo bidiong ye, ke’ng seo se ilego sa dira gore Lloyd a bee bophelo bja gagwe kotsing gore a šireletše Ngwanabo rena Johansson?
-
Na o nagana gore seo a se dirilego se bontšha gore ke Mokriste wa nnete?
Balang Johane 13:34, 35, gomme le boledišaneng ka dipotšišo tše di latelago:
-
Barutiwa ba Jesu (goba Bakriste ba nnete) ba swara batho ba morafo o mongwe bjang?
-
Nakong ya ntwa ba bontšhana bjang lerato?
BATHO BA BANGWE BA RE: “Batho ba dikereke ba dira dilo tše mpe, ga go sa na kereke ya nnete”.
-
O ka bontšha motho yo mongwe lengwalo lefe leo le ka mo thušago go tseba Bakriste ba nnete?
O ITHUTILE ENG?
Bakriste ba nnete ba kwa seo ba ithutilego sona ka Beibeleng, ba a ratana, e bile ba ruta batho therešo ya Beibele.
Dipotšišo
-
Ditumelo tša Bakriste ba nnete di tšwa kae?
-
Bakriste ba nnete o ba bona ka eng?
-
Bakriste ba nnete ba dira mošomo ofe?
ITHUTE KA MO GO OKETŠEGILEGO
Ithute ka mo go oketšegilego ka sehlopha sa batho seo se lekago ka thata gore se latele mohlala wa Jesu Kriste le dithuto tša gagwe.
Ekwa gore ke’ng seo se ilego sa dira gore motho yoo e bego e le moitlami wa mosadi a hwetše “lapa la kgonthe la moya.”
“Di be di Diriša Beibele go Araba Potšišo e Nngwe le e Nngwe!” (Morokami wa April 1, 2014.)
Ekwa gore Bakriste ba nnete ba bontšha bjang gore ba rata Bakristegotee le bona bao ba hlokago thušo.
Re Thuša Bana Babo Rena ge ba Wetšwe ke Dikotsi tša Tlhago—Karolwana (3:57)
Ekwa gore Bakriste ba nnete ba lehono ba dira dilo dife tšeo di swanago le tšeo di dirilwego ke Bakriste ba pele, tšeo Jesu a boletšego gore di be di tla bontšha gore ke balatedi ba gagwe.
“Ke Maswao Afe ao a Hlaolago Bokriste bja Therešo?” (Morokami wa March 1, 2012.)
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
