ƐZUKOALƐDEƐ 18
Kɛzi Ɛbanwu Nɔhalɛ Kilisienema La
Menli mgbe mgbe dɔɔnwo ka kɛ bɛle Kilisienema. Noko asolo bɛ nuhua ko biala diedi yɛɛ bɛnva mɛla ko ne ala bɛmbɔ bɛ ɛbɛla. Ɔti kɛ ɔkɛyɛ na yɛanwu nɔhalɛ Kilisienema ɛ?
1. Kilisienenli a le nwane?
Kilisienema le Gyisɛse Kelaese ɛdoavolɛma. (Kenga Gyima ne 11:26.) Kɛzi bɛda ye ali kɛ bɛle Gyisɛse ɛdoavolɛma ɛ? Ɔhanle kɛ: “Saa bɛdi me edwɛkɛ zo dahuu a, ɛnee bɛle me ɛdoavolɛma amgba.” (Dwɔn 8:31) Ɛhye kile kɛ ɔwɔ kɛ nɔhalɛ Kilisienema di Gyisɛse ngilehilelɛ ne azo. Na kɛ mɔɔ ɛnee Gyisɛse ngilehilelɛ ne gyi Ngɛlɛlera ne azo la, zɔhane ala a nɔhalɛ Kilisienema diedi ne gyi Baebolo ne azo a.—Kenga Luku 24:27.
2. Kɛzi nɔhalɛ Kilisienema da ɛlɔlɛ ali ɛ?
Gyisɛse hanle hilele ye ɛdoavolɛma kɛ: “Bɛhulo bɛ nwo kɛ mɔɔ mehulo bɛ la.” (Dwɔn 15:12) Kɛzi Gyisɛse lale ye ali kɛ ɔkulo ye ɛdoavolɛma ɛ? Ɔnyianle mekɛ ɔmaanle bɛ, ɔmaanle bɛ anwosesebɛ na ɔboale bɛ. Ɔwule bɔbɔ ɔmaanle bɛ. (1 Dwɔn 3:16) Zɔhane ala a nɔhalɛ Kilisienema ɛnga kɛ bɛlɛ ɛlɔlɛ ala a. Emomu, bɛdua bɛ ɛdendɛlɛ nee bɛ nyɛleɛ zo bɛda ye ali kɛ bɛkulo bɛ nwo.
3. Gyima boni a nɔhalɛ Kilisienema bɔ mɔdenle yɛ a?
Gyisɛse maanle ye ɛdoavolɛma gyima. “Ɔzoanle bɛ kɛ bɛhɔha Nyamenle Belemgbunlililɛ ne anwo edwɛkɛ.” (Luku 9:2) Alimoa Kilisienema hanle edwɛkɛ ne wɔ ɛzonlenlɛ azua nu, gua zo yɛɛ menli azua nu. (Kenga Gyima ne 5:42; 17:17.) Ɛnɛ noko nɔhalɛ Kilisienema ka Baebolo ne anu nɔhalɛ ne kile menli wɔ ɛleka biala. Bɛkulo menli, yemɔti bɛfi anyelielɛ nu bɛfa bɛ mekɛ nee bɛ anwosesebɛ bɛka Baebolo ne anu edwɛkɛ mɔɔ maa menli nyia anyelazo na ɔkyekye bɛ rɛle la.—Maake 12:31.
SUKOA DƆƆNWO
Sukoa mɔɔ bamaa wɔanwu ngakyile mɔɔ wɔ nɔhalɛ Kilisienema nee menli mɔɔ ɛnva Gyisɛse ngilehilelɛ nee ye neazo ɛmbɔ bɛ ɛbɛla avinli la.
4. Bɛkpondɛ Baebolo ne anu nɔhalɛ ne
Alimoa Kilisienema ne anye liele Nyamenle Edwɛkɛ ne anwo
Tɛ awie biala mɔɔ ka kɛ ɔle Kilisienenli la a anye die Baebolo ne anu nɔhalɛ ne anwo a. Ye VIDIO ne, na akee bɛzuzu kpuya ɛhye anwo.
-
Kɛzi Kilisiene asɔne bie mɔ ɛngilehile menli Gyisɛse ngilehilelɛ ne ɛ?
Gyisɛse hilehilele nɔhalɛ ne mɔɔ wɔ Nyamenle Edwɛkɛ ne anu la. Kenga Dwɔn 18:37, na akee bɛzuzu kpuya ɛhye anwo:
-
Kɛ mɔɔ Gyisɛse hanle la, kɛ ɔkɛyɛ na yɛanwu Kilisienema “mɔɔ wɔ nɔhalɛ ne afoa” la ɛ?
5. Bɛka Baebolo ne anu nɔhalɛ ne bɛkile menli
Alimoa Kilisienema ne lile awie mɔ daselɛ
Kolaa na Gyisɛse ahɔ anwuma la, ɔmaanle ye ɛdoavolɛma gyima bie mɔɔ tɛkɔ zo ɛnɛ a. Kenga Mateyu 28:19, 20 yɛɛ Gyima ne 1:8 na akee bɛzuzu kpuya ɛhye anwo:
-
Bɛbayɛ edwɛkɛhanlɛ gyima ne bahɔdwu ni?
6. Bɛyɛ mɔɔ bɛka la
Duzu a maanle nrenyia bie mɔɔ bɛfɛlɛ ye Tom la liele lile kɛ yenwu nɔhalɛ Kilisiene ɛzonlenlɛ ne a? Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, duzu a maanle Tom gyakyile asɔne ɛhɔlɛ a?
-
Duzu a maanle ɔliele ɔlile kɛ yenwu nɔhalɛ ɛzonlenlɛ ne a?
Yɛ nyɛleɛ ka dɔɔnwo tɛla mɔɔ yɛka la. Kenga Mateyu 7:21, na akee bɛzuzu kpuya ɛhye anwo:
-
Duzu a hyia Gyisɛse kpalɛ a—mɔɔ yɛka kɛ yɛdie yɛdi anzɛɛ nyɛleɛ mɔɔ yɛda ye ali la?
7. Bɛkulo bɛ nwo ngoko
Alimoa Kilisienema ne hulole bɛ nwo ngoko
Asoo Kilisienema ɛva bɛ ngoane ɛdo esiane nu ɛmaa bɛ gɔnwo mɔ Kilisienema? Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, duzu a maanle Lloyd vale ye ngoane dole esiane nu maanle Adiema Johansson a?
-
Ɛnea a ɔyɛle debie mɔɔ ɔwɔ kɛ Kilisienenli yɛ la ɔ?
Kenga Dwɔn 13:34, 35, na akee bɛzuzu kpuya ɛhye mɔ anwo:
-
Kɛzi Gyisɛse ɛdoavolɛma (nɔhalɛ Kilisienema) nee menli mɔɔ asolo bɛ kɔla anzɛɛ bɛvi maanle gyɛne nu la di ɛ?
-
Kɛzi bɛyɛ ye zɔ wɔ konle mekɛ nu ɛ?
BIE MƆ KA KƐ: “Kilisienema ɛyɛ ninyɛndane dɔɔnwo—kɛzi bɛ ɛzonlenlɛ ne kola yɛ nɔhalɛ ɛ?”
-
Ngɛlɛlera boni a ɛbagenga wɔava wɔahile kɛzi yɛbahola yɛanwu nɔhalɛ Kilisienema la ɛ?
EDWƐKƐ TITILI
Nɔhalɛ Kilisienema yɛ mɔɔ Baebolo ne ka la, bɛda nɔhalɛ ɛlɔlɛ ali na bɛka Baebolo ne anu nɔhalɛ ne bɛkile menli.
Ndinu
-
Duzu a nɔhalɛ Kilisienema diedi gyi zo a?
-
Subane boni a maa bɛnwu nɔhalɛ Kilisienema a?
-
Gyima boni a nɔhalɛ Kilisienema yɛ a?
KPONDƐ DƆƆNWO
Sukoa menli bie mɔɔ bɔ mɔdenle fa Gyisɛse Kelaese ngilehilelɛ nee ye neazo bɔ bɛ ɛbɛla la anwo ninyɛne dɔɔnwo.
Nea mɔɔ maanle raalɛ bie mɔɔ ɛnee le Roman sister la kpondɛle “nɔhalɛ sunsum nu abusua” la.
“Bɛvale Baebolo Ne Bɛbuale Kpuya Biala!” (Ɛzinzalɛ Arane, April 1, 2014)
Sukoa kɛzi nɔhalɛ Kilisienema da ɛlɔlɛ ali kile bɛ gɔnwo mɔ diedima mɔɔ hyia moalɛ la.
Yɛboa Yɛ Mediema Wɔ Mekɛ Mɔɔ Esiane Kɛzi La—Foa Bie (3:57)
Nea kɛzi alimoa Kilisienema nee nɔhalɛ Kilisienema mɔɔ wɔ ɛkɛ ɛnɛ la yɛ ninyɛne mɔɔ Gyisɛse hanle kɛ bɛbava bɛanwu ye ɛdoavolɛma la.
“Duzu A Maa Bɛnwu Nɔhalɛ Kilisiene Ɛzonlenlɛ A?” (Ɛzinzalɛ Arane, May 1, 2012)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
