LECCIÓN 18
¿Nikʼwach ne inqanabʼeej ajwach taqeh i manlik ajnimaneel?
Xti kʼih taqeh kʼachareel inkiqʼor chi ajnimaneel taqeh xa reʼ laʼ maʼ jenaj ta wach inkinimaj eh ni xa ta jenaj wach i kinaʼojbʼal. Ruum aj reʼ, ¿nikʼwach ne inqanabʼeej ajwach taqeh i manlik ajnimaneel?
1. ¿Chajariik irubʼan jenaj manlik ajnimaneel?
Reʼ taqeh ajnimaneel inkitahqeej i Jesucristo (chawil Hechos 11:26). ¿Nikʼwach inkikʼuhtaaj chi rajtahqaneel i Jesús taqeh? Reʼ Jesús xuqʼor: «Wilaʼ maʼ xakanaaʼ taq chik runimjiik i nuqʼoral, naa taq akahniik chi manlik waj tahqaneel» (Juan 8:31). Reʼ wilih iraaj ruqʼorom chi reʼ taqeh manlik ajnimaneel nakinimam i rukʼuhbʼaal i Jesús. Reʼ taqeh manlik ajnimaneel inkinimaj reʼ isamaj pan Santo Laj Huuj, jeʼ rukabʼ i Jesús chuʼnchel i xukʼuhtaaj xelik cho pan ruqʼorbʼal i Dios (chawil Lucas 24:27).
2. ¿Nikʼwach inkikʼuhtaaj i kʼaxooj taqeh manlik ajnimaneel?
Reʼ Jesús jeʼ wilih xuqʼor keh taqeh rajtahqaneel: «Kʼul taq cha kʼax awiibʼ chawach, jeʼ rukabʼ taq akʼaxariik i nubʼan i hin» (Juan 15:12). ¿Nikʼwach xukʼuhtaaj keh taqeh rajtahqaneel i Jesús chi irukʼax taqeh? Xikʼsaj qʼiij kuukʼ, xuyeew rukowiil kikʼux, xutobʼeej taqeh eh xuyeew i rukʼachariik chi kiij (1 Juan 3:16). Jeʼ rukabʼ i Jesús reʼ taqeh manlik ajnimaneel inkikʼuhtaaj i kʼaxooj chi kiwach ruukʼ inkibʼan eh inkiqʼor.
3. ¿Ahaʼ wilik i kamanik xkanabʼjik keh ruum i Jesús taqeh manlik ajnimaneel?
Reʼ Jesús xuyeew jenaj kikamaj taqeh rajtahqaneel, «xutaqʼaaj taqe reje chuqʼorariik ribʼiral i runimaal i rajaawriik i Dios» (Lucas 9:2). Reʼ taqeh peet ajnimaneel inkiqʼor naq i kʼuhbʼaal pan kiyeʼaabʼ reh loqʼinik eh kiʼooj woʼ naq chi ruqʼorariik i kʼuhbʼaal pan kipaat taqeh kʼachareel eh xa ahaʼ paʼ wilik kʼachareel (chawil Hechos 5:42; 17:17). Pan qaqʼijil reʼ taqeh manlik ajnimaneel inkiqʼor woʼ i kʼuhbʼaal chi riij i Santo Laj Huuj xa ahaʼ paʼ wilik kʼachareel. Ruum chi inkaaj wach i kas kichaaqʼ inkisaj kiqʼiij eh kiʼooj chi ruyeʼariik rukowiil kikʼux eh kuyʼinik ruukʼ i Santo Laj Huuj (Marcos 12:31).
CHATZʼIR RIIJ I KʼAHCHIʼ ATIJEM
Qil chaaj woʼ reet maʼ jenaj ta kiwach taqeh manlik ajnimaneel ruukʼ taqeh kʼachareel reʼ maʼ inkikʼam ta naah i rukʼuhbʼaal eh ni xa ta reʼ i rukʼachariik i Jesús.
4. Inkisikʼ i korik wilik chupaam i Santo Laj Huuj
Reʼ inkiqʼor chi ajnimaneel taqeh maʼ inkiyeew ta ruloqʼil iruqʼor i Santo Laj Huuj. Chawil taq i VIDEO eh tiqʼoroq taq chi riij:
-
Juʼjun taqeh iglesia reʼ inkiqʼor chi ajnimaneel taqeh maʼ inkiyeew ta naq qʼabʼ chi reʼ taqeh kʼachareel ne naq inkinabʼeej chi riij taqeh rukʼuhbʼaal i Jesús, ¿nikʼwach xkibʼan?
Reʼ Jesús xukʼuhtaaj i korik reʼ wilik pan ruqʼorbʼal i Dios. Chawil taq Juan 18:37 eh tiqʼoroq taq chi riij:
-
Jeʼ rukabʼ xuqʼor i Jesús, ¿chajariik chik inkibʼan taqeh ajnimaneel reʼ inkibʼan i korik?
5. Inkiqʼor i kʼuhbʼaal chi riij i korik wilik pan Santo Laj Huuj
Noq ko majaaʼ naq injohtik pan taxaaj i Jesús xuyeew jenaj kikamaj taqeh rajtahqaneel reʼ ko kʼahchiʼ rubʼanariik yuʼnaak. Chawil taq i Mateo 28:19, 20 eh i Hechos 1:8, eh tiqʼoroq taq chi riij:
-
¿Ko jaruuj narukuxiik ruqʼorariik i kʼuhbʼaal? ¿Eh ko ahaʼ naq naruqʼorariik i kʼuhbʼaal?
6. Ruukʼ i kikʼachariik inkikʼuhtaaj chi manlik ajnimaneel taqeh
¿Chaaj woʼ reet chʼiklik naq rukʼux jenaj winaq Tom i rubʼihnaal chi xureq i manlik nimanik? Chawil taq i VIDEO eh tiqʼoroq taq chi riij:
-
Jeʼ rukabʼ xawil pan video, ¿chajariik naq irilow i Tom chupaam i maʼ manlik ta nimanik?
-
¿Chaaj woʼ reet chʼiklik naq rukʼux i Tom chi xureq i manlik nimanik?
Reʼ inqʼorarik ko ruman chi ne inkʼuhtjik ruukʼ bʼanooj. Chawil taq i Mateo 7:21 eh tiqʼoroq taq chi riij:
-
¿Chajariik i aajwaal wach chi reh i Jesús: reʼ inqaqʼor chi inqanimaj oon reʼ inqakʼuhtaaj pan qakʼachariik?
7. Reʼ taqeh manlik ajnimaneel inkikʼax kiibʼ chi kiwach
¿Inkiyeew na i kikʼachariik taqeh ajnimaneel chi kiij taqeh kihermano pan uxlabʼal? Chawil taq i VIDEO eh tiqʼoroq taq chi riij:
-
¿Chaaj woʼ reet i hermano Lloyd iraaj naq ruyeʼem i rukʼachariik chi riij i hermano Johansson?
-
¿Inaqʼor na chi manlik ajnimaneel?
Chawil taq Juan 13:34, 35 eh tiqʼoroq taq chi riij:
-
Jeʼ rukabʼ iruqʼor i texto, ¿chajariik naq nakikʼuhtaam taqeh rajtahqaneel i Jesús kuukʼ taqeh reh reh wach kʼachareel?
-
¿Eh nikʼwach naq ne inkikʼuhtaaj i kʼaxooj noq ikʼik inkibʼan pan qʼaqʼinik?
REʼ INKIQʼOR I JUʼJUN: «Reʼ taqeh ajnimaneel maʼ holohik ta inkibʼan. Reʼ keh maʼ manlik ta ajnimaneel taqeh».
-
¿Ahaʼ wilik i texto ne inakoj reh rukʼuhtjiik ajwach taqeh i manlik ajnimaneel?
KʼOLOQ PAN AKʼUX
Reʼ taqeh manlik ajnimaneel inkikʼam naah reʼ iruqʼor i Santo Laj Huuj eh inkibʼan chuʼnchel i wilik pan kiqʼabʼ reh rukʼuhtjiik i kikʼaxooj chi kiij i tokoom, eh inkiqʼor i kʼuhbʼaal chi riij i Santo Laj Huuj.
Reʼ xkahnik pan akʼux
-
¿Ahaʼ inkireq reʼ inkinimaj taqeh manlik ajnimaneel?
-
¿Chajariik inkikʼuhtaaj chi kiwach eh chi kiij i tokoom, taqeh manlik ajnimaneel?
-
¿Eh chajariik i kamanik inkibʼan chi junsut i akʼal?
CHAREQ RUMAN
Chanabʼeej kiwach jenaj tzuhbʼ chi kʼachareel inkitijej keh i rukʼachariik i Jesús eh inkikʼam naah taqeh rukʼuhbʼaal.
Chawil chi riij jenaj ixoq reʼ xkamanik naq pan convento chi monja xureq «jenaj rufamilia pan uxlabʼal».
«Xkiqʼor weh chi riij taqeh inupahqanik ruukʼ i Santo Laj Huuj» (La Atalaya, 1 reh abril reh 2014)
Chawil nikʼwach taqeh i manlik ajnimaneel inkikʼuhtaaj i kʼaxooj chi kiij taqeh kihermano noq ko ruman kitobʼjiik.
Xqatobʼeej taqeh qahermano noq xchalik jenaj kowlaj jabʼ (maʼ chuʼnchel ta) (3:57)
Reʼ Jesús xuqʼor juʼjun taqeh ehtalil reh runabʼjiik kiwach taqeh rajtahqaneel. Chanabʼeej nikʼwach irukʼam riibʼ taqeh ehtalil xuqʼor i Jesús chi kiij taqeh peet ajnimaneel eh taqeh ajnimaneel reh yuʼnaak.