18 CAJ YACHACUY
¿Imanotaj musyashwan pïcunataj caycan rasunpa caj cristianucuna?
May chaycho maychicaj runacuna ‘cristianumi cä’ nipäcun, ichanga creenciancuna y imano cawacärishgancunaga jucno jucnomi. Chaymi tapucunchi, ¿imanotaj musyashwan pïcunataj caycan rasunpa caj cristianucuna?
1. ¿Pïcunatataj nishwan rasunpa cristianucuna cashganta?
Cristianuga ninchi Jesusta pipis gatiptinmi (leiriy Hechos 11:26). Pero ¿imanotaj musyacanman Jesuspa gatejnin rasunpa cashganta? Jesús cayno nergan: “Yachachishgänöla cawarga rasunpami discïpulücuna carcaycanqui” (Juan 8:31). Chauraga rasunpa cristianucunaga Jesús yachachicushganta y Biblia mandacushgantami lapan cawaynincho cäsucärinan. Jesuspis Diospa Palabrantaga respetajmi (leiriy Lucas 24:27).
2. ¿Imanotaj ricacämun cuyanacushgancuna?
Caytami gatejnincunata Jesús mandargan: “Noga cuyashänölla jucniqui-jucniquipis cuyanacuy” (Juan 15:12). Jesusga rasunpami gatejnincunata cuyaj, ¿manachu yanapargan y shacyächergan?, y ¿manachu paycunaraycur wanurganpis? (1 Juan 3:16). Chaynolami rasunpa cristianucunaga manami shimilapitachu cuyanacunchi, lapan cawayninchichomi cuyacoj cashganchi ricacämun.
3. ¿Ima aruychotaj carcaycan rasunpa cristianucuna?
Gatejnincunatami Jesús “mandargan Diospa Gobiernunpita yachachicärinanpaj” (Lucas 9:2, TNM). Unay cristianucunaga manami shuntacashgan sitiulachochu predicapäcoj, paycunaga may chaypa aywar wasin wasin Diospita yachachicärej (leiriy Hechos 5:42; 17:17). Canan wichanpis rasunpa cristianucunaga may chaycho ashir runacunata yachachiycanchi. Runa masinta cuyashpanmi tiempuncunata camacächin shacyächiylapa pitapis Bibliapita yachachicunanpaj (Marcos 12:31).
SHUMAJ YACHACURCUNAPAJ
Mä yachacushun ima nishwantaj rasunpa cristianucunapita y yangala ‘Jesusta gatë’ nejcunapita.
4. Bibliachomi rasunpa cajta ashipäcun
Unay cristianucunaga Diospa Palabranta respetapäcoj.
Cristiano tucojcunaga Bibliata aptaraycarpis, nishgannolaga cawapäcunchu. VIDEUTA ricapäcuy y caypita parlapacäriy:
-
Waquin iglesiacuna imaycatami rurapäcurgan, Jesús yachachicushganta runacuna mana chasquicärinanpaj, ¿imacunatataj rurapäcurgan?
Jesusga Bibliacho caycaj rasunpa cajcunatami yachachicush. Leipäcuy Juan 18:37 y caypita parlapacäriy:
-
Jesús wilacushganno, ¿pïcunataj caycan “rasun cajta musyayta munajcuna”?
5. Bibliapita rasunpa cajta yachachicurcaycan
Unay cristianucunaga predicapäcoj.
Cielupa cuticunanpäna caycarmi gatejnincunata Jesús mandargan predicapäcunanpaj, canan wichanpis chaynola rurarcaycan. Leipäcuy Mateo 28:19, 20 y Hechos 1:8 y caypita parlapacäriy:
-
¿Imaycamataj yachachicunapaj caycargan y may-yajtaj chayapäcunan cargan?
6. Yachachicärishgannola cawapäcun
¿Imanirtaj nishwan Tom jutiyoj runaga rasunpa caj religiunta tarishganta? VIDEUTA ricapäcuy y caycunapita parlapacäriy:
-
¿Imanirtaj chay runaga maygan religiunchopis ashiycashganta tarirganchu?
-
¿Imanirtaj seguro canan caycan rasunpa cajta tarishganpita?
Parlashganchinolami cawacunanchi. Leipäcuy Mateo 7:21 y caypita parlapacäriy:
-
¿Jesuspäga imataj más ali caycan: ‘Diosman criyë’ nirla cacushganchi o alicunata rurar cawacushganchi?
7. Jucnin jucninmi cuyanacärin
Unay cristianucunaga jucnin jucnincuna cuyanacärej.
¿Cristianucunaga wanurpis wanunmanchi cristiano masincunaraycur? VIDEUTA ricapäcuy y caycunapita parlapacäriy:
-
¿Imanirtaj Lloyd jutiyoj cristianuga ‘hermanuläpa trucan nogata wanuchimay’ nergan?
-
Rasunpa caj cristiano carchi chayta rurash, ¿au?
Leipäcuy Juan 13:34, 35 y caycunapita parlapacäriy:
-
¿Imanotaj Jesuspa gatejnincunaga juc marca runacunata ricanman?
-
Guerra wichanpis, ¿imanotaj cuyanacuycarla carcaycanman?
WAQUINCUNA NIPÄCUN: “Ima religiunniyoj carpis lapanchimi Diosta sirvinchi, juclaylami Diosga”.
-
¿Ima textucunatataj leirinquiman pïcuna rasunpa cristianucuna cashganta cuentata gocunayquipaj?
ICHIC YACHACUY
Rasunpa caj cristianucunaga Biblia nishgantami cäsucärin, cuyacoj cashpanmi imaycataraj rurapäcun pitapis Diospita wilapänanpaj.
Yarpänapaj
-
¿Imataj cristianucunata yanapan yäracur Diosta adurapäcunanpaj?
-
¿Imanotaj capäcun rasunpa cristianucuna?
-
¿Imachotaj cushi cushila arurcaycan?
MASLATA YACHACUNAYQUIPAJ
Yachacuy pïcunataj Jesús cashgannola cananpaj calpachacärin.
Yachacuy imano juc warmi monja caycarpis, rasunpa cristianucunata tarergan.
“Ima tapucushgätapis Biblialawanmi yachachipäcamaj” (Wilacamoj, 1 abril quilla, 2014)
Yachacuy imanotaj rasunpa caj cristianucuna cuyanacushganraycur yanapanacärin.
Jesusga wilacurganmi rasunpa gatejnincunata imano reguinapaj. Yachacuy wilacamushganga imanotaj tincun unay y canan tiempo cristianucunawan.
“¿Imatataj ruran rasunpa caj cristianucunaga?” (Wilacamoj, 1 marzo quilla, 2012)
