18 KAQ YACHAKUNËKIPAQ
¿Imanötan kayan rasumpa cristiänukunaqa?
Mëtsikaq nunakunam cristiänu kayanqanta niyan, peru imata yachatsikuyanqan y imanö portakuyanqanqa llapampapis jukläyam. ¿Imanötan musyashwan pikuna rasumpa cristiänu kayanqanta?
1 KAQ: ¿Imatataq rasumpa cristiänukunaqa rurayänan?
Rasumpa cristiänukunaqa Jesuspa qateqnin discïpulunkunam kayan, y pë ruranqankunatam rurayan (leyi Hëchus 11:26). Tsëmi Jesus kënö nirqan: “Ninqäkunata imëpis cäsukurqa, rasumpa qatimaqnïkunam kayanki” (Juan 8:31). Rasumpa cristiänukunaqa Jesus mandakunqankunatam cäsukuyänan, y Jesusnöllam Bibliachö ninqankunata creiyänan y yachatsikuyänan (leyi Lücas 24:27).
2 KAQ: Rasumpa cristiänukunaqa, ¿imanötaq kuyakoq kayanqanta rikätsikuyan?
Jesusmi qateqninkunata kënö nirqan: ‘Qamkunata kuyanqänölla qamkunapis jukniki juknikikuna kuyanakuyë’ (Juan 15:12). Jesusqa qateqninkunata kuyanqanta rikätsikurqan pëkunawan tiemputa pasar, yanapar y salvakuyänampaq wanurmi (1 Juan 3:16) Rasumpa cristiänukunaqa manam kuyakoq kayanqanta parlayanllatsu, sinöqa rurayanqankunawanmi rikätsikuyan Jesusnö kuyakoq kayanqanta.
3 KAQ: Rasumpa cristiänukunaqa, ¿imatataq mas puntaman churayan?
Jesusmi discïpulunkunata mandarqan “Diospa Gobiernumpita willakuyänampaq” (Lücas 9:2). Punta cristiänukunaqa manam Diosta adorayänan wayillachötsu yachatsikuyaq, sinöqa mëchöpis nunakuna kanqanchömi, y wayin wayinmi (leyi Hëchus 5:42; 17:17). Tsënöllam kanan witsan rasumpa cristiänukunapis nunakuna kanqanchöqa mëchöpis Diospita yachatsikuyan. Pëkunaqa nuna mayinkunata kuyarmi tiempunkunata y kallpankunata utilizäyan Jehovä ruramunampaq kaqkunata willakurnin (Marcus 12:31).
MASLLA YACHAKUSHUN
Rasumpa cristiänukuna rurayanqanwan cristiänu tukoqkuna rurayanqan jukläya kanqantam yachakushun.
4 KAQ: Bibliapitam alli yachakuyan
Cristiänu tukoqkunaqa manam Bibliachö ninqannötsu yachatsikuyan. VIDEUTA rikäyë y këpaq parlayë:
-
Iglesiakunachö cristiänu tukoqkunaqa, ¿imatataq rurayarqan Jesus yachatsikunqankunata yachatsikuyänampa rantin?
Jesusqa Diospa Palabranchö ninqantam yachatsikurqan. Leyiyë Juan 18:37 ima ninqanta y këpaq parlayë:
-
Jesus ninqannöpis, ¿imanötan musyashwan pikuna rasumpa kaqta yachatsikuyanqanta?
5 KAQ: Bibliachö ninqantam yachatsikuyan
Ciëluta manaraq ëwakurmi Jesusqa qateqnin discïpulunkunata mandarqan Diospita yachatsikur sïguiyänampaq. Leyiyë Mateu 28:19, 20 y Hëchus 1:8 ima ninqanta y këpaq parlayë:
-
Jesuspa qateqnin discïpulunkunaqa, ¿imëyaqtan y mëkunayaqtan yachatsikuyänan karqan?
6 KAQ: Jehovä mandakunqannömi kawayan
Tom jutiyoq juk nunaqa, ¿imanirtan següru këkarqan alli kaq religionta tarinqanta? VIDEUTA rikäyë y këkunapaq parlayë:
-
Videuchö rikanqantsiknöpis, ¿imanirtan Tomqa ima religionchöpis këta munarqannatsu?
-
¿Imanötan Tomqa musyarqan alli kaq religionta tarishqa kanqanta?
Imatapis rurëta munarqa manam parlanantsikllatsu, sinöqa ruranantsikmi. Leyiyë Mateu 7:21 ima ninqanta y këpaq parlayë:
-
¿Jesusqa “Diosman creïmi” ninantsikllataku munan, o creinqantsiknö ruranantsiktaku?
7 KAQ: Llapankunam kuyanakuyan
Rasumpa cristiänukunaqa alläpam kuyayan wawqinkuna paninkunata, tsëmi chikeqninkunapita imëkanöpa defendiyashqa. VIDEUTA rikäyë y këkunapaq parlayë:
-
Wawqi Johanssonta wanutsita munayaptin, ¿imanirtan wawqi lloydqa kikinta wanutsiyänan kaptimpis defendirqan?
-
¿Imanötan Lloydqa rasumpa cristiänu kanqanta rikätsikurqan?
Leyiyë Juan 13:34, 35 ima ninqanta y këkunapaq parlayë:
-
Rasumpa cristiänukunaqa, ¿imanötan tratayanman juk color o juk nacion nunakunata?
-
Guërra kaptinqa, ¿imanötan kuyakoq kayanqanta rikätsikuyanman?
WAKIN IMA NIYANQAN: “Mëtsika religionkunam kan. ¿Imanöraq musyäman pikuna rasumpa cristiänukuna kayanqanta?”.
-
Tsënö niyäshuptiki, ¿Bibliachö ima ninqantaraq leyipärinkiman pikuna rasumpa cristiänu kayanqanta yachatsinëkipaq?
KËTAM YACHAKURQUNKI
Rasumpa cristiänukunaqa Biblia ninqantam cäsukuyan, wawqi paninkunata kuyarmi pëkunarëkur wanuyänampaqpis listu këkäyan, y Diospa Palabran Biblia ninqantam yachatsikuyan.
¿Yarpankiku?
-
¿Mëpitataq rasumpa cristiänukunaqa imatapis yachatsikuyan?
-
¿Imanö kayanqampitataq rasumpa cristiänukunaqa reqishqa kayan?
-
¿Ima rurëtataq puntaman churayan?
MASTA YACHAKUY
Jesucristu yachatsikunqankunata rurayänampaq kallpachakoq nunakunata maslla reqi.
Diosta sirwir kushishqa kanqanta juk warmi willakunqanta leyi.
“Llapan tapukïnïkunatam Bibliawan contestayämarqan” (Täpakoq, 1 de abril 2014)
Rasumpa cristiänukunaqa kuyakoq karnin cristiänu mayinkunata yanapayanqanta rikë.
Desgraciakuna kaptinqa rasllam wawqi panikunata yanapayä (wakin kaqlla) (3:57)
Jesusmi nirqan qateqninkuna imanö kayänampaq kaqta. Punta kaq cristiänukuna y kanan witsan cristiänukuna Jesus ninqannö kayanqanta musyanëkipaq leyi.
“¿Imanötan musyashwan pikuna rasumpa cristiänu kayanqanta?” (Täpakoq, 1 de marzu 2012)