LEKTIONA 18
Ap hoi nai dikah, koon tchatche christe hi?
Milliarde penenn pendar, kai hin jon christe. Patsenn jon halauter o emligo un djiwenn jon pal kola emlige standards? Na-a. Doleske hunte putchas mer men, har te djinass nai, koon i Christeske tchatchepah pal nashella.
1. Hoi hi i christo?
I christo hi jek, kai hi i maal i Jesestar un nashell i Christeske pal (Dik pal an Bitchepangre 11:26). Har sikrell pes kowa, kai hi lo i maal i Jesestar? O Jesus penas: “Tumer te krenna, hoi me tumenge penau, palle han tumer tchatchepah mire mala” (Johanni 8:31). Jaake haiwah: Tchatche christe hunte rikrenn pen ap kowa, hoi o Jesus penas. Jaake, har job pes ap kowa rikras, hoi i bibla penella, hunte well o patsepen tchatche christendar ninna dran i bibla (Dik pal an Luka 24:27).
2. Har sikrenn tchatche christe kamlepen?
O Jesus penas ap peskre nashepangrende: “Kowa kamau tumendar, te kamell jek o wawares o djiestar jaake har me tumen kamau o djiestar” (Johanni 15:12). Har sikras o Jesus, kai kamas lo peskre malen? Job his lentsa khetne, das len soor un his lenge koi. Job das ninna peskro djipen lenge (1. Johanni 3:16). Jaake hi kowa ninna pash tchatche christe. Jon rakrenn gar kokres pral kamlepen, jon sikrenn ninna an kowa, hoi jon penenn un krenn, kai kamenn le pen o djiestar.
3. Hawi budi krenn tchatche christe?
O Jesus das peskre nashepangren i budi. “Job bitchras len pash i menshende, te penenn le lenge” o latcho lab pral o Debleskro Them (Luka 9:2). I christe an o Jeseskro tsiro anan o latcho lab gar kokres kote, kai jon khetne wan. Jon rakran ninna kola menshentsa mashkral an o foro un djan pash i menshende khere (Dik pal an Bitchepangre 5:42; 17:17). Tchatche christe krenn kowa ninna. Jon rakrenn i menshentsa kote, kai jon hi, te nai sikrenn le lenge o latcho lab dran i bibla, hoi soor della. Jaake sikrenn le pengro kamlepen ap i menshende (Marko 12:31).
RODAS DUREDER
Kanna dikeh, ninna te kharenn pen bud menshe christe, sikrell pes an lengro djipen, kai rikrenn le pen gar ap kowa, hoi o Jesus Christo kras un penas. Doleske: Har hin tchatche christe?
4. Jon rodenn pal o biblakro tchatchepen
Bud kolendar, kai penenn, jon hi christe, kamenn pen gar ap ko moldo biblakro tchatchepen te rikrell. Te dikan o VIDEO, rakrenn khetne pral:
-
Hawo chocheno koowa sikrell i kangri, hoi o Jesus gar penas?
O Jesus sikras i menshen o tchatchepen dran o Debleskro lab. Dikenn pal an Johanni 18:37, un rakrenn khetne pral:
-
Har sikrell pes, kai hi jek “an o tchatchepen tardo”?
5. Jon rakrenn pral o biblakro tchatchepen
O Jesus das peskre nashepangren i budi, har djas lo an o bolepen. Koi budi hi gomme an maro tsiro ap lende. Dikenn pal an Mateo 28:19, 20 un Bitchepangre 1:8, un rakrenn khetne pral:
-
Hoi was penlo, har bares koi budi wella?
6. Jon djiwenn pal kowa, hoi jon penenn
Hoske djinas o Tom, kai hatsas lo i tchatche christen? Te dikan o VIDEO, rakrenn khetne pral:
-
Hoi kras, kai kamas o Tom pral i religione buder tchi te djinell?
-
Hoske djinell lo kanna, kai hatsas lo o tchatchepen?
Te peneh tchomone, hi kowa mishto — te kreh tchomone, hi kowa feteder. Dikenn pal an Jakobo 2:24, un rakrenn khetne pral:
-
Hoi hi feteder: Te penell jek, job krell, hoi o Dewel kamella oder te sikrell lo kowa an peskro djipen?
7. Jon kamenn pen o djiestar
Riskierenn christe tchatchepah pengro djipen wawarenge? Te dikan o VIDEO, rakrenn khetne pral:
-
Hoske riskieras maro phraal o Lloyd peskro djipen, te atchell maro phraal o Jack djido?
-
Hoi penals tu: Reagieras job har i tchatcho christo?
Dikenn pal an Johanni 13:34, 35, un rakrenn khetne pral:
-
Har djana i Jeseskre mala (i tchatche christe) wawar menshentsa trujel, te hin le wawar menshendar?
-
Har hi kowa, te della kurepen?
BUD PENENNA: “Hi jek an hawo patsepen jek hi. Mer hunte patsas ap i Jeseste, ko hi doha.”
-
Hawo biblakro verso lals tu, te sikress, har tchatche christe hin?
HOI KATE PENLO WAS
I tchatche christe rikrenn pen ap kowa, hoi i bibla penella, sikrenn pengro djieskro kamlepen un rakrenn wawarentsa pral o biblakro tchatchepen.
Hoi penals tu?
-
Hoi hi o fundamento tchatche christendar, ap hoi jon patsenn?
-
Hawi shinia hunte sikrenn tchatche christe?
-
Hawi budi krenn tchatche christe?
BUDEDER
Kate dikeh, kai denna patsle, kai djiwenn pal kowa, hoi o Jesus kras un penas.
Kate nai drawereh pral i djuwjate, kai i nonna his, un har joi i newi “familja” hatsas.
“Jon penan mange halauter dran i bibla!” (O Gardeskro Kher, April 1, 2014)
Kate nai dikeh, har tchatche christe pengre patsle phralenge koi hins.
Pal katastrofe ham mer mare phralenge koi — Tikni versiona (3:57)
Kate drawereh nai, koon pes an o phuro tsiro ap kowa rikras, hoi o Jesus kras un penas un koon kowa an maro tsiro krella.
“Ap hoi nai dikah, koon tchatche christe hi?” (O Gardeskro Kher, März 1, 2012)