FIANARA 18
Akory ty Ahaiza ty Tena Kristiana?
Olo an’arivony tapitrisa ro samby manao ty vatany ho Kristiana. Fe ndre zay, le tsy mitovy ty raha inoan-drozy sady samby hafa ty fitsipiky orihin-drozy. Ka akory ty ahaiza ty tena Kristiana?
1. Ino ty atao hoe Kristiana?
Ty atao hoe Kristiana, le mpianatsy na mpanori-dia ani-Jesosy. (Vakio Asan’ny Apostoly 11:26.) Akory ty ampisehoan-drozy hoe mpianatsiny vatany rozy? Hoy ty asani-Jesosy: “Laha tsy miala amy ty safàko nareo, le tena mpianatsiko vatany.” (Jaona 8:31) Midika raha zay fa tsy maintsy manoriky ty fampianarani-Jesosy ty tena Kristiana. Baka amy Baiboly ao ty raha nampianarini-Jesosy, ka tokony ho baka amy Baiboly ao koa ty raha ampianary ty tena Kristiana.—Vakio Lioka 24:27.
2. Akory ty ampisehoa ty tena Kristiana hoe mifankatea vatany rozy?
Nivola tamy ty mpanori-dia azy Jesosy hoe: ‘Mifankatiava nareo manahaky ty nitiavako anareo.’ (Jaona 15:12) Akory ty nampisehoani-Jesosy hoe tea ani-mpianatsiny reo ie? Nanoka fotoa hiaraha amin-drozy ie, sady nampahery noho nanampy an-drozy. Nahafoy ty ainy ho maty ho an-drozy mihintsy ie. (1 Jaona 3:16) Manahaky ani-Jesosy koa ty tena Kristiana. Tsy mivola avao rozy hoe mila mifankatea, fa asehon-drozy amy ty raha volanin-drozy noho ataon-drozy koa raha zay.
3. Ino ty asa ifantoha ty tena Kristiana?
Nisy asa nampanaovini-Jesosy ani-mpianatsiny rey. “Nirahiny hitory ty Fanjakà-Ndranahary” rozy. (Lioka 9:2) Tsy nitory tamy pilasy fivavaha tao avao ty Kristiana tamy taonjato voalohany, fa nandeha tamy pilasy maro olo sady namonjy olo tan-tranony any. (Vakio Asan’ny Apostoly 5:42; 17:17.) Manao ho zay koa ty tena Kristiana henanizao. Torin-drozy amy ze pilasy ahità olo ty fahamarina amy Baiboly ao. Tea ty mpiara-belo amin-drozy rozy, le mahafalifaly an-drozy ty mampiasa ty fotoan-drozy noho ty herin-drozy mba hiresaha amin’olo ty hafatsy mampahery baka amy Baiboly ao.—Marka 12:31.
DINIHO LALIKY
Henteo ty raha tsy mampitovy ty tena Kristiana noho ty olo tsy manoriky ty fampianarani-Jesosy sady tsy manahaky ty modeliny.
4. Mikaroky ty fahamarina amy Baiboly ao rozy
Vatan-draha tamy Kristiana tamy taonjato voalohany rey ty Safà-Ndranahary
Manao ty vatany ho Kristiana ty olo sisany, kanefa tsy vatan-draha aminy ty fahamarina amy Baiboly ao. Alefaso VIDEO toy, bakeo iaraho midiniky fanontanea reo.
-
Ino ty nataoni-Fivavaha Mivola ty Vatany ho Kristiana, ka nahavy ty olo tsy hahay ty fampianarani-Jesosy?
Nampianatsy ty fahamarina baka amy Safà-Ndranahary ao Jesosy. Vakio Jaona 18:37, bakeo iaraho midiniky fanontanea toy:
-
Akory ty ahaiza ty Kristiana “poro amy ty marina”, laha hentea ty safàni-Jesosy?
5. Mitory ty fahamarina amy Baiboly ao rozy
Nitory tamin’olo Kristiana tamy taonjato voalohany rey
Talohani-niakarani-Jesosy tan-danitsy any, le nisy asa nampanaoviny ani-mpanori-dia azy reo. Mbo mitohy zisiky henanizao asa io. Vakio Matio 28:19, 20 noho Asan’ny Apostoly 1:8, bakeo iaraho midiniky fanontanea toy:
-
Hatao zisiky aia ty asa fitoria ty fahamarina amy Baiboly ao?
6. Miay mifanaraky amy ty raha torin-drozy rozy
Manino ro niresy lahatsy ty lahilahy kaihy hoe Tom fa nahita ty tena Kristiana? Alefaso VIDEO toy, bakeo iaraho midiniky fanontanea reo.
-
Nanino Tom ro tsy nitolotolo fivavaha sasy?
-
Manino ie ro niresy lahatsy fa nahita ty marina?
Tsy ty raha volaniny avao ro ahaiza ty tena Kristiana fa ty raha ataony koa. Vakio Matio 7:21, bakeo iaraho midiniky fanontanea toy:
-
Ino ty vatan-draha hoasani-Jesosy: Ty mivola hoe manam-pinoa tsika, sa ty mampiseho ty finoantsika amy ty raha ataontsika?
7. Mifankatea rozy
Nifankatea Kristiana tamy taonjato voalohany rey
Fa nahita Kristiana nahafoy ty ainy ho ahi-ty Kristiana namany va iha? Alefaso VIDEO toy, bakeo iaraho midiniky fanontanea reo.
-
Ino ty nanosiky ani-Lloyd ho parè hamoy ty ainy ho ahini-rahalahy Johansson?
-
Akory ty hevitsinao, hita amy raha nataony va hoe tena Kristiana ie?
Vakio Jaona 13:34, 35, bakeo iaraho midiniky fanontanea retoa:
-
Akory ty fomba andaisani-mpianatsini-Jesosy (tena Kristiana) ty olo tsy mitovy karaza na fiavia aminy?
-
Akory ty ampisehoan-drozy ani-zay lafa misy aly?
MIERITSERITSY TY OLO SISANY HOE: “Nahavita raha raty maro fivavaha kristiana reo, ka aia amin-drozy ty ho fivavaha marina?”
-
Ino ty andinin-teny azonao vakỳ mba hampisehoa ty fomba ahaiza ty tena Kristiana?
FAMINTINA
Manaraky ty fampianara amy Baiboly ao ty tena Kristiana. Be fitiava noho mahafoy ty ainy ho ahi-ty namany rozy sady mitory ty fahamarina amy Baiboly ao.
Famerena
-
Miory amin’ino ty raha inoa ty tena Kristiana?
-
Ino ty toetsy ahaiza ty tena Kristiana?
-
Ino ty asa bevata amy ty tena Kristiana?
DINIHO KOA RETOA
Misy olo miezaky manaraky ty modelini-Jesosy noho ty fampianarany va?
Masera ampela raiky zay taloha. Fe nahazo ‘anadahy noho rahavavy amy tany toy iaby’ ie tafara atoy. Henteo moa ty tantarany.
“Nampiasa Baiboly Foana ry Zareo!” (Ny Tilikambo Fiambenana 1 Aprily 2014)
Akory ty ampisehoa ty tena Kristiana hoe be fitiava rozy, lafa misy naman-drozy mila fanampea?
Ampeantsika Rahalahintsika reo Lafa Misy Loza—Tampatampany (3:57)
Mitovy amy ty mpanori-dia ani-Jesosy tamy taonjato voalohany rey avao ty tena Kristiana henanizao. Diniho ty porofo ahità ani-zay.
“Ahoana no Ahafantarana ny Tena Kristianina?” (Ny Tilikambo Fiambenana 1 Martsa 2012)
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
