LESONA 18
Le Auala e Iloa ai Kerisiano Moni
E faitau piliona tagata e faapea mai o i latou o Kerisiano. Ae e lē tutusa o latou talitonuga ma tapulaa e ola ai. E faapefea la ona tatou iloa Kerisiano moni?
1. O ai Kerisiano moni?
O Kerisiano e faasino atu i soo, po o ē mulimuli iā Iesu Keriso. (Faitau le Galuega 11:26.) E faapefea ona faamaonia atu o i latou o soo o Iesu? Na fetalai Iesu: “O outou o oʻu soo moni pe a outou tumau i aʻu upu.” (Ioane 8:31) O lona uiga la, o Kerisiano moni e tatau ona usiusitaʻi i aʻoaʻoga a Iesu. E pei lava ona faaaogā e Iesu Tusitusiga Paia e faamaonia ai ana aʻoaʻoga, e tatau foʻi ona faavae aʻe talitonuga o Kerisiano moni i le Tusi Paia.—Faitau le Luka 24:27.
2. E faapefea ona faaalia e Kerisiano moni le alofa?
Na fetalai atu Iesu i ē na mulimuli iā te ia: “Ia outou alolofa o le tasi i le isi e pei ona ou alofa iā te outou.” (Ioane 15:12) Na faapefea ona faaalia e Iesu le alofa i ona soo? Na ia faalaeiau, fesoasoani ma faaalu le taimi ma i latou. Na oo lava ina foaʻi atu lona ola mo i latou. (1 Ioane 3:16) I le pei foʻi o Iesu, o Kerisiano moni e lē tau ina faapea mai e alolofa. E faamaonia lo latou alofa o le tasi i le isi, e ala i gaoioiga.
3. O le ā le galuega o loo pisi ai Kerisiano moni?
Na tuuina atu e Iesu se galuega i ona soo. “Ua ia aauina atu i latou e talaʻi le Malo o le Atua.” (Luka 9:2) Sa talaʻi atu uluaʻi Kerisiano e lē gata i nofoaga mo a latou tapuaʻiga, ae faapea foʻi nofoaga faitele, ma fale o aiga. (Faitau le Galuega 5:42; 17:17.) E talaʻi atu foʻi e Kerisiano moni i aso nei upu moni o le Tusi Paia, i so o se nofoaga e maua ai tagata. O le alolofa i o latou tuaoi, e fiafia ai e faaalu lo latou taimi ma le malosi, e faailoa atu ai le faamoemoe ma faalaeiauga mai le Tusi Paia.—Mareko 12:31.
SAʻILIʻILI ATILI
Iloilo pe faapefea ona tatou iloa le eseesega o Kerisiano moni, ma tagata e lē mulimuli i aʻoaʻoga ma faaaʻoaʻoga a Iesu.
4. E latou te saʻili mo upu moni o le Tusi Paia
E lē o tagata uma e faapea mai o Kerisiano e faatāuaina upu moni o le Tusi Paia. Faaali le VITIŌ, ona talanoa lea i le fesili lenei:
-
Na faapefea ona taofia e nisi lotu ua faapea mai o Kerisiano tagata, mai le iloaina o aʻoaʻoga a Iesu?
Na aʻoaʻo atu e Iesu upu moni mai le Afioga a le Atua. Faitau le Ioane 18:37, ona talanoa lea i le fesili lenei:
-
E tusa ai ma fetalaiga a Iesu, e faapefea ona tatou iloa Kerisiano “e fiafia i le upu moni”?
5. E latou te talaʻi atu upu moni o le Tusi Paia
A o leʻi afio aʻe Iesu i le lagi, na ia tuuina atu i ona soo se galuega e fai, lea o loo faaauau pea ona faia i aso nei. Faitau le Mataio 28:19, 20 ma le Galuega 1:8, ona talanoa lea i le fesili lenei:
-
O le ā le telē ma le mamao o le a oo i ai le galuega talaʻi?
6. E latou te ola e tusa ma mea o loo latou talaʻia
O le ā na faatalitonuina ai Tom, ua ia maua le faa-Kerisiano moni? Faaali le VITIŌ, ona talanoa lea i fesili nei:
-
I le vitiō, aiseā na fiu ai Tom i lotu?
-
O le ā le māfuaaga na ia talitonu ai ua ia maua le upu moni?
E leotele atu gaoioiga nai lo upu. Faitau le Mataio 7:21, ona talanoa lea i le fesili lenei:
-
O le ā e sili ona tāua iā Iesu, o le faapea atu ua tatou talitonu, po o le faamaonia atu i a tatou gaoioiga?
7. E latou te alolofa o le tasi i le isi
Pe na lamatia moni lava ola o Kerisiano mo isi Kerisiano? Faaali le VITIŌ, ona talanoa lea i fesili nei:
-
I le vitiō, o le ā na uunaʻia ai Lloyd e lamatia lona ola mo le uso o Johansson?
-
Pe e te manatu sa ia gaoioi o se Kerisiano moni?
Faitau le Ioane 13:34, 35, ona talanoa lea i fesili nei:
-
E faapefea ona feutagaʻi soo o Iesu (Kerisiano moni) ma tagata e ese lanu po o atunuu?
-
O le ā e uunaʻia e le alofa Kerisiano e fai i taimi o taua?
UA FAAPEA MAI NISI: “Po o le ā lava le lotu, e auauna uma a Kerisiano i le Atua e tasi.”
-
O le ā se mau e mafai ona e faitau atu, e faailoa atu ai le auala e iloa ai Kerisiano moni?
AOTELEGA
O Kerisiano moni e mulimuli i aʻoaʻoga a le Tusi Paia, faaalia le alofa faataulaga, ma talaʻi atu upu moni o le Tusi Paia.
Fesili Autalu
-
O fea e faavae mai ai talitonuga o Kerisiano moni?
-
O ā uiga e iloa ai Kerisiano moni?
-
O le ā le galuega o loo faia e Kerisiano moni?
MANATU FAAOPOOOPO
Maimoa i se vitiō e faatatau i se vaega o tagata, o loo taumafai malosi e mulimuli i le faaaʻoaʻoga ma aʻoaʻoga a Iesu.
Mātau pe na faapefea ona maua e se taupousa “se aiga moni faaleagaga.”
“Na La Taliina Uma Aʻu Fesili Mai i le Tusi Paia!” (Le Olomatamata, Aperila 1, 2014)
Iloilo auala e faaalia ai e Kerisiano moni le alofa mo o latou uso tapuaʻi pe a manaʻomia le fesoasoani.
Fesoasoani i o Tatou Uso i Taimi o Mala—Vaaiga Puupuu (3:57)
Iloilo pe faapefea ona moni i uluaʻi Kerisiano ma Kerisiano i aso nei, faailoga na taʻua e Iesu e iloa ai ona soo.
“O ā Faailoga e Iloa ai Kerisiano Moni?” (Le Olomatamata, Mati 1, 2012)