Wiká millones pagótami aní japi cristianos ju. Nalí ke suwaba chopi iyiri bichiwi alí ke chopi riká iné echi namuti japi chati ju alí japi aʼlá ju. Jiti la, ¿chúriká ti machiboa jépuká nalí ne bichíwali cristianos ju?

1. ¿Chu noká japi ne bichíwali cristianos ju?

Echi cristianos ko biné alí noká japi riká Jesucristo (leeri Hechos 11:26). ¿Chúriká newaré japi ne bichíwali cristianos ju? Jesús anili: “Galá bichíisagá mapurigá Nijeni ʼyemi mi aneli, echalítamo ne bichíwali tamí yuwa binéami níibotamo” (Juan 8:31). Jiti la japi ne bichíwali cristianos ju ko nijéwisaré japi riká Jesús binérili. Jesús ko sinibí binérili néeka echi Onorúami Raʼicháala jiti bichíwili japi aní echoná alí echi cristianos ne bichíwali ayénachó bichiwi japi aní echi Biblia (leeri Lucas 24:27).

2. ¿Chúriká newa noká echi ne bichíwali cristianos japi galéami ju?

Jesús ko nuleli echi discípulos: “Aʼnagupi ne wabé [galesi], achigórigá mapurigá Nijé ʼyemi mi galé” (Juan 15:12). ¿Chúriká newa isili Jesús japi we galeli echi discípulos? Echi ko sinibí iʼwírili, iʼwérili iyali, wilí napawika simírili echi yúa alí ayénachó mukuli echi jitra (1 Juan 3:16). Japi riká Jesús, echi japi ne bichíwali cristianos ju ke bi aní japi galéami ju, ayénachó newa noká japi galé jarecho.

3. ¿Chu iyiri nóchali we natéami noká echi ne bichíwali cristianos?

Jesús ko nuleli echi discípulos japi simama nawesasia echi Onorúami Gobiérnowala jitra (Lucas 9:2). Echi bacháwala cristianos ko, ke bi nawésali japoná napawili, ayénachó simíali japoná wiká pagótami nirú alí echi pagótami bitélachi (leeri Hechos 5:42; 17:17). Jipi rawé echi japi ne bichíwali cristianos ju, ayénachó nawisasia simía japoná nirú echi pagótami. Jiti we galé echi pagótami, echi ko iʼwérili noká bineria echi aʼláala raʼíchali japi aní echi Biblia (Marcos 12:31).

 AMINABI NATABO JAPI TA BINÉ

4. We natéami niraa iné japi aní echi Biblia

5. Nawesa japi aní echi Biblia

 6. Noká japi riká bineri

¿Chúsiá bilé rijoi Tom riwéami machili japi riwali echi cristianos ne bichíwali? Inesi echi VIDEO alí raʼichasi jepuná jitra:

• Japi riká machina echoná video, ¿chúsiá Tom ke galeli echi religión?

• ¿Chúsiá jipi ko ma bichiwi japi ma riwali echi bichíwali?

Echi japi aní japi bichiwi Jesús, isísaré japi Jesús anili. Leérisi Santiago 2:24 alí raʼichasi jepuná jitra:

• ¿Chu iyiri nalí we natéami niraa iné Jesús: japi ta aní o japi ta noká?

7. We galé anakupi niraa

• Japi ne bichíwali cristianos ju, ¿chúriká inésaré jarecho pagótami jaréana piréami o japi bilecho riká raʼicha?

• Alí, ¿chúriká omérima echi riká nokayá nirúachi guerras?

 JAPI MI BINELI

Echi cristianos ne bichíwali, noká japi biné echoná Biblia, iʼwiri jarecho jiti we galé alí nawesa japi aní Onorúami Raʼicháala.

Piri mi animea

• Japi bichiwi echi cristianos ne bichíwali, ¿kumi oserúa chukú?

• ¿Chúriká nísaré echi ne bichíwali cristianos?

• Alí, ¿chu iyiri nóchali noká?