SAMBIRU 18
Kumbi Akhristu Auneneska Tingaŵaziŵa Wuli?
Ŵanthu anandi pacharu akamba kuti mbakhristu. Kweni yiwu agomezga vinthu vakupambana kweniso atende marangu ngakupambana. Sonu kumbi Akhristu auneneska tingaŵaziŵa wuli?
1. Kumbi Akhristu mbayani?
Akhristu mbakusambira pamwenga kuti wo alondo Yesu Khristu. (Ŵerengani Machitidu 11:26.) Kumbi yiwu alongo wuli kuti mbakusambira nadi aku Yesu? Iyu wangukamba kuti: “Asani mulutirizga kusunga mazu ngangu, ndikuti ndimwi akusambira ŵangu nadi.” (Yohane 8:31) Venivi ving’anamuwa kuti Akhristu auneneska atenere kuvwiya vo Yesu wasambiza. Vo Yesu wasambizanga vatuliyanga mu Malemba ndipu Akhristu auneneska nawu atenere so kuchita viyo.—Ŵerengani Luka 24:27.
2. Kumbi Akhristu auneneska alongo wuli kuti atanjana?
Yesu wangukambiya akusambira ŵaki kuti: “Muyanjanengi nge mo ini ndakuyanjiyani.” (Yohane 15:12) Kumbi Yesu wangulongo wuli kuti waŵayanjanga ukongwa akusambira ŵaki? Iyu wachezanga nawu, waŵachiskanga ndipuso waŵawovyanga. Yesu wangupereka so umoyu waki chifukwa chaku yiwu. (1 Yohane 3:16) Mwakuyanana waka, Akhristu auneneska akamba waka pamulomu cha kuti atanjana. Kweni vo yiwu akamba ndi kuchita vilongo kuti atanjana nadi.
3. Kumbi Akhristu auneneska agwira ntchitu niyi?
Yesu wanguŵapaska ntchitu akusambira ŵaki. Iyu “wanguŵatuma kuti akapharazgengi Ufumu waku Chiuta.” (Luka 9:2) Akhristu akwambiriya apharazganga mumalu ngo asopiyangamu, mumalu ngo mwasanirikanga ŵanthu anandi kweniso munyumba za ŵanthu. (Ŵerengani Machitidu 5:42; 17:17.) Mwakuyanana waka, Akhristu auneneska mazuŵa nganu apharazga uneneska wa mu Bayibolu kwekosi ko kungasanirika ŵanthu. Yiwu atanja ŵanthu wosi, ndipu agwiriskiya ntchitu nyengu ndipuso nthazi zawu kuti aŵapharazgiyi uthenga wakuchiska kweniso wa vinthu vamampha vo vichitikengi kunthazi.—Mariko 12:31.
SAMBIRANI VINANDI
Wonani mo mungapambanisiya Akhristu auneneska ndi ŵanthu wo aleka kuvwiya vo Yesu wasambiza ndipuso kulondo vo iyu wachitanga.
4. Afufuza uneneska wa mu Bayibolu
Akhristu akwambiriya atumbikanga Mazu ngaku Chiuta, apharazganga kweniso ayanjananga ukongwa
Ŵanthu anyaki akamba kuti mbakhristu kweni awona kuti kufufuza uneneska wa mu Bayibolu nkhwakukhumbika cha. Woneriyani VIDIYO, pavuli paki kambiskanani fumbu lo le mumphata.
-
Kumbi ndi vinthu wuli vo matchalitchi ngachikhristu ngachita vo vachitiska kuti ŵanthu atondekengi kusambira vo Yesu wasambizanga?
Yesu wasambizanga uneneska wa mu Mazu ngaku Chiuta. Ŵerengani Yohane 18:37, pavuli paki kambiskanani fumbu ili:
-
Mwakukoliyana ndi vo Yesu wangukamba pa lemba ili, kumbi tingaŵaziŵa wuli Akhristu wo ŵe “kuchigaŵa cha uneneska”?
5. Apharazga uneneska wa mu Bayibolu
Akhristu akwambiriya apharazganga
Yesu wechendaluti kuchanya, wanguŵapaska ntchitu akusambira ŵaki yo yeche kuchitika mpaka sonu. Ŵerengani Mateyu 28:19, 20 ndipuso Machitidu 1:8, pavuli paki kambiskanani fumbu ili:
-
Kumbi ntchitu yakupharazga yikhumbika kugwirika mpaka pani ndipuso mpaka zukwanji?
6. Achita vo apharazga
Ntchifukwa wuli munthu munyaki zina laki Tom wangukhorwa kuti wasaniya nadi Akhristu auneneska? Woneriyani VIDIYO, pavuli paki kambiskanani mafumbu ngo nge mumphata.
-
Nge po tawone mu vidiyo, ntchifukwa wuli Tom wanguleka kugomezga visopa?
-
Ntchifukwa wuli iyu sonu wakhorwa kuti wakusaniya uneneska?
Vakuchita ndivu vakukhumbika ukongwa kuluska vo tikamba waka pamulomu. Ŵerengani Mateyu 7:21, pavuli paki kambiskanani fumbu ili:
-
Kumbi Yesu wawona kuti vakukhumbika ndi nivi, vo tikamba pamwenga vo tichita?
7. Atanjana
Akhristu akwambiriya atumbikanga Mazu ngaku Chiuta, apharazganga kweniso ayanjananga ukongwa
Kumbi vingachitika nadi kuti Akhristu aŵiki umoyu wawu pa ngozi chifukwa cha anyawu? Woneriyani VIDIYO, pavuli paki kambiskanani mafumbu ngo nge mumphata.
-
Nge po tawone mu vidiyo, ntchifukwa wuli Lloyd wanguŵika umoyu waki pa ngozi chifukwa cha Mubali Johansson?
-
Kumbi vo wanguchita vilongo kuti wenga nadi Mkhristu wauneneska?
Ŵerengani Yohane 13:34, 35, pavuli paki kambiskanani mafumbu yanga:
-
Kumbi akusambira aku Yesu (Akhristu auneneska) akhumbika kuti achitengi nawu wuli ŵanthu a mafuku ndipuso a mitundu yinyaki?
-
Nanga akhumbika kuti achitengi nawu wuli ŵanthu a mafuku ndipuso a mitundu yinyaki asani kwe nkhondu?
ŴANTHU ANYAKI AKAMBA KUTI: “Akhristu ndiwu achita vinthu viheni ukongwa, so vingachitika wuli kuti aje ndi chisopa chauneneska?”
-
Kumbi mungamuŵerenge lemba nili munthu lo lingamuwovya kuziŵa Akhristu auneneska?
KUMBI MWASAMBIRANJI?
Akhristu auneneska avwiya vo Bayibolu likamba, atanjana ukongwa ndipuso apharazga uneneska wa mu Bayibolu.
Kuweriyamu
-
Kumbi vo Akhristu auneneska agomezga vituliya pani?
-
Kumbi Akhristu auneneska aziŵika ndi jalidu nili?
-
Kumbi Akhristu auneneska agwira ntchitu wuli?
FUFUZANI
Sambirani vinandi vakukwaskana ndi gulu la ŵanthu lo litesesa kulondo vo Yesu Khristu wachitanga ndi kusambiza.
Wonani vo vinguchitiska kuti muthukazi munyaki yo wenga sisiteri wasaniyi chisopa chauneneska.
“Angundimuka Mafumbu Ngosi Mwakugwiriskiya Ntchitu Bayibolu!” (Chigongwi cha Alinda, April 1, 2014)
Wonani mo Akhristu auneneska alongore kuti atanja Akhristu anyawu wo akhumbika chovyu.
Kachigaŵa ka Vidiyo Yakuti Kovya Abali Asani Kwachitika Ngozi za Chilengedu (3:57)
Wonani vo Akhristu auneneska mazuŵa nganu achita, vo viyanana ndi vo Akhristu akwambiriya achitanga, vo Yesu wangukamba kuti azamuziŵika navu.
“Kumbi Akhristu Auneneska Tingaŵaziŵa Wuli?” (Chigongwi cha Alinda, March 1, 2012)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
