CIIYO 18
Mbotukonzya Kubazyiba Banakristo Beni-beni
Bantu banji balitaminina kuti Mbanakristo. Pele nzyobasyoma alimwi azyeelelo zyabo ziliindene kapati. Aboobo mbuti mbotukonzya kubazyiba Banakristo beni-beni?
1. Ino Banakristo beni-beni mbaani?
Banakristo mbaasikwiiya naa basikutobela Jesu Kristo. (Amubale Milimo 11:26.) Mbuti mbobatondezya kuti mbaasikwiiya ba Jesu? Jesu wakaamba kuti: “Ikuti mwazumanana kuba mujwi lyangu, muli basikwiiya bangu ncobeni.” (Johane 8:31) Eeci caamba kuti, Banakristo beni-beni beelede kutobela njiisyo zya Jesu. Alimwi Jesu lyoonse wakali kuyiisya ncolyaamba Bbaibbele. Abalo basikumutobela beni-beni balacita mbubonya.—Amubale Luka 24:27.
2. Mbuti Banakristo beni-beni mbobatondezya luyando?
Jesu wakaambila basikwiiya bakwe kuti: ‘Amuyandane mbubonya mbondali kumuyanda nywebo.’ (Johane 15:12) Mbuti Jesu mbwaakatondezya kuti wakali kubayanda basikwiiya bakwe? Wakali kujana ciindi cakuba ambabo, kubakulwaizya alimwi akubagwasya. Mane buya wakaaba buumi bwakwe akaambo kambabo. (1 Johane 3:16) Mbubwenya buyo, Banakristo beni-beni tabaambi buyo kuti balayandana, pele balatondezya muzintu nzyobaamba alimwi anzyobacita.
3. Ino mulimo nzi ngobacita Banakristo beni-beni?
Jesu wakabapa mulimo basikwiiya bakwe. “Wakabatuma kuyookambauka Bwami bwa Leza.” (Luka 9:2) Banakristo bakusaanguna, tiibakali kukambaukila buyo mumasena aabo aakukombela, pele bakali kukambauka amumasena aambi aabuleya alimwi amumaanda aabantu. (Amubale Milimo 5:42; 17:17.) Mbubwenya buyo, Banakristo beni-beni mazuba aano balakambauka kasimpe kamu Bbaibbele kufwumbwa kujanika bantu. Balabayanda bantu, aboobo calukkomano balalyaaba kubelesya ciindi cabo anguzu kwaambilizya mulumbe wamu Bbaibbele uupa bulangizi aluumbulizyo.—Marko 12:31.
AMWIIYE ZINJI
Amubone cipa Banakristo beni-beni kwiindana abantu batatobeli njiisyo zya Jesu alimwi acikozyanyo cakwe.
4. Balayandaula kasimpe kamu Bbaibbele
Tabali boonse ibalitaminina kuti Mbanakristo ibabikkila maano kukasimpe kamu Bbaibbele. Atweebelele VIDIYO, akubandika mubuzyo uutobela.
-
Mbuti zikombelo zimwi izilitaminina kuti zya Bunakristo mbozyaalilwa kuyiisya nzyaakali kuyiisya Jesu?
Jesu wakali kuyiisya kasimpe kazwa mu Jwi lya Leza. Amubale Johane 18:37, akubandika mubuzyo ooyu:
-
Kweelana ancaakaamba Jesu, mbuti mbotukonzya kubazyiba Banakristo ‘ibali kulubazu lwakasimpe’?
5. Bakambauka kasimpe kamu Bbaibbele
Katanaunka kujulu Jesu, wakapa basikumutobela mulimo walo uucicitwa amazuba aano. Amubale Matayo 28:19, 20 alimwi a Milimo 1:8, akubandika mubuzyo ooyu:
-
Ino mulimo wakukambauka wakali kuyoosakana kusikila kuli?
6. Balacita nzyobakambauka
Ncinzi cakapa ba Tom kuzyiba kuti bakabajana Banakristo beni-beni? Atweebelele VIDIYO, akubandika mibuzyo iitobela.
-
Muvidiyo, ncinzi cakapa ba Tom kucileka kukomba?
-
Nkaambo nzi ncobasyoma kuti bakakajana kasimpe?
Nzyotucita zilaanguzu kwiinda majwi ngotwaamba. Amubale Matayo 7:21, akubandika mubuzyo uutobela:
-
Ncinzi ncayanda kapati Jesu, zintu nzyotulitaminina kusyoma naa nzyotucita?
7. Balayandana
Sena masimpe Banakristo balabikka buumi bwabo muntenda akaambo ka Banakristonyina? Atweebelele VIDIYO, akubandika mibuzyo iitobela.
-
Muvidiyo, ncinzi cakapa Mukwesu Lloyd Likhwide kubikka buumi bwakwe muntenda akaambo ka Mukwesu Johansson?
-
Sena muyeeya kuti eeci ncaakacita cakatondezya kuti Munakristo wini-wini?
Amubale Johane 13:34, 35, akubandika mibuzyo eeyi:
-
Mbuti basikwiiya ba Jesu naa Banakristo beni-beni mbobeendelezya bantu bamusyobo uumbi naa cisi?
-
Mbuti mbobakonzya kucita oobo ciindi cankondo?
BAMWI BAAMBA KUTI: “Banakristo mbamwi, nkwiindana buyo kwazikombelo”
-
Ndugwalo nzi ndomukonzya kubalila muntu umwi, ilutondezya mbotukonzya kubazyiba Banakristo beni-beni?
MUBUFWAAFWI
Banakristo beni-beni batobela ncoliyiisya Bbaibbele, batondezya luyando lwakulyaaba alimwi akukambauka kasimpe kamu Bbaibbele.
Ncinzi Ncomwaiya?
-
Ino nzyobasyoma Banakristo beni-beni ziyeeme anzi?
-
Mbube nzi butugwasya kubazyiba Banakristo beni-beni?
-
Ino mulimo nzi ngobacita Banakristo beni-beni?
AMUZYIBE ZINJI
Amwiiye kujatikizya bantu bamwi ibasolekesya kwiiya cikozyanyo anjiisyo zya Jesu Kristo.
Amubone cakapa mukaintu umwi iwakali siite kujana Banakristo beni-beni.
“Bakabelesya Bbaibbele Kwiingula Mibuzyo Yoonse!” (Ngazi Yamulindizi, April 1, 2014)
Amwiiye kujatikizya Banakristo beni-beni mbobatondezya luyando kubasyominyina ibayandika lugwasyo.
Amulange-lange Banakristo beni-beni mazuba aano, ibacita nzyobakali kucita Banakristo bakusaanguna, kutobela nzyaakayiisya Jesu, zyalo izibazyibya kuti mbaasikumutobela.
“Ino Nzitondezyo nzi zya Banakristo Bakasimpe?” (Ngazi Yamulindizi, March 1, 2012)