DYONDZO 18
U Nga Va Vona Njhani Vakreste Va Ntiyiso?
Vanhu va tibiliyoni va vula leswaku i Vakreste. Kambe a va pfumeli eka tidyondzo leti fanaka naswona a va hanyi hi milawu leyi fanaka. Hi nga va vona njhani Vakreste va ntiyiso?
1. I yini Mukreste?
Vakreste i vadyondzisiwa kumbe valandzeri va Yesu Kreste. (Hlaya Mitirho 11:26.) Va swi kombisa njhani leswaku i vadyondzisiwa va Yesu? Yesu u te: “Loko mi yingisa leswi ndzi swi vulaka, mi vadyondzisiwa va mina.” (Yohane 8:31) Leswi swi vula leswaku Vakreste va ntiyiso va fanele va yingisa tidyondzo takwe. Leswi Yesu a a dyondzisa leswi humaka eMatsalweni, Vakreste va ntiyiso na vona va pfumela leswi Bibele yi swi dyondzisaka.—Hlaya Luka 24:27.
2. Vakreste va ntiyiso va ri kombisa njhani rirhandzu?
Yesu u byele valandzeri vakwe a ku: “Mi rhandzana hilaha ndzi mi rhandzeke hakona.” (Yohane 15:12) Yesu u swi kombise njhani leswaku wa va rhandza vadyondzisiwa vakwe? U tinyike nkarhi wa ku va na vona, a va tiyisa ni ku tlhela a va pfuna. U tlhele a va fela. (1 Yohane 3:16) Hilaha ku fanaka, Vakreste va ntiyiso va endla swo karhi ku kombisa leswaku va rhandzana. Va kombisa rirhandzu rolero hi marito ni hi swiendlo.
3. Hi wihi ntirho lowu Vakreste va ntiyiso va wu endlaka?
Yesu u nyike vadyondzisiwa vakwe ntirho. ‘U va rhume leswaku va ya chumayela hi Mfumo wa Xikwembu.’ (Luka 9:2) Vakreste va le mikarhini ya vaapostola a va dyondzisa etindhawini leti a va gandzela eka tona, etindhawini ta mani na mani ni le makaya ya vanhu. (Hlaya Mitirho 5:42; 17:17.) Ninamuntlha, Vakreste va ntiyiso va chumayela ntiyiso lowu nga eBibeleni kun’wana ni kun’wana laha ku kumekaka vanhu. Leswi va rhandzaka vaakelani va vona, va tirhisa nkarhi ni matimba leswaku va chumayela van’wana mahungu ya le Bibeleni lama chavelelaka ni ku nyika ntshembo.—Marka 12:31.
ANAKANYISISA
Twana leswaku Vakreste va ntiyiso va hambana njhani ni vanhu lava nga n’wi tekeleliki Yesu ni ku tlhela va nga yingisi tidyondzo takwe.
4. Va lavisisa ntiyiso lowu nga eBibeleni
Vakreste va le mikarhini ya Bibele a va xixima Rito ra Xikwembu
Van’wana lava tivulaka Vakreste a va wu teki wu ri wa nkoka ntiyiso lowu nga eBibeleni. Tlanga VHIDIYO, ivi mi bula hi xivutiso lexi landzelaka.
-
Tikereke leti a ti ti vula Vakreste ti tsandzeke njhani ku dyondzisa tidyondzo ta Yesu?
Yesu u dyondzise ntiyiso lowu nga eRitweni ra Xikwembu. Hlaya Yohane 18:37, ivi mi bula hi xivutiso lexi:
-
Yesu u vule leswaku hi nga va vona njhani Vakreste lava “nga le ntiyisweni”?
5. Va chumayela ntiyiso lowu nga eBibeleni
Vakreste va le mikarhini ya Bibele a va chumayela van’wana
Loko Yesu a nga si tlhelela etilweni, u nyike valandzeri vakwe ntirho lowu ninamuntlha wa ha yaka emahlweni. Hlaya Matewu 28:19, 20 na Mitirho 1:8, ivi mi bula hi xivutiso lexi:
-
Ntirho wo chumayela a wu ta endliwa ku ya fikela kwihi?
6. Va endla leswi va swi dyondzisaka van’wana
I yini leswi endleke Tom a swi vona leswaku u kume Vakreste va ntiyiso? Tlanga VHIDIYO, ivi mi bula hi swivutiso leswi landzelaka.
-
Eka vhidiyo leyi, i yini lexi nga endla Tom a nga ha lavi ku twa nchumu hi vukhongeri?
-
Hikwalaho ka yini a a tiyiseka leswaku u kume ntiyiso?
Mitirho ya vulavula. Hlaya Matewu 7:21, ivi mi bula hi xivutiso lexi:
-
I yini leswi nga swa nkoka swinene eka Yesu, xana hi leswi hi vulaka leswaku hi pfumela eka swona kumbe hi leswi hi swi endlaka?
7. Va rhandzana
Vakreste va le mikarhini ya Bibele a va rhandzana
Xana Vakreste va tshame va veka vutomi bya vona ekhombyeni leswaku va ponisa Vakrestekulobye? Tlanga VHIDIYO, ivi mi bula hi swivutiso leswi landzelaka.
-
Eka vhidiyo leyi, i yini lexi nga endla Lloyd a veka vutomi bya yena ekhombyeni leswaku a ponisa Makwerhu Johansson?
-
Xana u vona onge u kombise leswaku i Mukreste wa ntiyiso?
Hlaya Yohane 13:34, 35, ivi mi bula hi swivutiso leswi:
-
Vadyondzisiwa va Yesu ku nga Vakreste va ntiyiso va va khoma njhani vanhu va rixaka kumbe va tiko rin’wana?
-
Va swi kombisa njhani leswaku va ni rirhandzu loko ku ri ni nyimpi?
VAN’WANA VA RI: “A swi na mhaka leswaku u nghena kereke yihi, ntsena loko u pfumela eka Yesu Kreste.”
-
Hi rihi tsalwa leri u nga ri hlayaka leri kombisaka leswaku hi nga va vona njhani Vakreste va ntiyiso?
NKATSAKANYO
Vakreste va ntiyiso va endla leswi Bibele yi swi dyondzisaka, va rhandzana hi mbilu hinkwayo naswona va dyondzisa ntiyiso wa le Bibeleni.
Mpfuxeto
-
Leswi Vakreste va ntiyiso va swi pfumelaka swi huma kwihi?
-
Hi nga va vona njhani Vakreste va ntiyiso?
-
Hi wihi ntirho wa nkoka lowu Vakreste va ntiyiso va wu endlaka?
KUMA LESWI ENGETELEKEKE
Dyondza swo tala hi ntlawa wa vanhu lava tikarhatelaka ku tekelela Yesu Kreste ni ku pfumela eka leswi a swi dyondziseke.
Vona leswi pfuneke wansati un’wana loyi a a ri xirho xa kereke ya Khatoliki leswaku a ‘tsaka swinene hi ku gandzela Xikwembu.’
“Ti Tirhise Bibele Ku Hlamula Swivutiso Hinkwaswo” (Xihondzo xo Rindza, April 1, 2014)
Vona rirhandzu leri Vakreste va ntiyiso va ri kombisaka lava lavaka ku pfuniwa.
Ku Pfuna Vamakwerhu Loko Va Weriwa Hi Timhangu—Xiphemu (3:57)
Kambisisa leswi Vakreste va le mikarhini ya Bibele va swi endleke ni leswi Vakreste va ntiyiso namuntlha va swi endlaka, ku kombisa leswaku hi vona valandzeri va Kreste lava Yesu a vulavuleke ha vona.
“Hi Yihi Mimfungho Ya Vakreste Va Ntiyiso?” (Xihondzo xo Rindza, March 1, 2012)
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
